EZDRAS 1 - Boy Lonana

Sirus ɦal voɗta a hoŋ Ziŋ Lonara minda

¹ Doli ɗini hu basara jewra vi Sirus, mul ma Persna, a boy ma vi Yawe ma ndi ay ki fun Jeremina li kira, Yawe mal saa Sirus, mul ma Persna, a nam ɓak dlara ki hu li ma nam ti mulla huna halaŋ, ɓii magaara sunuɗ ha ki di ana,

² «Mulla kay ndaŋgarara halaŋ, Yawe Lo ma kolo huulonana ɦanda ki wa, nam ɦan voɗta u tamba ana an minim zira hu Yerusalem hu Yuda.

³ Dukugi ni sa ɦal tam ki maŋ suu mamsina halaŋŋa ni gege? Ko Loomma li u namu, nam tuɗ hu Yerusalem hu Yuda a min Ziŋ Yawera, Lo ma vi suu Israelna, ni Lo ma ka hu Yerusalemma.

⁴ Hu lina halaŋ, hu li ma suuna usi hin ka huna, suu asina mbay u gursura u lorra u begera u tusuna u yoorina a ɦalla ɦawara may kay Ziŋ Lo ma ka hu Yerusalemma.»

⁵ Na ɗaŋŋi suu ŋgolo suu fok suu vi Yuda u Benjaminna, suu li ɓivunna u suu Levina ni kay suu Lona malasi saarasi ki kay tuɗ a min Ziŋ Yawera hu Yerusalemma.

⁶ Ndarayasi suu zi suu egesina vasi kosi a njunusi u tlesuu ko ndal doonora na, lorra na, begera na, yoorina na, ɦalla ɦawara jivira ka ndumbi, u tlesuu ɦasi ki ɦawana cuk kayam olo.

⁷ Mulna Sirus sel tlesuu Nabukodonosor yowosi ay ki hu Yerusalem cukusi ki hu ziŋ loogi mam suu ɦawanana ay ki hu Ziŋ Yawera.

⁸ Sirus, mul ma Persna, yowosi ay ki ni ko tam u sa ŋgayra Mitredat ɦasi ki maŋ sa ŋgol ma vi Yudana Sesbasar.

⁹ Gola ni ndumusiya, petleŋe ma lorra dok-hindi, petleŋe ma doonora buɓ dew, ŋgewegina dok-mba' yam dleeŋe,

¹⁰ koɓ ma lorra dok-hindi, koɓ ma doonora ma a mbara na 410, tlesuu daŋŋa buɓ dew.

¹¹ Ndum tlesuu doonora u suu lorna halaŋŋi 5,400. Sesbasar yowosi ŋgolosi hu li ma suu yowosi ay mbaɓurana col ay Babilona a hoŋ hu Yerusalemba.