FILIPINA 1 - Boy Lonana

Gi deɓpa

¹ Ni an Pol u Timote suu sunda vi Yesu Kristu. Magi agi suu vi Lonna halaŋ, suu vi u Yesu Kristu suu ka hu Filipina halaŋ, suu ka gol suu vi Lona u suu ka sunusina.

² Ko Lona Buya u Bu Suuna Yesu Kristu ɦagi oora u heɓpa.

Pol cen Lona kay suu vina hu Filipi

³ An cen Lona kagi tew tew hu li ma humun gan kagina.

⁴ Tew tew hu li ma an cen kagina ni an cenni u furira.

⁵ Kay njunda agi njun ay un a mbee Boy ma Ayra kina ay hu buu ma jewna day gak gak karami.

⁶ An wi kan jivi ana Lona ma gijaŋ sunda jivira ay u agi dayna, hin tuɗ fok u agi gak gak a daɓaɗ ki hu buu ma vi Yesu Kristuna.

⁷ Ko wani na ni jiviya an ka saa kagi halaŋ kay an yowogi hurunu a agi mba fi va ma Lona ɦanna na, lini an ka hu daŋgayna cecemi lay ni an li ay ki ɦawara lay, ni kay a doo kay Boy ma Ayra, colom ki u voɗom ɗegee.

⁸ Lona wi ana an di ana an minigi halaŋ ni gasi u minda ŋgolla vi Yesu Kristu.

⁹ Gologi cenda an ka cen Lona kagira an joɓom ana min magira wul fok wuli na ɗow ɗow, a ndaɗ mba mbuɗ saɓak u wira u humba jivira lay.

¹⁰ Kay agi mbuɗ ndaki a man dlara jivira, agi hin mbuɗ a suu teteɗna a sa ndak a fi va ma co egegi hu buu ma vi Kristunaɗi.

¹¹ Iiri magira hin hoɓi u sunda ɗegeera ta Yesu Kristu laɗta, sun ndaɗta li u ŋgolla u geleɗta vi Lonara.

Kristu ni iirira

¹² Gorsenna agi wi ki ana dlara mba egen wanda ni mbuɗ jivi kay a zul Boy ma Ayra kiyo.

¹³ Ni kay ndaɗta suu gol vun zina vi mulna u suu daŋŋa halaŋ wi ana an hu daŋgayna ni kay an sun Kristu.

¹⁴ Gorseygi suu daŋŋa wan hu daŋgayna na ni vi hurusi coco kay Bu Suuna mbuɗ tuɗ fok a di Boy Lonana bay ndaana suwa.

¹⁵ U saa manda ni suu daŋŋa dukusi ɦiw di boyna vi Kristu ni u honira ɦawaa u saara jerekekŋa, suu daŋŋa ɦiw di boyna jivi may.

¹⁶ Suu asina lini u minda kay asi wi anaba Lona ɦan sunda di Boy ma Ayra ni namu.

¹⁷ Suu daŋŋa di kay Kristu ni ka u gasiraɗi, dini u huu ma cona, a las manda hu daŋgayna tuɗ fok tuɗi na ɗow.

¹⁸ Ni va ma ŋgol ka huɗi. Lini boy ma dam kay Kristuna ni co lay, lini gasi lay, lini nanagelay ni Kristu di ki wa, an li furira ŋgolo, ha fokka lay ni an hin furi olo.

¹⁹ An wi ana dla ndaɗta li na ni kay suɗ manda, jivira kay cen magira u saɓak njunda vi Musuk Yesu Kristura.

²⁰ Cecemi an vi kan a juɓum u furira, an ka fi dlara an a mbuɗ zolo kaɗi, gak gak karami an ka juɓummi juɓi naɗow ni an tak ki kay ŋgolla vi kristura eg tanu lini a kak iiri lay lini a miɗ miɗi lay.

²¹ Kan an a kak iirira ni Kristu, miɗna ni va an famma.

²² Lini an ka iiri tu gak gaki ni an ndak a li sunda jivira, an wi va ma an a manamma ka tuɗi.

²³ An gol tan ko irin ɓorowi duk mba' na, an saa kay a hin iirira wanda kay a tuɗ kak eg Kristu ni mayra an hin miniɗta.

²⁴ Vama ŋgolna an min a kak iiri ni kagi agiya.

²⁵ An wi ki gasi na ni an hin kaka, an wi ana an hin kak u agi kay a njunugi foko a li furira hu vira.

²⁶ Lini an tuɗ ha varagi wa olo ni, kan anu furi magira hin tuɗ fok suwa, hu viigira hu Yesu Kristu.

²⁷ Va ma ŋgolna ni poyogi jivi taɓi u Boy ma Ayra vi Kristu, an hin tuɗ ha gologi wanni hin wi ana, lini an ka dukugiɗi lay ni agi laki saɓaki, saa magira taɓi a duu u hurugi taɓi dew hu vira agi faɗ hu Boy ma Ayra.

²⁸ Hin tagi a mbuɗ ndaa ko suu magi suu babaliraɗi, ni va ma tak ana asi tuɗ ni a ba kira, takagi ni ana agi ka hu voɗta suɗta, dla ndaɗta mbay ni ko Lona.

²⁹ Lona ɦagi oora ana agi suu sunda vi Kristuna ka kay vira vi umba holɗi ni kay agi mba fi lassa um lay.

³⁰ Cecemi agi taɓagi u anu duurugiya, duu namma ni ko agi wi asi van jewra na, ni agi wi ki lay ana hin van olo.