EZDRAS 6 - Boy Lonana

Hoŋ dira vi mulna Dariyussa

¹ Na ɗaŋŋi mulna Dariyus ɦal voɗta ana hal u tlesuu basi suu ka ko sa ŋgayra cuki hu Babilonna.

² Hu li ma saɓak ma Ekbatanena hu ɦoŋzi ma bagi ma Medinaasi fi magaara ɗuɗi kay taɗ ɓiiri huruɗ ana, «Boy ma basina.

³ Hu basara jewra vi mulna Sirussa, mulna Sirus ɦal voɗta ana, Ziŋ Lonara hu Yerusalem. «Zira hin hoŋoɗ minda ni hu li ma suuna li ɓivunna huna, hu li ma uɗ kaŋga gii huna, fiyekeɗ ni metre dok-hindi, bubuuɗ ni metre dok-hindi.

⁴ Hin nja birikka u fiyekeɗ kay taɗ hindi hindi, hin nja gu ma wilina, bassa laɗta mulna warakaɗ ni namu.

⁵ Olo, asi hin yow tlesuu hu Ziŋ Lonara suu u lorra, suu doonora, suu Nabukodonosor yowosi ay ki hu Ziŋ Lona ta Yerusalemba tuɗusi ha ki Babilonna va maanagelay ni hin tuɗ ki hu liim hu Ziŋ Lona ta Yerusalemba. Aŋ hin cukusi hu Ziŋ Lonara.»

⁶ «Cecem wanda Tatnay, mul ŋgol ma keŋ lum ma Efratna u fiɗigina, Setar-Bosnay u ndarayasi suu Afarsak ta keŋ lum ma Efratna fiɗigina vagi tagi fun dla ndaɗtaɗi.

⁷ Hinigi sun Ziŋ Lona ndaɗta liya, mul ŋgol ma vi suu juifnana u suu basi suu juifna hin min zi ndaɗta hu li ma gaɗ uɗ huna.

⁸ Gola ni dlaanda an daɗ ha agi hin laɗ u suu basi suu juifna a min Ziŋ Lonara ni u begera vi mulnara u taara col ay hu ɦoŋzi ma keŋ lum ma Efratna u fiɗigina hin bas ki kay suu asina u voɗoɗu ka seŋ dukgi.

⁹ Tlesuu a li sunda jivina ni gor mbutlina, gamlagina, gor timigii suu li ɓivun ma ŋgalam ki ŋgalina u asi maŋ Lo ma kolo huulonana, wa blena, vuvuna, sum veŋŋa u mbulna u dlara muli suu li ɓivun suu Yerusalemma daɗta hin ɦasi ni buuna tew tew ni suu bay ŋgulla egesina,

¹⁰ a asi ɦal ɓivun ma taɓ dukka ay maŋ Lo ma kolo huulonana, a asi cen kay mulna u goryomu.

¹¹ Gola ni boy ma an dam kay gege ma calaɗ ki kay gaɗ ndaɗtana ko asi paɗ mbal gu ma hu ziimbana ki dew, ɓalam ki kolo fun u fiyekemu, olo ko asi mbuɗum ziim ki a didiŋga.

¹² Na ni Lona ma sem ka tii huna hin gi mul maanagelay, suu calaɗ kay gaɗtana halaŋ ki kaŋga su, hin maɗ kom ay a ɓeŋ zi ndaɗta vi Lonara hu Yerusalemba ki su. An, Dariyus, ɦal voɗta ana, ko dla ndaɗta li ni na gasi daŋ may.»

¹³ Na ɗaŋŋi mul ŋgol ma keŋ lum ma Efratna u fiɗiigina Tatnay, Setar-Bosnay u ndarayasina li dlara ni u gaɗta mulna Dariyus sunuɗ ayra.

Mal vun Ziŋ Lonara asi hoŋoɗ mindara

¹⁴ Suu basi suu juifna tuɗ fok u minda min zira u jivira ko boy ma vi sa jok vun Lona Age u sa jok vun Lona Zakari ma goŋ Idona damma na. Asi daɓ sun zira kiyo ko gaɗta vi Lo ma vi suu Israelna daɗta na, u gaɗta vi Sirussa, vi Dariyussa, vi Artazerzes, mul ma Persna na.

¹⁵ Asi daɓ sun zi ndaɗta ki ni hu buu ma hindina hu til ma yam ana Adarna, hu basara karkiyara vi Dariyus ta mulla.

¹⁶ Goryoŋ Israelna, suu li ɓivunna, suu Levina u suu yowosi ay mbaɓurana usira hinda li furira mal vun Ziŋ Lonara ɦay.

¹⁷ Asi ɦal tlena a li furira mal vun Ziŋ Lona ndaɗta, bolo mbutlina kis, gamlagina kis kis mba', gor timigiina kis kis fiɗi ni kay suluk ma vi suu Israelna halaŋ, ŋgekgina doogo yam mba' kay ndum njaf suu Israelna.

¹⁸ Asi tin suu li ɓivunna ni u basaɗasiya, suu Levina u deeresiya a li sunda maŋ Lona hu Yerusalem u gaɗta hu magaara vi Moizza.

Suu Juifna li luu ma Pakŋa

¹⁹ Suu yowosi ay mbaɓurana li luu ma Pakŋa ni hu buu ma doogo yam fiɗina hu til ma jewna.

²⁰ Ko ndal suu li ɓivunna ko tasi u suu Levina mbuɗ tasi ki teteɗ, asi halaŋ ki mbuɗi teteɗ. Asi hin ŋgaɗ gor timigiina a li luu ma Pakŋa maŋ suu yowosi ay mbaɓurana halaŋ, maŋ gorsesi suu li ɓivunna, maŋ tasira may.

²¹ Ko ndaɗta na ɗaŋŋi goryoŋ Israel suu yowosi ay ki mbaɓurana ti ko tasi u suu egesi suu bus dukusi ki u suu bay wi boy Lona tuna a hal Yawe, Lo ma vi suu Israelna.

²² Asi li luu ma ti fu ma bay kuffa dukumma u furira, buuna kiɗisiya kay ana Yawe oyosi hurusi u furira, mbuɗ huu mul ma Asirina egesi jivira a ɦasi saɓakŋa kosi kay sun Ziŋ Lonara, Lo ma vi suu Israelna.