EZAYI 8 - Boy Lonana

Sem goryoŋ sa ma jok vun Lonna

¹ Yawe dan ana, «Tli arduwassa ŋgola koŋu, ɓii huruɗ u ɓiira ɦawara maŋ sa ma yam ana Ma-Ҥurum-Jona-Ki-Zakŋa.

² An hin tak arduwas ndaɗta ki maŋ suu dikina mba', ni Uriya, mul ma li ɓivunna, u Zakari ma goŋ Yeberekiyana.»

³ Ŋgoo dagan an taɓ u caanda jok vun Lona, ndaɗ vi wiina, vuɗ goona. Bu Suuna dan ana, «Tin sem go namma ana, Ma-Ҥurum-Jona-Ki-Zakŋa.

⁴ Kay ana jew bay goona mbuɗ yi ana bunu ɗowba sunura ni asi hin ɦurum begera vi suu Damasna u jo ma vi suu Samarina ay fok mul ma Asirina.»

Mul ma Asirina hin tli mbassa Yudara

⁵ Yawe dan olo ana,

⁶ «Suu asina ka min mbo ma hu Siloe ma ɓaɗ ɗil ɗilnaɗi, asi furi ni fok Ressin u goŋ Remaliyana.

⁷ Kay ndaɗta Bu Suuna hin ɓaɗasi mbo lum ma saɓak cocona ay kasiya, mul ma Asirina u bibiŋil mamba. Mbo lum ma Eufratana hin oy ay ki mba tli lina ki halaŋ.

⁸ Nam hin tli mbassa Yudara kiyo, mbona hin oy ki hu lina halaŋ, mbo ma tlira mba ki kolo del sa warna. Mbo namma hin oy ki kay yam mbas maŋga halaŋ halaŋ, ɦii Emmanuel.»

Lona ka u amiya

⁹ Wagi ki jiviya agi njaf suuna halaŋ, lagi ndaana. Agi suu ha ki hu mbassa daŋga dayna tin humugi ha huma. Minigi tagi a duuna asi hin cagi kiyo. Minigi tagi a duuna asi hin cagi kiyo.

¹⁰ Vagi vunugi kay dlara dla ndaɗta ka hin liɗi. Ҥagi gaɗta a lira may ndaɗ ka liɗi. Kay Lona ka u amiya.

Yawe ne yam sa ma jok vun Lona

¹¹ Yawe u saɓak mamma ŋgolna, hu li ma nam van komu, neen ana an li ko suu hiŋŋa lira naɗi, hin dan ana,

¹² «Aŋ ka njaɗ ko suu hiŋŋa vi vunusi njaɗta naɗi, tlesuu asi lasi ndaarasina aŋ lasi ndaarasiɗi, taŋga lay ni li ndaaɗi.

¹³ Aŋ li ki teteɗ ni Yawe, ma Saɓakŋa Kom Belna, doy hol. Nammi sa ma aŋ lam ndaaramma, nammi a sa ma aŋ li ndaana komma hol.

¹⁴ Nam hinni ko zira tokka na. Nammi a ɦini ma suuna puk kamma. Ni a ɦini ma daɓ sem suunana. Ni kay ii zi ma vi suu Israelna mba' jok, kay suu Yerusalemma nammi a daw ma vasina.

¹⁵ Suuna ŋgolo hin daɓ sesi kamu. Asi hin puk kamu, hin kus ki lay. Asi hinni a suu dawna vasina.»

Haɗta u juɓpa

¹⁶ An dug boy manna u haɗ manda ki ii suu haɗi mansina.

¹⁷ An juɓmi Yawe ma ŋgay tam ki ii suu vi Yakobmana. An tin saa manda ni kamu.

¹⁸ Anu, u gor suu Yawe ɦansinana, ami ni a suu tak ki kay dlara duk suu Israelna. Ni u sem Yawe, ma Saɓakŋa Kom Belna, ma ka kaki kay yam ɦinira Siyonna.

¹⁹ Lini suuna dagi ana agi tuɗ fun suu joɓpa, suu may suu di dlara ay u hosokka gana, suuna ka ndak a joɓ loogi masisinaɗi su? Asi joɓ suu miɗina ay kay suu iirinaɗi su?

²⁰ Dasi asi hum u gaɗta vi Lonara lini asi hum kaɗi ni asi hin ka wi kiɗikkaɗi.

Buu ma lassa

²¹ Suuna hin poy hu mbassa halaŋ ko mayra, asi hin mbuɗ ki yara coco ko mayra, mbuɗ ŋgul mulna lay, ŋgul Loosina lay. Asi mbuɗ irisi ki eg kolora,

²² asi pereɗ irisi ay ni ga kay ndaŋgarana ɗow, gola ni yoora u ndufunda, wihawra duk ndufundara may. Ni njeŋgera sana oy cocora.

Mul ma hebma

²³ Na may ndufunda hin ka li ha na gak gakgi, kay ndaŋga mayra yoora ka hu cemini wanda, mbassa vi Zabulon u mbassa vi Naftalira. Buu ma hin mbayna hin li hu ni bibiŋilla, ha hu voɗta tuɗ fun mbo lumma ŋgolna u lum ma Yurdanna kay yam ndaŋgara vi njaf suuna halaŋ.