EZAYI 57 - Boy Lonana

¹ Suu ɗegeena ba kiyo, sa ma caa yam kasi kaɗi. Suu li dlara jivira asi lasasiya, sa ma njunusi kaɗi. Suu cona ka casi poŋga, na daŋ may suu ɗegeena ka lassa.

² Na may heɓpa hin mbaa, asi hin fi koɗ tara kaŋga hu liisi ma buuna, ni kay suu poy ɗegeena halaŋ.

Ɓakŋa kay suu goɓ fulina

³ Ҥuɗugi tagi ay tani agi goryoŋ suu li kumuna, agi njaf ma dalamba u suu gawlaŋina.

⁴ Agi a panagi ni gege? Agi ɗus irigi ni eg gege? Agi tanaɗ sinigi ni u gege? Ni ka agi gor suu yagi eŋŋaɗi su? Ni ka agi njaf suu kaboynaɗi su?

⁵ Agi ŋgaagi fuli magisina duk gura girmindiŋga u bubura ŋgoo bagiya. Agi ŋgaɗagi goryogi ki fun mbo ŋgolona, u ɦinira lay.

⁶ Agi man ɦinira ceɗira ta ay duk mbo ŋgolnara, agi goɓoɗ ko lona na. Agi ka haɗ tlesuu tira u suu cira lay, dla ndaɗta na ni an ndak a siɓiɗ na gak su?

⁷ Agi taɓa kolo kay ɦinira fiyekka, min ziigi ma buuna ha ki huwa. Agi lagi ɓivunna ha ki kolo hu may.

⁸ Agi hakagi kumu magina keŋ vun zira, agi ana ŋgay tagi konni ŋgaya ni doli agi ki ni siiliya. Agi buu kay lay magina, minim yam ki jiviya. Agi gus tlesuu jivina kay layna, minni buu ma kay lay maginana, gol ni tlegeyegi suu jivi asina.

⁹ A tuɗ eg mul ŋgolna ni agi saɗ mbulna ki segiya, li mbul ma his jivina ki egegi may. Agi cuk suu magi suu vun sunda ha ki hu mbassa dayra, hoŋ yagi ki ga u suuna ta ta mbuɗ tagi ki goriyo.

¹⁰ Agi loɓ tagi a hal fulina cocoo, ka di ana agi loɓ waraɗi lay. Agi saa ana fulina hin ɦagi saɓak ma wilina, kay ndaɗta tagi ka loɓbi.

¹¹ Fulina ni mege? Agi li ndaana kosi ni kay mege? Agi mbaɗanu, humugi maa ki kan lay. Agi ka lan ndaranɗi ni kay basara ŋgolo an seŋ tan ki, ka di vaɗira su?

¹² Agi saa ana agi ka li ni dlara jivira, na may an hin takagi sun magira kiyo, ndaɗ ka jiviɗi.

¹³ Lini agi tii lay ni, fuli magi suu agi goɓosina njunugiya, fuli asina semeɗna hin yowosi ki halaŋ halaŋ. Babaana hin tinisi yasi ki na day. Na may sa ma ŋgay tam egenna ndaŋgara hin ki ni mamba. Ҥini manda teteɗta hin ki ni varamu.

Suu vi Lonna garaɗ kiwa

¹⁴ Sa di ana, minigi voɗta kiyo, miniɗ kiyo. Tlesuu daɓ semma hu voɗtana yowosi ki fok suu mansina.

¹⁵ An Lo ma ay kolo dayna ma ka din dinna di na. Ma ka miɗina, sem ana ma Teteɗna. An ka kaki ni hu li ma teteɗna. May an ka hu sa ma hurum ki teteɗna, sa ma irim ɗilina kay a ɦal iirira maŋ ŋgus mayra hoŋ yaɗ gara, maŋ suu hurusi ka haɗ ɦayna may.

¹⁶ An ka ndak a li hurun yara egesi na gak gakgi, an ka ɓalakasi hurusi ha na gak gakgi, li ka naɗi ni ŋgus masira maŋ ki fokon cocoo, an lasi iiri masira ni an lay.

¹⁷ An mbuɗ egesi yara ni kay dla coosira asi laɗta, an casi ni kay ndaɗta, asi may ni yasi hu voɗ masira co ndaɗta na gak gak.

¹⁸ An wasi dlaasira asi laɗta, na may an garaɗasi ki wa, an ɗegeersiya, ɗilisi irisiya u suu ka tii dukusina halaŋ.

¹⁹ An hin kalasi soolla geleɗta ay ki funusiya, ana heɓpa, heɓpa kaa, kay suu ha ki dadayna u suu totokŋa lay, di na ni Yawe, an hin garaɗasi kiyo.

²⁰ Na may suu li dla cora ni ko ndal mbo lum ma ɓaɗna na, mboom ka col na enɗi. Mboom doɓira ni na boɗof ɗof, ka ɗilɗi.

²¹ Loonna di ana, suu li dla cora, heɓpa ka kasiɗi.