EZAYI 9 - Boy Lonana

¹ Suu may suu ay poy duk ndufundana wi kiɗikka ŋgolla, kiɗikka li ki kay suu li cuki duk ndufundana.

² Aŋ wulusi furi masira kolo wa, aŋ zulusi u ay masira wa. Asi ka furi fokoŋu ko suuna furi hu buu ma feɗ tlena vona na, ko suuna furi a ɓorow joo ma asi fam ay fun duunana na.

³ Kay jug ma nek ki kelesina, tokolo mayra nekka buuri kelesira tokolora vi muli suu duu suu ka fokosina aŋ kususi ki halaŋ, ko li ay hu buu ma vi suu Madiyanna na.

⁴ Sem tuɓuru ma vi suu duuna ma soo ay kaŋga kiriɓ kiriɓma u baraw ma taɗ ay ga duk busunana hin ŋgal kiyo, asina hin hin ki ni a ti ma vi kurana.

⁵ Kay vuɗuygi gogoo maa ka dew. Goona ka dew ɦaygina aya, Lomoro ta mulla ay ɓali bikimu. Suuna hin njaɗ ha ki kay semu. «Ma jivi cocona, ma haɗ suuna, Lo ma saɓakŋa, Buy ma din dinna, mul ma heɓpa.»

⁶ Mul mamba hin li ha ni na din din heɓpa uɗ ka doɗira. Ni kay dlamba mulla vi David u mul mamba. Nam hin tin mulla coloɗ eŋŋe, ni kay gasira u ɗegeera col ha cemmi tuɗ ha na gak gak, saɓak ma vi Yawe, ma Saɓakŋa Kom Belna, hin li dla ndaɗta.

Yara vi Yawe kay suu Israelna

⁷ Bu Suuna kaɓakŋa kay njaf suu vi Yakobma, ɓak namma ndi ni kay suu Israelna.

⁸ Suuna halaŋ hin wi boy namma kiyo, Efrayim u suu laki hu Samarina halaŋ suu ka furina u ŋga taasira lay.

⁹ Birikka cukki kaŋga wa, na may aygi hin min zina ni u gogoyra sasak. Ŋgus ndimma bow ki wa, aygi hin pi ni ŋgusu ma yam ana sedrena sak sak.

¹⁰ Kay ndaɗta Yawe soosi u suu babali masisina ay kasiya, nam yowosi suu duu u asina ay koloo.

¹¹ Suu Sirina ay u maɗiina may suu Filistinna ay u fiɗigina may. Asi mba lik suu Israelna ko suuna lik tlena na. Na lay ni Bu Suuna hurum heɓ ka eg suu Israelna tuɗi, kom ka ki maɗi a lasasira tuwa.

¹² Suuna hoŋ ay ka eg sa ma ka casinaɗi. Asi hal Yawe ma Saɓakŋa Kom Belna, kaɗi.

¹³ Kay ndaɗta Yawe ka yamba u njawra hu Israella kiyo. Nam ka manawna u cerewna ki ni buu ma dewna.

¹⁴ Suu ŋgolona u suu ndakina ni yamba. Suu jok vun Lona suu kaboyna ni njawra may.

¹⁵ Suu may suu tuɗ fok suu Israelna viɗisi ki wa. Suu asi tuɗ fokosina tli ni voɗta cora may.

¹⁶ Kay ndaɗta Bu Suuna ka wasi hahaw gorzoŋi masisinaɗi. Nam ka wi hahaw gor suu kuyuna u boyogi suu donoraɗi lay, kay asi halaŋ ka wi Lonɗi, ka li dla jiviɗi lay, vunusi halaŋ njaɗ ni dlara giniŋga. Na lay ni Bu Suuna hurum heɓ ka eg suu Israelna tuɗi, kom ka ki maɗii a lasasira tuwa.

¹⁷ Kay dla cora vi suunara ni ko kura ŋgalla na, ndaɗ ŋgal gu ma siina u meera ki halaŋ, ŋgal tlesuu ŋgoo hu fullana ki bel, ndoosna ɗus kolo ni nam doy hol.

¹⁸ Yara vi Yawe, ma Saɓakŋa Kom Belna, ka ŋgal mbassa ki halaŋ. Suu warna mbuɗ ni a usu ma vi kurana. Sa ma ndak a suɗ wayam ki kaɗi.

¹⁹ Suuna ti ha gak may ni mayra ka hin ciraɗi. Suu bik gulna ti may, ka hoɓbi. Gegelay ni mbuɗ kommi tliw bikimu.

²⁰ Njaf suu vi Manasena kom suu vi Efrayimma, njaf suu vi Efrayimma kom suu vi Manasena may. Asi hin taɓ u tasi a nda ndug suu vi Yudana. Na lay ni Bu Suuna hurum heɓ ka eg suu Israelna tuɗi. Kom ka ki maɗii a lasasira tuwa.