FILEMONDA 1 - Boy Lonana

Gi deɓpa

¹ Ni an Pol, sa ma daŋgayna kay Yesu Kristuna u wayaygina Timote. Ami ɓii wanni maŋ Filemon, banamina u ndarami ma sunda.

² U suu vina suu tok varaŋŋa, maŋ wayaygira Appia maŋ Arsip lay, ndaraygi ma duuna.

³ Ko Lona Buya u Bu Suuna Yesu Kristu ɦagi oora u heɓpa.

Minda u vira vi Filemon

⁴ Filemon tew tew hu li ma an cenna ni an ka saa kaŋu, an gi deɓ Loonna.

⁵ An hum kay minda aŋ min suu vina vi Lona halaŋga, u huu ma aŋ tinim kay Bu Suuna Yesuna.

⁶ An cen Lona kaŋu kay taɓpa njunuŋ egemira, hu tin huu ma tak wira jivira halaŋ ta ay faygi iirira hu Yesu Kristura jivi suwa.

⁷ Wayanna min maŋga ɦan so huna u furira ŋgolo kay mege, aŋ heɓ huu suu vina vi Lona.

Pol joɓ kay Onesim

⁸ Kay ndaɗta an fi buɗta hu Kristu a daŋ va aŋ lamma.

⁹ An min joɓoŋ u minda an ka hura, ni an Pol, sa ma maana, cecemi ni sa daŋgayna kay Yesu Kristu olo.

¹⁰ An joɓoŋŋi kay Onesim, nam mbuɗ ni goronna hu Kristu, hu daŋgayna tani.

¹¹ Nam li ay jew ni dlaamba ka jivi kaŋgi, cecemi nam mbuɗ jivi kaŋu, jivi kan lay.

¹² An sunum ha egeŋ cecemi wanni, nammi ko an na may.

¹³ An min gin a hinim egen tani hu li ma an ka hu daŋgayna kay Boy ma Ayra, kay nam mba njun un u sunda ka balamaŋu.

¹⁴ An ka li va bay waŋ min maŋga gawɗi, an ka ɦeɓeŋ kay lan jivira ɦeɓiɗi. An min ana aŋ li ay u min maŋga.

¹⁵ Onesim garak ay u aŋŋi kay buu njok, aŋ hoŋ vammi a fafatɗa.

¹⁶ Nam cecemi ka mbaɓuna ɦawaɗi, nam mbuɗ ni su sa ma mbaɓuna, ni wayay ma gasina. Nam jivi coco kanu, jivi saɓaki coco ni kaŋ aŋu, ko mbaɓuna na ko wayaŋŋa hu Bu Suuna na lay.

¹⁷ Aŋ li wan ko wayaŋŋa hu vira na ni taɓ u namu, ko aŋ taɓ u anda na may.

¹⁸ Lini nam laŋ dla co ay egeŋ a warakaŋ waraki lay ni aŋ tinin dla ndaɗta ni kanu.

¹⁹ An ɓiiriŋ boy namma ha ni u kon tanda Pol, an hin warakaŋu. An ka min gin a gaŋ humuŋ a aŋ ɦan ki gini iiri maŋgaraɗi.

²⁰ Ni na wayanna, an ceneŋu, vi boy namma kay minda vi Bu Suuna, heɓen hurun ko wayana hu Kristu na.

²¹ Hu li ma an ɓiiriŋ hana wanni an wi ki kan gasi ana aŋ hin li va ma an joɓoŋ kamma. An wi ana aŋ hin lini su olo.

²² Ni aŋ minin li ma buuna haa, an saa ana Lona hoŋ dira kay cen magira a ɦan voɗta kay tuɗ ha egegira.

Gi deɓpa daɓ daganda

²³ Epafras ma ka hu daŋgayna kay Yesu Kristu u an na gaŋ deɓpa.

²⁴ Mark, Aristark, Demas u Luk ndarayan suu li sunda u anna gaŋ deɓ lay.

²⁵ Ko oora vi Bu Suuna Yesu Kristu kak u agiya.