EZAYI 53 - Boy Lonana

¹ Suuna ɓak tasi ana, sa ma tin hurum kay dlara asi daɗta ni gege? Sa ma wi ana Yawe li dla ndaɗta ni u ɓik komu na ni gege?

² Sa sunda wul fok Bu Suuna ni ko gu ma saariyam kal hu li ma bay yona na. Nam ka gol jiviɗi lay, va ma bibiŋil ka egembi lay. Suuna golom na ni taɗ yasi kiyo, va ma ii sa jivi ka egembi lay.

³ Suuna panam cocoo, sa ka caa yam kambi lay. Sa ma wihawra, haɗi u lassa, suuna wam na ni pereɗ irisi kiyo, panamu, sa ma saa kam kaɗi.

⁴ Doli nam yow ki kammi las maygira, nam zii ni ti ta maygira. Aygi golommi a sa ma Lona lasamma, hoŋom yam ki gaa u suuna halaŋ.

⁵ Na may nam mbuɗ ki zolona ni kay ŋgel vun maygina. Suuna dagammi kay co maygira. Ɓak ma kaam kay sana a heɓ ta suuna halaŋ tokŋi kamu. Mbil ma nam famma garaɗaygi ki wa.

⁶ Aygi halaŋŋi ko timigiina na, ay ki viɗiya, gegelay ni tli voɗta nam tuɗ hura. Yawe tokoygi dla cooygira ki kam halaŋ.

⁷ Nam hin tam asi lasamu, mal vunum ka a di boyɗi, ko goo timii ma asi vam tuɗum hu li ma ŋgaɗta na, ni ko timii ma asi vam a cawam tlimiɗim kina na. Vunum dugiya di va ka dewɗi.

⁸ Asi ɦeɓem u saɓakŋa tuɗum fun ɓakŋa, suu hu njafamma mbaaram dlara kammi asiya. Na daŋ may nam aygi ci hu ndaŋgara duk suu iirina, ni kay cora vi suu mamsina, cora halaŋ tokŋi kamu.

⁹ Asi vekem zulummi duk suu li dla cora, usummi duk suu sulukŋa. Na ni nam li co ka yam na dewɗi lay, boy ma ganyam ka kal ki funumbi lay.

¹⁰ Yawe min a las saam ma sunda nam hin iiri mamba ki kayra vi suu daŋŋara. Nam hin wi njaf suuna ha fokosiya, fokosiya. Buu mam ma hu duliyara hin ɦuɗ foko, minda vi Yawera hin li kiyo.

¹¹ Iiri mamba las cocoo, kay ndaɗta nam hin furi su olo, nam hin wi ki ana nam las kini ɦawaa. Nammi saan ma sun ma gasina, nam yow dla cora vi suu daŋŋa ki bolowo, kay ndaɗta nam ka ziirisi dlaasira.

¹² Kay ndaɗta an kakam ki ni duk suu ŋgolona. Nam hin ɓorow tlesuu yowosi ay fun duunana ni ko tam u suu saɓak cocona. Kay nam hoŋ yam ki kaŋga ta ta miɗna. Nam gi tam ki duk suu li dla cora. Nam yow cora vi suu daŋŋa ki kam halaŋ. Nam ka njun kay suu ɓakŋa vasina.