EZDRAS 8 - Boy Lonana

Suu tuɗ u Ezdras tinimma

¹ Gola ni sem somoyoŋ suu ŋgolo suu malayaŋ zina suu tuɗ ay u an hu li ma Artazerzes a mulnana.

² Goryoŋ Pinhasna ni Gersom, goryoŋ Itamarna ni Danyel, goryoŋ Davidna ni Hatus,

³ Goryoŋ Sekaniyana, goryoŋ Parosna ni Zakari ma ndumum suuna um na kis duk dok-vadlna.

⁴ Goryoŋ Pahat-Moabma ni Elehoenay ma goŋ Zeraya ma suuna um kis kis mbana.

⁵ Goryoŋ Sekaniya ma goŋ Yaziyelna suuna um kis kis hindi.

⁶ Goryoŋ Adinna ni Ebed ma goŋ Yonatanna suuna um dok-vadl.

⁷ Goryoŋ Elamma ni Yesaya ma goŋ Ataliyana suuna um dok-kiɗisiya.

⁸ Goryoŋ Sefatiyana ni Zebadiya ma goŋ Mikaelna suuna um dok-kalavandi.

⁹ Goryoŋ Yoabna ni Onadiya ma goŋ Yehiyelna suuna um 218.

¹⁰ Goryoŋ Selomit ma goŋ Yosifiyana suuna um kis duk dok-karkiya.

¹¹ Goryoŋ Bebayna ni Zakari ma goŋ Bebayna suuna um dok-mba' yam kalavandi.

¹² Goryoŋ Azgadna ni Yohanan ma goŋ Hakatanna suuna um kis duk doogo.

¹³ Goryoŋ Adonikam suu daganna sesi wanni, Elifelet, Yeyel u Semaya suuna usi dok-karkiya.

¹⁴ Goryoŋ Bigwayna ni Utay u Zakur suuna usi dok-kiɗisiya.

Min tara kay koyra tuɗuɗ Yerusalemba

¹⁵ An tokosi fun lum ma Ahawana na tok. Ami hin lak hu buuna hindi. An ndum suuna ki na lam lam muli suu li ɓivunna lay may an fi goryoŋ Levina sa ka duk dewɗi.

¹⁶ Na ɗaŋŋi an hin sun mulina ugi Eliyezer, Ariyel, Semaya, Elnatan u Yarib, Elnatan, Natan, Zakari, Mesulam u suu haɗ suuna gi Yoyarib u Elnatan.

¹⁷ Ҥasi voɗta ha ana asi tuɗ eg Ido, mul ma vi suu vi Kasifyana. An hinisi vun sunda ha funusi a daɗ maŋ Ido u gorsemma maŋ suu sunda hu li ma vi Kasifyana a asi mbaami suuna ay a li sun Ziŋ Looyginara.

¹⁸ Ko Looygina ma jivina ka kaygi may ni, asi mbaami sa wi yalna ay duk goryoŋ Malina, goŋ Levina, goŋ Israelna ni Serebiya, goryom u gorsemma ni doogo yam kalavandi.

¹⁹ Hasabiya vi Yesaya duk goryoŋ Merarina ay umu, gorsemma u goryosi halaŋŋi dok-mba'.

²⁰ Duk suu li sun suu David u mulina ɦasi a li sunda fok suu wi dlara ni 220, sesi ki kaŋga ɓiiri bel bel.

²¹ An ɓak suuna fun lum ma Ahawana ana lami laara a mbuɗumi tami hahawra fok Looygina a hal heɓpa tuɗ bay loɓmara, aygi u goryoygiya u tlegeyeygi lay.

²² Kay an li zolona joɓ mulna ka nam ɦaygi suu kulumina doo suu bablira ki kaygi hu voɗtaraɗi, gasi daŋ may aygi di mulna ana, «Ko Lona ma jivina ka kay suu halamma halaŋ may, yaamba ŋgol coco kay suu noyom kina.»

²³ Ami li laara ɗaŋŋi joɓ heɓpa ko Loomina. Nam hin humumiya.

²⁴ Olo an hin yow muli suu vi suu li ɓivunnana ki kay tasi na doogo yam mba', Serebiya, Hasabiya, gorsesi suu doogo u asiya.

²⁵ An hin ɦasi doonora, lorra u tlesuu yowosi ki kay sun Ziŋ Looyginara suu mulna u suu mam suu ɦal gaɗta, muli mamsina u suu Israel suu ka na halaŋ ɦasi ayna.

²⁶ An ŋgaasi doonora ha kosi ni kelew 20.000, tlesuu mini u doonora kelew 3.000, lorra kelew 3.000 may,

²⁷ koɓma u lorrana dok-mba', ma gus gursu lorra buɓ may, tlesuu yoori u walakka weleɗ ɦayra mba' suu jivi coco ko lorra nana.

²⁸ An hin dasi olo ana, «Agi ki ni hini maŋ Yawe, tlesuu yoori u doonora, u lorrana ki ni hini maŋ Yawe. Asi ni ɦalla ɦawara maŋ Yawe, Lo ma vi Somoyogina.

²⁹ Gologisina jiviya ta ta agi hin ŋgaagisina ki fok muli suu vi suu li ɓivunnana, suu wi dlara, malayaŋ zi suu Israel suu hu Yerusalem hu Ziŋ Yawera.»

³⁰ Na ɗaŋŋi suu li ɓivunna u suu Levina yow tle asina kosiya, doonora, lorra u tlesuu ŋgaasi a yowosi ha ki Yerusalem hu Ziŋ Looyginara.

Koyra u tewra tew ki Yerusalemba

³¹ Ami col ha ki fun lum ma Ahawana ni hu buu ma doogo yam mbana hu til ma jewna a tuɗ Yerusalemba. Looygina kom ma jivina ay kaygi hu voɗta. Nam ɓaɗami ay ki ko babali maygina ko suu ɦurum tlesuu dleɓ tasi kaŋgana.

³² Ami tew ki Yerusalem, koɗ tami buuna hindi.

³³ Hu buu ma fiɗina ami tli nek doonora, lorra u tlesuu hu Ziŋ Looyginara ko mul ma li ɓivunna, Meremot, ma goŋ Uriya Eleazar ma goŋ Pinhasna ay usi may, suu wi dlara Yozabad ma goŋ Yesua u Noadiya ma goŋ Benuyna.

³⁴ Ndumusi u nekesi halaŋ ay ni tliya nekesi halaŋ ay ki kaŋga ɓiiriya. Hu coki ndaɗta ni

³⁵ suu hoŋ ay hu li ma mbaɓura, suu yowosi ay mbaɓurana li ɓivun ma ŋgalam ki ŋgalina maŋ Lo ma vi suu Israelna u bolo mbutlina doogo yam mba' kay suu Israelna halaŋ, gamlagina dok-dleeŋe yam karkiya, gor timigiina dok-kiɗisiya yam kiɗisiya, ŋgekgina doogo yam mba' kay sulukŋa, halaŋŋi kay ɓivun ma ŋgalam ki ŋgali maŋ Yawena.

³⁶ Olo asi hin sun magaara mulna ɓiiriɗ ayra maŋ suu fun mulnana u muli suu ŋgolo suu keŋ lum ma Efratna u fiɗigina suu njun suuna, njun kay sun Ziŋ Lonarana.