EZEKIYEL 3 - Boy Lonana

¹ Nam dan ana, «Goŋ sanna, tiya, ti magaara ɗuɗi ndaɗta. Ŋgoo dagan aŋ tuɗ di ki maŋ suu Israelna.»

² An mal vunun kiyo, nam ɦan magaara ɗuɗi ndaɗta. An taɗu.

³ Nam dan ana, «Goŋ sanna, hoɓ hayaŋ ki u magaara ɗuɗi ndaɗta an ɦaŋga wandara.» An hin taɗ may. Ndaɗ fununni jeɓeɗta ko ndal mbul yumma na.

⁴ Nam dan ana, «Goŋ sanna, tuɗa, tuɗ eg suu Israelna, tuɗ ɓakasi boy manna.

⁵ An sunuŋŋi ka eg suu vun masina loɓ cocoɗi, ka eg vun ma daŋgi lay, ni eg suu Israelna,

⁶ ka eg suu zuli coco suu vunusi hum loɓ coconaɗi, ka vun ma um kaɗi ma aŋ ka hum dlara asi daɗtaɗinaɗi, ɗoliɗi ni lini an sunuŋŋi eg suu ko asina nana ni asi ndak a humuŋ ɗow.

⁷ Suu Israelna ka hin humuŋgi, kay asi ka min a hum unɗira. Kay suu Israelna halaŋŋi yasi eŋ cocoo, hurusi sooy ɦay lay.

⁸ Gola an mbuɗuŋ yaŋ ki eŋga ko yasi na may, Sooŋ huruŋ ki ko masina na may.

⁹ An mbuɗuŋ huruŋ ki eŋga ko ndal kawina na, ki eŋ su gogoyra lay. Kay ndaɗta aŋ li ndaa ko suu asinaɗi, mbuɗ huruŋ ndaa ko dlaasiraɗi kay asi ni suu gonokka.»

¹⁰ Nam dan ana, «Goŋ sanna, vi boy namma huruŋu, hum u humuŋ may, hum dlara an daŋgara halaŋ.

¹¹ Tuɗ eg suu yowosi ay ki balnana eg goryoŋ suu maŋsinana. Aŋ tuɗ dasiya lini asi hum lay, humbi lay. Aŋ dasi ana Bu Suuna, Yawe, ɓak ay na.»

¹² Ŋgoo dagan Musuk Lonara tlan kiyo. An hum della ay ŋgoron dagan u kokona ana, «Gi deɓpa maŋ Yawe hu li ma nam tak tam ki u bibiŋil mambana.»

¹³ Garaŋ tlesuu iirina ŋgaf tasi na ni soo cocoo, sem pupusna soo may, suuna ko kosi ay u soora ŋgoo dagan hu may.

¹⁴ Musuk Lonara tlan ki koloo. An mbuɗ ki ya cocoo, kay ko Yawe ɦegi kan eŋ cocoo.

¹⁵ An mba ki duk suu yowosi ay ki balnana hu mbassa Tel-Abibpa, ni vi suu cuki fun mbo lum ma Kebarna kay asi cuki ni huwa. An li buuna dukusi kiɗisiya ni ka njaɗɗi lay, ki viɗira na viɗ.

Ezekiyel mbuɗ ni sa ma jok vun Lona ka kaki juɓ u suu Israelna

¹⁶ Hu buu ma kiɗisiyana wanni, Yawe mbay egen dan ana,

¹⁷ «Goŋ sanna, an tiniŋŋi a sa ma juɓ u suu Israelna. Hu li ma aŋ hum boy ma kal ay ki funun wa ni aŋ mba dasina kiyo.

¹⁸ Lini an di sa ma cona wa ana aŋ hin miɗ kiyo, lini aŋ tuɗ di sa namma ka kiɗi, lini aŋ di sa ma co namma ka ki a nam hin jok poy mamba cora ki zeɗɗi, a nam hin kak iiri mayraɗi ni, kay dla coom ndaɗta may ni nam hin miɗa. Na may busu sa namma an hin joɓommi kaŋu.

¹⁹ May lini aŋ ne sa ma cona ki wa kay dla coomba, nam li ka jok poy mamba co ndaɗtaɗi, ni nam hin miɗ kay coom ndaɗta, aŋ may ni hin kak iiriya.

²⁰ Lini sa ma ɗegeena hin ɗegee mamba ki li dla cora, sa namma an hin gam ki kaŋgaa, nam hin miɗ kiyo, ni kayra aŋ neem yam kaɗira, ɗegee mamba nam laɗ ay ki fok jewra sa ka ndumuɗ oloɗi. Na may an hin joɓ busu sa namma ni koŋu.

²¹ Na may lini aŋ ne yam sa ma ɗegeena ana nam li coraɗi, gasi may ni nam hin kak iiriya, ka li cora oloɗi kay aŋ neem ki wa. Aŋ may ni suɗ iiri maŋga wa may.»

Lona ana Ezekiyel seŋ tam na en ɓak boy tuɗi lay

²² Hu Tel Abib ni saɓak ma vi Yawena mbay kanu dan ana, «Col koloo, tuɗ ha ki ga hu ɦuɗugumba tana an min a daŋ boyo.»

²³ An col koloo kal ki tuɗ ha ki hu ɦuɗugumba, gola ni bibiŋilla vi Yawe ka ki hu li namma ko ndal bibiŋilla an waɗ ay fun mbo lum ma Kebarna na olo, an kuluɓ kaŋga u vun dikinu.

²⁴ Musukka kal hurunu. Ndaɗ colon ki koloo. Ndaɗ ɓakanu dan ana, «Dug taŋ kalafi hu ziiŋga.

²⁵ Hum haa, goŋ sanna, suuna hin njunuŋ u zewna. Asi hin waɗaŋ lay. Aŋ ka hin a kal ay ki dukusi oloɗi.

²⁶ An hin nereɗeŋ siniŋ ha ki koloo u yirɗiŋ na faat. Aŋ hin mbuɗ ki ndumu wa. Aŋ ka hin li a sa ma gasi u coosira kina oloɗi kay asi ni suu gonokka.

²⁷ Na may lini an hin daŋu ni, an hin malaŋ funuŋ kiyo, aŋ hin dasi ana gola Bu Suuna Yawe di ay na, sa ma min a humma, hum may, ma ka min a humbina, humbi may, kay asi ni suu gonokka.