HABAKUK 1 - Boy Lonana

¹ Boy ma tak tam ii sa ma jok vun Lona, Habakuk, nam dam kina.

Yira sa jok vun Lona yi Lona jewra

² Yira an yaŋ ana Yawe mbay njununura tew kaɗi ni hu li manage? Aŋ ka humbi. An yaŋ ha kolo u delen eŋga ana aŋ mbay u saɓak maŋŋa, aŋ ka suɗunɗi.

³ Aŋ mbuɗun a an wi dla cora u irin ŋgolla na ni kay mege? Aŋ min colla col duk suu li dla cora su? Fokon halaŋŋi suu li dla cora ɦurum tlena vi suunana. Hu li ma kaɓakŋa ni honira hin yow koloo.

⁴ Na ɗaŋŋi gaɗta hin heɓ kiyo, sa ma ɗegeena hin ka wi buuna u irimbi. Hu li ma sa ma cona ɓak mamma li ki jivira su ma ɗegeena, ma ɗegeena dlaamba hu buu namma ki bulumiya.

Hoŋ dira vi Lona. Suu Kaldeenna tlasiya

⁵ Gologi dla cora vi suunara, agi hin mbuɗ ki ndaana kay ana cecem wan daŋga sana hin li sunda, agi hin ka tin saaragi kay boy namma hu li ma asi hi njaɗagi nana.

⁶ An wana, an yow suu Kaldeenna ay wa, suu dlasi co suu ŋguy yam mbassa a kak ki hu zi ma ka masinaɗi lay na.

⁷ Dlasi coo, ya coco lay, asi tin gaɗ masira ni kay tasi lay, li dlaasira ni kay tasi lay.

⁸ Kulumi masisina liŋ coco ko sindilna na, siisi ti coco ko sii ŋguu ma vi mbuurina fidigina na. Kulumi masisina liŋ ko ɓarawna pii kolo huulonara na. Suu kulumi asina col ay ni day, asi pi ni ko ndal ɓarawna duk piiraha kay mbuunara na.

⁹ Ay u saɓakamu, nam tuɗ ay wan ɗaŋŋa, irim tinira ay fokom na gay. Nam mol suu nam yowosina kay tasi ko ŋgetlna na.

¹⁰ Nammi sa pan suu mulina. Goryoŋ mulinana ni tlegeyem suu luuna. Nammi sa pan suuna u saɓakasi bel belna. A tlasira ni nam mbu lina kolo u semu.

¹¹ Hu li namma saa suuna mbuɗ ki zeɗ. Nam tuɗ ki hu li ma daŋŋa, mbuɗ tam ki malaŋ dlara, sa namma saɓakammi loomma.

Sa jok vun Lona yi Lona a mbara

¹² Ka ni aŋ ma ay hu ura tin ayra day a Yawenaɗi su? Loonna, saan ma teteɗna? Ami ka miɗ kiɗi, Yawe, aŋ tinimmi a kaɓakŋa, hinira, aŋ ɦaɗ saɓakŋa a gi humba kay ɗegeera.

¹³ Iriŋ ki saɓaki pasiyak a wi cora, aŋ ka min col gol dla cora u iriŋgi, ni kay me aŋ min gol suu li dla cora may, seŋ taŋ, ka di vaɗi hu li ma sa cona ka ci sa jivi suumma kina nige?

¹⁴ Cecem wanda ni aŋ min suuna ko foto kulufna duk mbo lumma ŋgolna na, ko suu ulul sa golosi kaɗira na.

¹⁵ Sa namma wanni yowosi ki kolo u jambaɗta halaŋ, nam ɗaarasi bayra fokosiya, nam yowosi u zewna. Na ɗaŋŋi nam furi cocoo.

¹⁶ Na ɗaŋŋi nam li ɓivunna maŋ bay mamma, ŋgaɗ mbitla maŋ zew mamma, kay ana asi ɦam ti ma ŋgolna ni asiya.

¹⁷ Na ɗaŋŋi nam hin ko hu bay mamma ki a hin yow suu hiŋŋa, ka wasi hahawasiɗi lay.