GALATENA 1 - Boy Lonana

Gi deɓpa

¹ Ni an Pol sa vovoɗta, manan ka ni suunaɗi, ka u saɗi lay, ni Yesu Kristu u Lona Buna ma colom ki kolo iiri duk suu miɗina.

² Gorseygina halaŋ suu ka tanna u anu ɓii magaara ha maŋ suu vi Kristuna hu Galati, a dasi ana,

³ ko Lona Buy u Bu Suuna Yesu Kristu ɦagi oora u heɓpa.

⁴ Kristu ɦal tam ki u min mamba kay a suɗuygi ki hu cooygira, a buɗuygi ki hu duliyara co wanda, u minda vi Lona ma buygina.

⁵ Geleɗta maŋ Lona a fafatɗa. Amin.

Boy ma Ayra ma dewna

⁶ An li ndaana kay agi hinim ki na zak gawra, nam sa ma yagi ay u oora vi Kristura, agi hin hoŋ jok ki u boy ma daŋŋa.

⁷ A gasira ni Boy ma Ay ma daŋ kaɗi, an di na ni kay mege kay suu ganagi yagina kaa, asi min mbuɗ Boy ma Ayra vi Kristu ki zeɗ.

⁸ Lini sana, ɗowba ami tamira kala, ɗowba sa sunda huulona kala, mba dagi Boy ma Ayra ki zeɗ ka taɓi u ma ami ka dagina na ɗini, nammi sa ma ki baayna.

⁹ Ami dagi ki jewe, an min hoŋ di cecemi olo, lini sana dagi Boy ma Ayra zeɗ u ma agi humumma sa namma ni ma ki baayna.

¹⁰ Ni di ana an hal a li jivira ni ii suuna su? Ka naɗi, an hal a li jivira ni ii Lona na ni an li na a suuna golon jivira na su? Lini an hal a li jivira ni ii suuna ɦawaa ni an ka sa sunda vi Kristu oloɗi.

Pol mbuɗ sa vovoɗta

¹¹ Gorsenna an dagini Boy ma Ayra ma an damma, ni ka yalna vi sana ɦawaɗi.

¹² An fam ay ni ka ko saɗi, sa haɗanna kaɗi lay. Yesu Kristu takanna ni namu.

¹³ Agi hum ki kay boy ma an lam ay jew hu vira vi suu Juifna, agi hum kay an las suu vi suu vi Lonna cocoo, an min ay gin a ɓeŋesi kiyo.

¹⁴ An su kay ndarayan suu Juifna suu wul u tamina u vira vi suu Juifna, tan feɗ coco kay a li u gaɗta vi somoyonda.

¹⁵ Lona u min mamba manan ay ki jew bay an vuɗa kay a sunumu.

¹⁶ Hu li ma nam takan goromma kay an tuɗ dam Boy mam ma Ayra ki maŋ suu ka njaf suu ɦawana ni an tuɗ joɓ sa ay kaɗi.

¹⁷ An tuɗ ay ka Yerusalem eg suu vovoɗ suu jewennaɗi lay, an tuɗ ki ni Arabi na ɗow hin hoŋ ay ni Damas.

¹⁸ Ŋgoo dagan basara hindi an tuɗ Yerusalem ni tuwa, kay a ŋgaf u Piyer, an kak ay egem buuna doogo yam vadl.

¹⁹ An wi sa ma vovoɗ ma daŋ ay kaɗi, ni Jak ma wayaŋ Bu Suunana dew.

²⁰ Boy ma an ɓiirigina ha hu magaara wanna ni gasira, an di ki ni fok Lona an kaboyɗi.

²¹ Ŋgoo dagan an tuɗ hu ndaŋgara Siri u Silisi.

²² An hu basa ndaɗta ni suu vi Kristuna hu Yude halaŋ bay wan ki tuwa.

²³ Asi hum fun suu daŋŋa di kan anaba, «Nam ma li lasaygi ay jewna cecemi ka di boyna kay vira nam min a ɓeŋeɗ ki ginda.»

²⁴ Asi geleɗ Lona kanu.