EZDRAS 7 - Boy Lonana

Sa wi magaara Ezdras

¹ Ŋgoo dagan dla ndaɗta hu li ma Artazerzes, mul ma Persna, ti mullana, Ezdras ma goŋ Serayana, ma goŋ Azaryana, ma goŋ Hilkiyana,

² goŋ Salumma, goŋ Sadokŋa, goŋ Ahitubma,

³ goŋ Amariyana, goŋ Azaryana, goŋ Merayotna,

⁴ goŋ Zerana, goŋ Uzina, goŋ Bukina,

⁵ goŋ Abisuana, goŋ Pinhasna, goŋ Elazarna, goŋ Aaron mul ŋgol ma li ɓivunna.

⁶ Ezdras namma col ay ni hu Babilon. Nammi sa wi magaara ma ɦal tam ki kay gaɗta vi Moiz ta Yawe ɦaɗ ayra, Lo ma vi suu Israelna. Mulna ɦam tlesuu nam joɓosina halaŋ kay ana ko Yawe, Loomma ka kamu.

⁷ Duk goryoŋ Israelna, duk suu li ɓivunna, suu Levina, suu gi soolla, suu kak fun zira, suu li sunda, suu ɦiw tuɗ Yerusalem, hu basara kiɗisiyara vi Artazerzes ta mulla.

⁸ Nam tew ki hu Yerusalemmi hu til ma vadlna ɗaŋ. Ni hu basara kiɗisiyara vi mulna.

⁹ Gasi daŋ may hu buu ma jewna hu til ma jewna nam tamba tuɗ koyra ay hu Babilon day. Hu buu ma jewna hu til ma vadlna nam tew ki hu Yerusalem kay ana ko Lona ma jivina ka kamu.

¹⁰ Ezdras gasi daŋ may ni ɦal hurummi a hal gaɗta vi Yawera, a takaɗ ki kiɗik, li uɗ may, a haɗ gaɗta u dlara jewra vi suu Israelnara.

Sunda Artazerzes ɦaɗ maŋ Ezdrasa

¹¹ Gola ni magaara mulna Artazerzes ɦaɗ maŋ mul ma li ɓivunna, Ezdras, sa wi magaara boy Lonana, Yawe ɦaɗ ay u gaɗ mamba kay suu Israelnara.

¹² «Artazerzes, mulna vi mulina, maŋ mul ma li ɓivunna, Ezdras, ma wi gaɗta vi Lo ma kolo huulona ko heɓpa li u agiya.

¹³ Gola ni gaɗta an ɦaɗta, hu mul manda gegelay duk suu Israelna suu mam suu li ɓivunna, suu mam suu Levina ɦal tam u hurum a tuɗ Yerusalemma ko nam tuɗ u aŋu.

¹⁴ Gasi daŋ may mulna sunuŋ ay ni namu. Suu kiɗisiya suu ɦal gaɗta lay a joɓ u dlara kay Yuda u Yerusalem u gaɗta vi Looŋŋa ta ka koŋga.

¹⁵ Olo a yow gursuna u lorra suu mulna ɦasi ɦalla ɦawara u suu mam suu ɦal gaɗta maŋ Lo ma vi suu Israel ma ziim ha hu Yerusalemma.

¹⁶ Ko ndaɗta na doonora u lorra aŋ hin fasi ay hu ɦoŋzi ma bagi ma hu Yerusalemma u tlesuu suuna ɦasi ɦalla ɦawarana ko suu li ɓivunna u suuna yowosi mbasi ay hu Ziŋ Lonara Yerusalem.

¹⁷ A jivira ni aŋ hin hal yal ma gus bolo mbutlina, gamlagina, gor timigiina u tlesuu hin halasi a ɦalla ɦawarana u ɓivun ma ŋgalam ki ŋgalina, aŋ hin tuɗusi ha hu givin ma togolla hu Ziŋ Looginara hu Yerusalem.

¹⁸ Va ma jivi ma a lam u saa maŋga may, ta vi gorseŋŋara may, u gursu ma hinna may, lorra hinda agi hin lagisina ni u minda vi Looginara.

¹⁹ Tlesuu hin ɦaŋsina a li sun Ziŋ Lonara aŋ hin cukusi fok Lo ma Yerusalemma.

²⁰ U tlesuu hin a halasi kay Ziŋ Lonara dla ndaɗta ni kaŋ a aŋ laɗta, aŋ hin tiniɗ ki eg liiɗ ko sa gol tlena vi mulnana.

²¹ An mulna, Artazerzes, ɦal voɗta maŋ suu gol tlena hu keŋ lum ma Efratna u fiɗigina halaŋ a li dlara mul ma li ɓivunna, Ezdras, hin joɓosi kaɗta, sa wi magaara gaɗta vi Lo ma kolo huulonana,

²² Ta ta ŋga doonora kelew 3.000, wa blena kelew 30.000, sum veŋŋa litir 4000, mbulna litir 4000, vuvuna may ka wasi ndumusiɗi.

²³ Tlesuu Lo ma kolo huulonana ɦal voɗta kasina halaŋ ko asi lasi u ɗegeera kay Ziŋ Lo ma kolo huulonana, kay yaamba col ay kolo kay mulla vi mulina u goryommaɗi.

²⁴ Olo, ami takagi dlara agi wi ki ana sa dew lay duk suu li ɓivunna, duk suu Levina, duk suu gi soolla, duk suu kak fun zira, suu li sunda u suu sunda hu Ziŋ Lona ndaɗtana ka vasi taara u lempora kosiɗi, warak ma kay voɗtanaɗi lay.

²⁵ Kaŋ aŋ Ezdras may ni u yal ma vi Looŋŋa ma ka koŋŋa aŋ tin suu kaɓakŋa u suu gi ii dlara maŋ suu keŋ lum ma Efratna u fiɗigina halaŋ, maŋ suu wi gaɗta vi Looŋŋara, agi hin haɗaɗ ki maŋ suu ka waɗɗina lay.

²⁶ Gegelay ma li ka u gaɗta vi Looŋŋaraɗi, li ka u gaɗta vi mulnara u voɗoɗɗina kaam ɓakŋa kamu, cam ki ɗowba, bulumum njafam ki ɗowba ŋgaam warakka kam ɗowba gam daŋgayna.»

²⁷ Gi deɓpa maŋ Yawe, Lona vi somoyoygiya, ma ɦal dlara jivira huu mulna a ŋga Ziŋ Yawera hu Yerusalemba.

²⁸ Tin irigi eg mulna eg suu ɦal gaɗta eg suu ŋgolo suu sun suu vi mulnana, u ɗegee mamba humum gam ay kanu, hurun ki sooy ɗaŋ kay ana ko Yawe, Loonna, ay ka kanu. An tok muli suu vi suu Israel suu ɦiw a tuɗ u anda.