GALATENA 6 - Boy Lonana

Ziirigi nekka vi taygira taygira

¹ Gorsenna lini wayaygi maa kal hu cora wa ni, agi suu ka hu Musuk Lonara mbaaram ay hu voɗta ɗegeera, ni gol taŋ jivi egemu, an di hu olo ana gol taŋ jivi kay aŋ kay taŋga mba kal hu dla ndaɗtaɗi.

² Njun u tagi a zii nekka vi tagira, agi li wa na ni hummi u gaɗta vi Kristura.

³ Lini sana saa ana nam a li vaa ni ɦawaa, nam ganni yam tamu.

⁴ Sana gol poy mamba ni nam kay tamu ka ŋgaaɗ ni ura vi suunaraɗi, ndaɗ hin li ni mamba kay tamu.

⁵ Gegelay tlini nek mamba kay tamu.

⁶ Sa ma ka haɗ Boy ma Ayra lini nanagelay nam ɓorow tlegeyem suu jivina halaŋ u sa ma haɗamma.

⁷ Ganagi yam tagiɗi sana ka ndak a pan Lonaɗi, sana hin feɗ ni va ma nam zaaramma.

⁸ Lini sana zaa ni hu mbalatam ɦawaa, mbalatam hin ɦam va ma ko feɗta nana ni miɗna, lini nam zaa ni va ma jivi u Musukka, Musukka hin ɦam va ma ko feɗta nana ni iirira ka daɓ kiɗira.

⁹ Hiniygi sunda li jivira kiɗi, lini aygi maŋ ka kiɗi ni aygi hin feɗ jivira hu li ma lina hin ndakŋa.

¹⁰ Hu li ma lina ka tuna laygi jivira eg suuna halaŋ. Li jivira saɓaki ni eg gorseygi suu vina.

Gaɗta daganda u gi deɓpa

¹¹ Gologi ɓiira ŋgolora an ɓiirigi magaara cecemi u kon tanda.

¹² Suu min a li tasi jivi ii suuna u saara vi sa warna ɦawana min ɦeɓegi kay caw ɗiwra, asi li na ni kay a suɗ tasi ki ko lassa kay miɗna vi Kristu.

¹³ Asi suu caw ɗiwisi kina ka li u gaɗ ndaɗtaɗi lay, asi min cawagi ɗiwigi ki kay a ŋga tasi kagiya. Kay tinda asi tin dla ndaɗta eg mbalatagira.

¹⁴ Lini kan anu ni an ka min a ŋga tan kay garakŋa vi Buu Suuna Yesuɗi, kay garakŋa vi Kristu ni tlesuu hu duliyara halaŋ ki miɗi kanu, an tanda ki miɗi kay tlesuu hu duliyarana may.

¹⁵ Caw ɗiwra u caw ɗiw kaɗira lay ni li vaɗi, va ma ŋgolna ni vuɗta wilira dew daŋ.

¹⁶ Kay suu li u gaɗ ndaɗta hu iiri masira halaŋ an di kasi ana heɓpa u jivira halaŋ li u asiya li u suu vina vi Lona halaŋ.

¹⁷ Hin ha fokka ni sa mbaaran dlara loɓon tan egen oloɗi, kay huɗukka ka egenda tak ana anni mbaɓuna vi Yesu.

¹⁸ Gorsenna, ko oora vi Bu Suuna mayna, Yesu Kristu, kak u agi halaŋ. Amin.