EZDRAS 9 - Boy Lonana

Suu Juifna bolowra ɗum gorɓii suu koyogina

¹ Dla ndaɗta daɓ ki daɓmi, mulina ɦuɗ tasi ay egen dan ana, «Suu Israelna, muli suu li ɓivunna u suu Levina ɓorow dukusi ka ki u suu hu mbassanaɗi. Asi taɓ tasi ki u dla cora vi suu asinara. Dla cora vi suu Kanaanna vi suu Hetna, suu Perizna, suu Jebusna, suu Amonna, suu Moabma, suu Egiptena, suu Amorna.

² Asi u goryosi ɗum gorɓiina, njaf suu teteɗna tlum tasi ki duk suu hu mbassana. Mulina u suu kaɓakŋa ni suu kal tasi hu dlara njenje ndaɗta jewna.»

³ Hu li ma an hum dla ndaɗta na ni an haa baraw manna kiyo, koɓoɗ manda ki lay. An nja tlimiɗ yan ki may, nja njeera fununda ki may, an kak kaŋga ki loɓiya.

⁴ Suu li ndaana dlak ko boyna vi Lo ma vi suu Israelna na halaŋ tok ay egen kay dla cora vi suu yowosi ay mbaɓurana, an tanda hin kaki kaŋga ki loɓi ta ta ɦalla ɦawara fiɗigira.

Ezdras cen kay suu li dla corana

⁵ Hu li ma a li ɓivun ma fiɗigina ni an kal ay ki hu liin ma hahawra baraw manna lay koɓoɗ manda lay ki hariya. An goɓ kaŋga u vok givinu. An baa kon maŋ Yawe, Loonna.

⁶ Dam ana, «Loonna, an zolona can cocoo, an li dlara zolona ka tli irin kolo egeŋgi, Loonna, kay dla coomira zul kami ŋgolla. Suluk mamina wul ta ta tew huulona wa.

⁷ Col ay hu buu ma vi somoyomina day ta ta karammi suluk mamina ŋgolla ɦay, kay suluk mamina, ami lay, muli mamisina lay, suu mami suu li ɓivunna lay ɦami ki maŋ mul ma kay ndaŋgarana, maŋ ŋgewna, maŋ suuna a yowomi ki mborɓogina, maŋ suuna ɦurumumi tlegeyemiya, hinimi zolona cami ko karamba na.

⁸ Cecem wanda lina jakki tani nde ni heɓpa vi Yawe, Loominara, hinimi umi taa suɗ nde, ɦami lina ka hu liim ma teteɗna, na ɗaŋŋi, Loomina, malami irimi kiyo, ɦami iirira ay hu liimi ma mbaɓura.

⁹ Kay ana ami ni ŋgayagina, may ay hu mbaɓu mamira, Loomina, noyomi ka kiɗi. Fun tami u mul ma Persna, nam saa kami u ɗegee mamba a ɦami iirira a hoŋ Ziŋ Loominara balamaɗ minda, hoŋoɗ tlegeyeɗ suu ɓeŋ kina balamasiya, a ɦami li ma ŋgayra hu Yuda u Yerusalem.

¹⁰ Cecem wanda, Loomina, va ma hin dam ŋgoo daganna ni me ologe? Kay ana ami noyoŋ gaɗ maŋga kiyo.

¹¹ Fun suu maŋ suu sunda suu jok vun Lona aŋ ɓii gaɗta ni ko wanda na, ndaŋgara agi hin kal huruɗ a tlaɗ wanda ki njenjee, njenje ko suu hu mbassana u dla coosira asi oyoɗ ki col ha ii ko wanna day tew ki ko hiŋŋa u dla coosira.

¹² Cecem wanda agi ɦasi gorɓii magisina maŋ goryosi oloɗi, agi ɗumusi gorɓii masisina maŋ goryogi oloɗi, halagi a fasi jivi masira u heɓ masiraɗi, a agi mbuɗ ki saɓakŋa, tagi begera hu mbassara, hinisi asi yowogi goryogi a fafaɗta.

¹³ Doli ɗini ŋgoo dagan dlara li egemira halaŋ kay coomirara, dla coomira ŋgolla, ko aŋ taŋga, Loomina, lay ni hinimi coomi taa ki keŋ ɦiw, hinimi umira hin wanda.

¹⁴ Na ni ami hin ndak a ɓeŋeŋ gaɗ maŋga ki olo, hoŋ a ɗum suu dlasi co asina olo su? Na ni aŋ hin ka mbuɗ yara egemi ta ta cami ka hinimi umiɗi su?

¹⁵ Yawe, Lona vi suu Israelna, aŋ ɗegee, hu buu ma karamma gaw, ami fi dla cora gasi ni ko ndal suu usi hinna na. Gola ami fokoŋ u suluk mamina wanna, ko ndaɗta na ni sa ka ndak a col fokoŋgi.»