EZDRAS 4 - Boy Lonana

Suu babali suu vi suu Juifna

¹ Hu li ma suu babali suu Yudana u suu Benjaminna wi ana asi ka min Ziŋ Yawe, Lona vi suu Israelna,

² asi ɦuɗ tasi ay eg Zorobabel u suu malayaŋ zina dasi ana, «Ami min a hal Loogina ni ko agi na may. Ami ay lam ɓivunna hu cokira Azarhadon a mul ma Asirina day. Nam sunumi ay tani ni namu.»

³ Na may Zorobabel may, Josuwe u suu malayaŋ zi suu usi hinna dasi ana, «Ami ka min ana ami u agi miniygi zira maŋ Looyginaɗi. Ami min zira maŋ Lo ma vi suu Israelnana ni ami hol. Sirus, Mul ma Persna, ɦami voɗta na ni namu.»

⁴ Suu hu mbassana mbay doli ni a soo ko suu vi Yudana, a mbuɗ suu min zira ki ndaana may.

⁵ Asi gususi yasi ki ko suu ɦal gaɗta a ɓeŋesi dlaasira ki hu cokira vi Sirus, mul ma Persna, ta ta tew mulla vi Dariyus, mul ma Persna.

Suu Juifna gasi usi ki maŋ mulna Artazerzes

⁶ Hu li ma Zerzes gijaŋ ti mulla, asi ɓii magaara sekka ay kay suu vi Yudana u suu Yerusalemma.

⁷ Hu cokira vi Artazerzessa, Bislam Mitredat, Tabeel u ndarayasi suu hiŋŋa ɓii maŋ Artazerzes, mul ma Persna. Boy ma ɓiiri hu magaarana ni u vun Arameenna u letre Arameenda lay.

⁸ Sa ŋgolna Rehum u sa ɓii magaara Simsay ɓii maŋ mulna Artazerzes kay suu Yerusalemma ni ko wanda na,

⁹ «Sa ŋgolna Rehum u sa ɓii magaara Simsay u ndarayasi suu hiŋŋa suu Dinna, suu Afarsatakŋa, suu Tarpelna, suu Afarasna, suu Urukŋa, suu Babilonna, suu Susna, suu Dehana, suu Elamma,

¹⁰ u suu daŋ suu sa ŋgol ma saɓakŋa Asnapar yowosi ay ki mbaɓura, kakasi hu ɦoŋzi ma Samarina, hu mbassa uɗ hinda hu keŋ lum ma Efratna u fiɗigina.»

¹¹ Gola ni magaara asi sunumba ay ndaɗta. «Maŋ mulna Artazerzes, suu mam suu sunda, suu keŋ lum ma Efratna u fiɗiginana.

¹² Asi ndak a tak ki maŋ mulna ana suu juif suu col ay varaŋ a mbay egemi hu Yerusalem a min ɦoŋzi ma honira u yara. Asi hin hoŋ gulumunna minda, hin gol u zira kaŋga giira ki jivi may.

¹³ Cecem wanda asi ndak a tak ki maŋ mulna ana lini ɦoŋzi namma hoŋ ki minda wa, gulumun ma kamma col ki kolowa may ni, asi hin ka ɦal taaraɗi lay, warak kay voɗtaɗi lay. Dla ndaɗta hin mba kay mulna ni boy cona.

¹⁴ Cecem wanda ɗaŋŋi kay ami ka ti vuvu ma taraŋ mulnana, ni ka irimi jivi a wi mulna ndi ki kaŋgaraɗi, ami ne yam mulna ni na.

¹⁵ A asi hal u dlara hu magaara saara vi somoyoŋga ka huruɗta. Hu magaa ndaɗta aŋ hin fi dlara aŋ hin wi ana ɦoŋzi namma ni ɦoŋzi ma yara hal boy cona kay mulina u suu hu ɦoŋzi ma bagina hu li ma asi gijaŋ min tasi a yara ay hu jew day day na. Ni kay ndaɗta ɦoŋzi namma ɓeŋem ki ni na.

¹⁶ Ami tak ki maŋ mulna ni ana li ni ɦoŋzi namma minim ki wa, gulumun ma kamma colom ki kolo wa ko ndaɗta na may ni aŋ hin ka ti kay ɦoŋzi ma keŋ lum ma Efratna u fiɗigina oloɗi.»

Hoŋ dira vi mulna Artazerzessa

¹⁷ Mulna sun hoŋ dira ha ana, «Maŋ sa ŋgolna Rehum, maŋ sa ɓii magaara Simsay u ndarayasi suu daŋ suu ka hu Samari, ka hu keŋ lum ma Efratna u fiɗigina uɗ ta hindana, heɓpa li u agiya.

¹⁸ Magaara ŋgolla agi sunumira ayra ami ndumuɗ ki fokon na vala vala.

¹⁹ An ɦal voɗta asi hal u dlara hin fi ay kaŋga ɓiiri ana ɦoŋzi namma li yara u mulina, asi laɗ sunuɗ ni u yara u ɓeŋga lay.

²⁰ Muli suu saɓak coco suu hu Yerusalemma ti kay keŋ lum ma Efratna u fiɗigina halaŋ, asi warakasi taara lay, warak kay voɗta lay.

²¹ Cecem wanda ɦagi voɗta seŋ sunda vi suu asinara, ka ɦoŋzi namma hoŋom mindaɗi ta ta an ɦal voɗta ha ni an tuwa.

²² Gologi tagi jiviya, ka lagi dla ndaɗta lalasɗi, kay ana ka dla cora wulɗi, ka mba boy cona ay kay mulinaɗi.»

²³ Hu li ma magaara ŋgolla vi mulna Artazerzes ndumuɗ ki fok Rehum fok sa ɓii magaara Simsay u ndarayasina lay ni asi tuɗ hoŋgo zak gaw hu Yerusalem eg suu juifna doorosi ki kay sunda u eŋga, saɓakŋa lay.

²⁴ Na ɗaŋŋi, sun Ziŋ Lonara hu Yerusalem seŋŋa. Ndaɗ seŋ ki ni ta ta hu basara mbara vi mulna Dariyus ma Persna.