EZAYI 7 - Boy Lonana

Ezayi di boyna maŋ mulna Ahaz

¹ Hu cokira Ahaz goŋ Yotamma, goŋ Oziyasna, mul ma Yudana, Ressin mul ma Sirina u Peka ma goŋ Remaliyana mul ma Israelna, tuɗ hu Yerusalem a duu u asiya, may asi ka ndak a duu u asiɗi.

² Asi jok boy namma ay maŋ Ahaz, njaf suu vi Davidna ana, «Mul ma Sirina u suu mam suu duuna ay ka hu mbassa vi Efrayimba.» Ahaz mbuɗ ki ndaana u suu mamsina halaŋ halaŋ. Asi mbuɗ dlak ko ndal hum ŋgusugina geŋeɗ ko semeɗnara na.

³ Yawe di Ezayi ana, «Kal ki tuɗ ŋgaf vok Ahaz aŋ u goroŋŋa, Sear Yakob. Nam ha ki ii dagan fun goloŋ ma ɗok yona vi suu ŋgolona, ni hu voɗta tuɗ hu senena na.

⁴ Aŋ tuɗ dam ana, Aŋ kak na en, li ndaaɗi, hin vun digiŋ a ɓikiŋ ko vun gu ma ku ma mba' nammaɗi. Li ndaa ko yara vi Ressin, sa ma Sirina u goryoŋ Remaliyana naɗi.

⁵ Ni kay ana suu Sirina, u Efrayim u goryoŋ Remaliyana, asi vi vunusi a laŋ dla cora egeŋu di ana,

⁶ Tuɗuygi kolo eg Yuda mbuɗum ndaana. Seleygi varam tuɗ vaygina aya. Hin kakaygi kasi a mulna ni goŋ Tabeelna.»

⁷ Bu Suuna Yawe di ana, «Dla ndaɗta ni ka ndak a liɗi, dla ndaɗta kaɗi lay.

⁸ Ni kay mege? Kay ana saɓak Siri su Damassa, saɓak Damas ka u mulna Ressin lay. Basara hin tu na dok-karkiya yam vadl ni Efrayim ma tokina ka min koloɗi.

⁹ Kay saɓak Efrayim ka hu Samari, saɓak Samari ka u goryoŋ Remaliyana may. Lini agi hurugi ka tinni saɓakgi, ni agi ka hin a col fok suu duuruginaɗi may.»

Emmanuel

¹⁰ Yawe ɓak u Ahaz olo dam ana,

¹¹ «Aŋ joɓ Yawe, Looŋŋa, nam tak saɓakam ki u va maa dew. Joɓom kay va ma zul zul ma ay ga u ndaŋgara dayna ɗowba va ma ha kolo huulona dayna.»

¹² Ahaz hoŋ dira ana, «An ka joɓ vaɗi, an ka min a tuk Yaweɗi.»

¹³ Ezayi hin dam ana, Humugi haa, agi njaf ma vi Davidna. Agi gol ana agi loɓ suuna na ni irigi ni ew su? Agi min a loɓonni Loonna lay su?

¹⁴ Gola Bu Suuna u tamba hin takagi dlara dew, go tamara bay buu u sa njuf tura hin vi wiina, hin vuɗ goona. Ndaɗ hin tinim sem ana, Emmanuel, Lona ka u aya.

¹⁵ Nam hin tini mbul mbiira ugi mbul yumma. Wi yal ma hin cora kiyo, manni jivira.

¹⁶ Jew a gogoona wi yal ma hin cora ki man jivira ni, muli suu aŋ lasi ndaarasi mba' wanna ndaŋga ndaɗta hin hin kiyo.

¹⁷ Yawe hin mbaaraŋ lassa kaŋu, kay suu maŋsina u zi ma vi buŋŋa lay, las ndaɗta li ka yaɗ dew tuɗi ta ta hu li ma Efrayim ɓorow ay ki u Yuda dayna ni las ndaɗta li kaɗi. Las ndaɗta hin laɗ ni u mul ma Asirina.

¹⁸ Hu buu namma ni Yawe hin suu Egiptena mbay kagi ko ndal lolona na, suu Asirina hin to kagi ko ndal yumma na.

¹⁹ Asi hin mbay wani laki hu li ma mbona huna, ki kay ɦinira lay ki hu li ma haɗna huna lay.

²⁰ Hu buu namma ni Bu Suuna welegi yagi ki u vel ma tlam ay ii lum ma hiŋŋa, ni mul ma Asirina. Nam hin welegi yagi ki lay, wel tlimiɗta sekira ki lay, welegi njeɓeregi ki lay.

²¹ Hu buu namma sa hin taa ni do mbutla dew may, gor timigiina mba' may.

²² Kay mbiira li hu mbas ndaɗta cocora suu huna hin ti ni mbul mbiira. Ni na daŋ may suu usi hin huna hin ti ni mbul mbiira u mbul yumma.

²³ Hu buu namma oloni, sene ma gugutluna li pii huna fi gursura buɓ mayna, hin mbuɗ ki ni li ma gi wayra u meera day ki huna.

²⁴ Suuna mbuɗ poy hu li namma ni u mburrura kosiya, kay mbas ndaɗta mbuɗ ki ni li ma wayara u meera day ki huna.

²⁵ Li ma u ɦinira ma suuna li horok huna sa ka kal hu oloɗi ko ndaa wayara u meera, suuna mbuɗ taa mbutlina ki ni huwa, timigiina jakŋi hu lay.