FILIPINA 4 - Boy Lonana

Pol gaɗ suuna

¹ Gorsenna agi suu maygi vanna, agi mbuɗun hurun furira ni agiya, ni kay ndaɗta an ŋga tan kagiya banayanna, kakagi saɓak hu iiri magira hu Bu Suuna.

² Evodi u Sintise an cenegiya, kamagi kamiya vagi hurugi ni ko agi ni gorsemina hu Bu Suuna na.

³ Aŋ ndaran goo ma ɗegeena an joɓoŋu aŋ njun usiya, asi taɓ u an kay duurumi a mbee Boy ma Ayra ki ni asiya, u Klement u ndarayan gor suu sunda, ni asi suu sesi ɓiiri hu magaara iirira.

⁴ Furiyugi hu Bu Suuna na gak gak an di olo furiyugiya.

⁵ Takagi lalam magira eg suuna halaŋ. Bu Suuna hin tok daŋ a mbara.

⁶ Lagi ndaaɗi, hu cen magira joɓogi Lona kay tlesuu agi minisina halaŋ, joɓogina u gi deɓpa.

⁷ Heɓpa vi Lona ta su kay tlesuu sana wasina halaŋga, mba njun u hurugiya u ŋgus magira halaŋ hu Yesu Kristu.

⁸ Gorsenna tin saa magira kay tlesuu jivina suu ndaki kay geleɗta na halaŋ, kay tlesuu gasina halaŋ, hoŋ yamba kaŋgara, ɗegeera, teteɗta, jivira u ŋgara halaŋ.

⁹ Lagi u tlesuu agi haɗasi humusi ay fununna, tlesuu agi humusi wasi an lasina. Lona ma ɦaygi heɓpana mba li u agiya.

Pol hoŋ gi deɓpa maŋ suu Filipina kay ɦal masira

¹⁰ An li furira ŋgolo hu Bu Suuna, kay agi fi voɗta kay a tak min magira egen wili olo, an ka di ana agi hin saara saa kanda ki wa naɗi, ni kay agi fi voɗ mayra laɗta kaɗira ɦawaa.

¹¹ An di na ni ana hawra ka lanu naɗi, an tan ki haɗi a furi kay va ma konna.

¹² An ki haɗi kay a kak hu hawra lay a kak hu ɦizza lay, an ki haɗi kay a li furira aragelay hu tlena halaŋ, lini an tina ka kon ŋgol lay, lini mayra can lay, lini tlena ka kon coco lay, lini va kaɗi lay.

¹³ An ndak a li tlena halaŋ kay Kristu ma ɦan saɓak nammana.

¹⁴ Ni kay ndaɗta agi li jiviya kay tlan nek manda ki kagiya.

¹⁵ Agi suu Filipina agi wi dla ndaɗta ki u irigiya, hu li ma an hin Masedoin ni hu basara asi gijaŋ a di Boy ma Ayra, agi dew ni suu vi Kristuna suu njun ay unna, agi dew ni suu vi Kristuna suu an fi ay kogi a bassana.

¹⁶ Hu li ma an ay Tesalonik wani agi sunun tlesuu hawasi canna ha segi goy ca.

¹⁷ Ka ana an hal ni a mini tlena ɦawaa naɗi, an saa ni kay agi hin mba fi va kay magisina huwa.

¹⁸ An fi tlesuu agi sununsina ayna wa halaŋ su ni suy ɗow, cecemi Epafrodit mbaaran tlesuu agi sununsina ayna ni tlena ndakan ki wa halaŋ. Ҥal magira ni ko ɓivun ma his jivina ma Lona minim, irim jivina na.

¹⁹ Lo manna mba ɦagi tlesuu agi minisina halaŋ u jivira vi ɦiz mamba hu Yesu Kristu.

²⁰ Ŋgolla mba li maŋ Lona buy na gak gak a fafatɗa Amin!

Gi deɓpa daɓ daganda

²¹ Suu vina vi Lona hu Yesu Kristu, gasi deɓpa halaŋ, gorseygi suu ka u an tanina gagi deɓpa.

²² Suu vina vi Lona halaŋ suu ka tanina, saɓaki ni suu ka hu zina vi Sesar gagi deɓpa.

²³ Ko oora vi Bu Suuna Yesu Kristu mba kak u agi halaŋ.