EZAYI 6 - Boy Lonana

Lona yi Ezayi

¹ Hu coki mayra mulna Oziyas miɗta ni an wi Bu Suuna kak kay dlamba ŋgolla kolo dayra, vun baraw ma cuki tamma oy huu Ziŋ Lonara kiyo.

² Suu sunda huulona suu yasi ana Serafinna laki kamu. Asi sana dew ni garaŋam karkiya, taa mba asi baa iirisi ki u ndaɗu, ta mba hiŋga asi baa sesi ki u ndaɗta may, ta hin mba wanda ni a piira may.

³ Asi sawalla kolo duk tasi ana, «Teteɗ, teteɗ, teteɗ, Yawe, ma Saɓakŋa Kom Belna. Bibiŋil mamba oy ki kay yam ndaŋgara halaŋ halaŋ.»

⁴ Gu ma ɓali fun Ziŋ Lonarana gijaŋ geŋeɗta ko del sa ma sawallana. Huu Ziŋ Lonara oy ki u ndoosna.

⁵ An ɓak tan ana, «Hahawra ni kanu, an ba ki wa, kay anni sa war ma vunum njenjena, an kaki ni duk suu vunusi njenjena may, irin wi mulna, Yawe, ma Saɓakŋa Kom Belna.»

⁶ Serafin maa dew ni pii ay mbay egenu u murus kura ay mboɗi kom fun dewna, nam tlaɗ ay ni hu givin ma togolla.

⁷ Nam ŋgenen vunun u kura di ana, «Hu li ma ku ndaɗta ŋgeneŋ vunuŋ na gawni, dla cooŋga daɓ ki wa. Suluk maŋŋa bulum ki wa.»

⁸ An hum del Bu Suuna di ana, «An hin sunni gege, sa ma hin tuɗ sunuygina ni gege?» An hin di ana, «An wanni, sununu.»

⁹ Nam di ana, «Tuɗa, aŋ ɓak suu asina ana, Humugi jiviya, ka wam umbi. Agi gol jiviya ka wi vaɗi.

¹⁰ Mbuɗ saa suu asina ki giniŋga, ŋgelesi humusi kiyo, dugusi irisi ki ka wiɗi may. A asi hum u humusiɗi, ka hurusi a saa dlaɗi lay, asi ka ndak a hom ki a garaɗ tasi kiɗi lay.»

¹¹ An hin joɓ ana, «Dla ndaɗta hin daɓmi saɓage, Bu Suuna?» Nam dan ana, «Ni ta ta hu li ma ɦoŋzina ɓeŋ kiyo, suuna njay kina, zina sa ka hin kaki hurum oloɗi. Mbassa mbuɗ ki ni ko ŋgoo bagira na, ɓeŋ ki cocoo.

¹² Yawe hin dik suuna ha ki na day day, suuna hin noy mbas masira kiyo, ni vo hu mbas ndaɗta lay.

¹³ Lini keŋ ma doogona vi mbas ndaɗta suɗ ko las ndaɗta lay ni, ŋguy masira mba kasi ni u kura may. Ni ko ndal suuna ka ɦoyna kira na, sariyam hin hin kaŋga ni nam hol kay sarina ni ii njaf ma teteɗna.»