EZAYI 51 - Boy Lonana

Suɗ mayra uɗ ka doɗira

¹ Agi suu may suu hal suɗta humugi haa, agi suu hal Yawena, gologi ɦini mayra agi sel ha ki hura gige, gologi zul mayra agi cuk ha ki hura.

² Humugi gagi kay bugi ŋgolo Abraham u sugi ŋgolo Sara suu vuɗugina. Hu li ma an yasina ni asi ni mba' daŋ, An hin paɗ vunun ki kasiya, zulusi ki bolowo.

³ Na daŋ may, Yawe ɗil ii zi ma Siyonna wa, zi mamma ɓalak kina, nam soosi hurusi wa. Nam mbuɗ li ma ki duk gurana ki zina. Li ma haw yona nam mbuɗum ki a sene ma vi Yawena. Zi namma cemi oy u furira, hum hu ni soolla gi deɓpa u tlesuu luuna zeɗ zeɗ.

⁴ Agi suu mansina humungi vunun ha jiviya, agi suuna halaŋ tin humugi ay huma, kay gaɗta col ha ni fununu, kaɓak manna ni kiɗikka vi suunara, an hin laɗ na tew tew.

⁵ Suɗta An ɦagirara hin wa tok, buɗta agi a buɗ kira hin tak taɗ kiyo. Suuna hin lakŋi hu ɗegeera an a takasirara. Suu ha ki day dayna lay hin tin hurusi kanu. Asi hin saa ni kay saɓak manna.

⁶ Gologi huulona koloo, gologi ndaŋgara may. Na daŋ may huulona hin vaɗ ki ni ko ndal ndoosna na, ndaŋgara hin ɓeŋ ki ni ko ndal barawna na. Suu cuki kaɗna hin miɗ ki ni ko ndal vurutna ɦawa na. Na may suɗ manda ka ni a fafaɗta. Ɗegee manda ka ni na din din ka daɓ kiɗi.

⁷ Agi suu wi ɗegeera humungi vunun haa, agi suu kolo huulona suu gaɗ manda ka hurugina, lagi ndaa ko mbeleŋ ma vi suu warnanaɗi, lagi ndaa ko ganyam masiraɗi.

⁸ Kay njufulna hin tasi ki ni ko ndal barawna na, dagakŋa hin tasi ki ko ndal tlimiɗ timigiina ɦawa na. Na may ɗegee manda ka ni na din din, suɗ manda ha kay njaf suuna fokosiya, fokosiya.

Yawe dliɗ ki koloo

⁹ Dliɗ kiyo, Yawe, dliɗ ki zak. Dliɗ ki u saɓak maŋŋa. Dliɗ ki ko fok jewra na, hu li ma vi somoyomi suu jak ki jewna, aŋ ci suu Egiptena ki ni ka aŋgi su? Aŋ ci vabak ma hu njaf Rahabma ay ki ni ka aŋgi su?

¹⁰ Aŋ so mbo lum ma ŋgolna kiyo, hu li ma gaalina aŋ gi voɗta ki huwa, hu li namma suu aŋ suɗusi ay kina jakŋi ɦawaa.

¹¹ Suu Yawe buɗusi ay kina hin hoŋ aya, asi hin mba cuk hu Siyon u soolla furira. Furira ka daɓ kiɗira hin li kasi na din din. Ayra u furira ɦuɗ tasi ay egesiya. Yoora u zamba yow liŋŋa may.

Agi suu mansina a li ndaana ni ko gege?

¹² Anni sa ma njunugina. Agi li ndaa sa war ma miɗ kina ni kay mege? Goŋ Adamma ni ko ndal ɓo usuna ɦawa na.

¹³ Agi maa ki kay Yawe ma lagina gaw su? Nammi sa ma li huulonana lay, li ndaŋgara layna. Agi dlak ndaana hu buuna tew tew fok suu lasagina na ni kay mege? Agi gol ko asi saɓak coco a dikigi kira na ni amege? Cemi ni yaasi ndaɗta ni ara wan ologe?

¹⁴ Suu asi vasi gina asi cukusi ay ni u liŋŋa, asi ka ndak a miɗ ga hu zul ndaɗtaɗi, asi ka yoo haw va ma tiɗi lay.

¹⁵ Anni Yawe, Looŋŋa, anni sa ma sulul mbo lum ŋgolna ay kolona, sen ana Yawe, ma Saɓakŋa Kom Belna.

¹⁶ An li huulona ni anu, min ndaŋgara ni an lay. An di suu Yerusalemma ana, agi ni suu mansina, an hinigi Boy manna ka ni kogiya, an gi garaŋan kagi wa.

Yerusalem col ki koloo

¹⁷ Col koloo, coli kolo u seŋu, Yerusalem. Aŋŋi sa ma Yawe lasaŋ u yaamba coco ɦayna, lassa vi Yawe guruɗuŋ yaŋ ki cocoo. Aŋ las cocoo, wi dla ndaɗta u iriŋ lay.

¹⁸ Goryoŋ suu aŋ vuɗusi hu duliyara halaŋ ma njunuŋ ka dewɗi. Duk gor suu aŋ wulusina halaŋ ma njun kaŋ kaɗi.

¹⁹ Dlara hahawra mbay kaŋ na mba'. Mbas maŋga ɓalak kiyo, may ŋgolla ndi kay suu maŋsina, duuna lay, sa ma hin mba egeŋ a ɗiliŋ iriŋŋa ni gege?

²⁰ Goryoŋ njay ki hu lina halaŋ, ki buuri keŋ voɗta ko mburi suu suuna vasi hu bayna na. Ni u yara vi Yawera, u lassa Looŋŋa lasasira.

²¹ Na may cemi humugiya, agi suu las cocona, suu yagi ay homi gana, suu lassa guruɗugi ay kina, ni ka guruɗta u sumaraɗi.

²² Gola Yawe, malagina di ana, an tlaŋ kop ma lassa ndaɗta ki wa, kop ma yaanda ay oy huna. Las ndaɗta ka a laŋ oloɗi a fafaɗta.

²³ An ɦal kop namma duk ko suu may suu li lasagina wa, suu may suu li dagi ana, goɓogi kaŋga an ful kagiyana. Agi ɦasi ŋgorogi ko ndaŋgara sana kak kaɗta na, ko voɗta suuna tuɗ huruɗta na may.