EZDRAS 5 - Boy Lonana

Zorobabel u Josuwe hoŋ Ziŋ Yawera minda

¹ Hu li ma suu jok vun Lona Age u Zakari ma goŋ Idona ɓak boyna ki kay suu juif suu hu Yudana u suu hu Yerusalemma u sem Lo ma vi suu Israelna ma ka kasina,

² Zorobabel ma goŋ Salatiyelna u Josuwe ma goŋ Yosadakŋa col kolo gijaŋ min Ziŋ Lonara hu Yerusalem. Suu jok vun Lona u asi a njunusira.

³ Hu li namma ni sa ŋgol ma keŋ lum ma Efratna u fiɗigina, Tatnay, Setar-Bosnay u banayasina mbay egesi hin dasi ana, «Sa ɦagi voɗta a min zi ndaɗta, gulumun ma kaɗna u yaɗta kolora ni gege?

⁴ Na ɗaŋŋi ami hin dagi ana, suu min zi ndaɗtana sesi ni ana mege?»

⁵ Na may ni ii Loosina ka tinira kay suu basi suu juifna ni na ta. Asi hinisi ka a seŋ sunda dukgi ta ta raporra tew ha ki vi Dariyus hoŋ dira ay kay joɓ ndaɗta.

Gi u suu juifna ki maŋ mulna Dariyus

⁶ Magaara sunuɗ ha maŋ mulna Dariyus col ha ko mul ma ŋgol ma keŋ lum ma Efratna u fiɗigina Tatnay, Setar-Bosnay u ndarayam suu hu Afarsak ta keŋ lum ma Efratna u fiɗigina.

⁷ Asi sunum magaara ha nam hoŋ ɓiira ay hu ana, «Ko heɓpa li u mulna Dariyus.

⁸ Ko mulna wi ana ami tuɗ ay ki hu ɦoŋzi ma bagi ma Yudana hu Ziŋ Lo ma ŋgolnara. Asi miniɗ ni u gogoyra ceɗira, u guna cuki kaɗu. Sun ndaɗta laɗ ki jivi cocoo. Ndaɗ tuɗ kosi zak zak.

⁹ Na ɗaŋŋi ami joɓ suu basi masina hin dasi ana, sa ɦagi voɗta ana agi min zi ndaɗta gaɗ gulumunna kaɗna ni gege?

¹⁰ Olo ami hin joɓosi kay sesi a takaŋsina ki a aŋ ɓii sem suu fokosina ki kaŋga koŋga.

¹¹ Gola ni hoŋ dira mbayra, ami ni suu sunda vi Lo ma kolo huulonana, kaŋga kay ndaŋgarana. Ami hoŋ zira mul ma Israel maa dew miniɗ basara bolowra daɓaɗ sunuɗ ki layra kolo minda balamaɗu.

¹² Na may ni kay ana somoyomi ɓeŋ huu Lo ma kolo huulonana kiyo, nam ɦasi ki ko Nabukodonosor ma Kaldena, mul ma Babilonna. Nam ɓeŋ zi ndaɗta ki, yow suuna tuɗusi ki mbaɓura hu Babilon.

¹³ Doli ɗini hu basara jewra vi mulna Sirus ma Babilonna, mulna Sirus ɦal voɗta ana min Ziŋ Lona ndaɗta.

¹⁴ Olo tlesuu hu Ziŋ Lonara, suu u lorrana u doonora suu Nabukodonosor yowosi ay ki hu Ziŋ Lona ta Yerusalemba a tuɗusi ha ki hu zira vi lona ta Babilondana, mulna Sirus yowosi ki hu zira vi lona ta Babilonda a ɦasi ki maŋ sa ma yam ana Sesbasar ma nam tinim a mul ŋgolnana.

¹⁵ Nam dam ana, yow tlege asina, tuɗ cukusi hu Ziŋ Lonara hu Yerusalem, ko Ziŋ Lonara min ki balamaɗu.

¹⁶ Na ɗaŋŋi nam Sesbasar namma mbay gi u Ziŋ Lonara kaŋga hu Yerusalem. Col ay hu li namma day ta ta cemi ni asi ka miniɗu, may bay ɗaɓ ki tuwa.

¹⁷ Cecem wanda ɗaŋŋi, lini mulna hurum viya ni ko hal tlena ay hu li ma ŋgayra vi mulna ha ki Babilonna lini gasi mulna Sirus ɦal voɗta ana min Ziŋ Lonara hu Yerusalemmi ko asi sun ay hoŋ dira vi mulna kay joɓ ndaɗtara aya.»