FILIPINA 3 - Boy Lonana

Dlara sana li tam ki gasi ɗegee ii Lonara

¹ Cecemi gorsenna furiyugi kay taɓpa hu Bu Suuna, ka kan loɓ a an hoŋogi va ma an ɓiirim ki jewnaɗi, kagi agi ni gasi na daŋ may.

² Gologi tagi jivi ko suu li dla cora, digini asina, ni suu caw ɗiwra bay gasira.

³ Aygi ni suu tak gasira vi caw ɗiwra, ni ka asiɗi, aygi ni suu sun Lona u Musuk mamba, aygi col gasi maygira ni hu Yesu Kristu, aygi tin huruygi ni ka kay dlara vi sa warnaɗi.

⁴ An lay ni a tin hurun kay dlara suuna laɗ ndaɗta lay, lini sana saa gasi kay dlara suuna laɗta ni an waɗni su saa mamba.

⁵ An caw ɗiwin ay ni hu li ma an vuɗ li buuna kalavandi, an ni sa ma Israel ma vuɗina, u deera vi Benjamin, an ni sa Hebrena ma gasina, a li u gaɗta vi suu Juifna an ni Farisenna.

⁶ An ni sa ma las suu vi Kristuna, kay a hal a mbuɗ ɗegee u humba hum u gaɗtara, ni sa fan va ma co ka egenɗi.

⁷ An gol ay jewni ko an fi va hu fii na, cecemi wanda kay Yesu Kristu ni an ba va ki ni baay na ɗow.

⁸ Cecemi an gol tle asina halaŋ ko tlesuu ba kina na, kay wira wi Yesu Kristu Bu Suuna manna, ndaɗta ni mayra ŋgolla, kam nammi an vi dla mayra ba tle asina kira kanu, an gol tle asina halaŋŋ ko tlesuu tokosi kina ɦawa na kay an a fi Kristu.

⁹ A li ɗegee taɓi u namba wanni ka dlaanda an hum jivi u gaɗtaraɗi, ni u vira hu Kristu an mbuɗ ɗegee ni na, dla mayra mbuɗ sana ki ɗegeera mbay ni vi Lona, kay Lona haɗ ni maŋ suu vina.

¹⁰ Va ma an saaramma ni kay a wi Kristu, u saɓakŋa vi paɗ mamba kolora, a taɓ hu wihaw mamba, mbuɗ ki ko nam na may hu miɗ mamma.

¹¹ Kay ndaɗta an juɓ a an paɗ ki kolo hu miɗna iiri ko nam na may.

Ŋgaras iriŋ kay va ma aŋ liŋ kamma

¹² Va ma an liŋ umma an ka bay fam kon tuwa, an ni bay mbuɗ ki pasiyak tuwa, an tuɗ fokŋi tuɗi na ɗow ɗow kay a fi warak ma an liŋ kamma, ni Yesu Kristu van wa.

¹³ Ka naɗi, gorsenna an ka bay fi warak ma an liŋ kamma tuwa, va ma an lam dewna ni an maa humun ki kay tlesuu ŋgoron daganna halaŋ, ɓaɗ tan kay fi va ma fokonna.

¹⁴ An liŋŋi irin ŋgarasi kay va ma an liŋ kamma, a fi warak ma Lona yay ay kam hu Yesu Kristu ha kolona.

¹⁵ Aygi suu ki ŋgolo hu vira saa maygira mba li taɓi na dew, lini suu ɦiw dukugi saa masira ka zeɗ zeɗ ni Lona hin takagi ii boy namma kiyo.

¹⁶ Lini nanagelay tuɗuygi fok hu voɗta aygi tlaɗ ay gak gak karamba.

¹⁷ Gorsenna lagi ko an na halaŋ, ami takagi voɗta wa, gologi irigi kay asi suu ka tuɗ hu voɗta ndaɗta.

¹⁸ An dagi jew tew tew, cecemi olo hoŋ dagi u simina irinu, suu poy masira ka li babalira u miɗna vi Kristu hu gu garakŋa ka ŋgolo.

¹⁹ Daɓ masira ni ɓalakka, loosina ni ɦayasi gaw, asi ŋga tasi ni kay dlara zolona, saa masira ni kay tlena vi duliyara.

²⁰ Kami ami ni liimina ha koloo, ha hu ni ami juɓmi Sa Suɗta Bu Suuna Yesu Kristu dew.

²¹ Nam hin mbuɗuygi mbalataygira maŋira hu ndaŋgara ki zeɗ, mbuɗuygi ko mbalatamba bibiŋilla na a li u saɓak ma ɦamma ana tlena halaŋ hum umuna.