EZAYI 5 - Boy Lonana

Soolla kay sene gugutlu ma vi Bu Suunana

¹ Yoo, an min gagi soolla vi bananna kay sene gugutlu mammara haa. Bananna ka u sene gugutluna Zumi hu li ma mbii cocona.

² Nam dalaɓ lina, yow gogoyra kiyo, zaa njaf tlesuu jivina huwa. Duk gayra ni nam min li ma em gugutluna hu may vek zulla huwa. Nam ka juɓmi vuɗ gugutlura jivira. Na may nam fi ni vuɗ mayra cora.

³ Cemi ni agi suu Yerusalemma u suu hu mbassa Yudara. Kaagi ii ɓakŋa dukumi u sene gugutlu manna gige.

⁴ An fi vuɗta jivi ka huɗi ni kay mege? An hin lammi ana mege? Va ma an hin dam suna ni mege?

⁵ Ni an min haɗagi dlara an hin a laɗ eg sene gugutlu mannara haa. Hawaɗagi dlaɓpa kamba ki hin tlena tam kiyo, an min to gulumun ma gi kamma kiyo, hin voɗta duk suuna tayam ki gaa.

⁶ An min hin li namma ki ɦawaa. Sa ka hin horok li namma oloɗi. Tlesuu siina ugi wayara hin day ki huwa. An hin doo ɗugulla ki ka ndaɗ si yona huɗi.

⁷ Sene gugutlu ma vi Yawe, ma Saɓakŋa Kom Belna, ni suu Israelna. Tlesuu zaari hu senena irim jivina ni suu Yudana. Nam a lasi ginni jivira, hin fi huni dlara ka jiviɗira. Nam juɓ ginni ɗegeera, hin hummi tiina vi suu hahawra na ɗow.

Dla cora mba kay suu Yudana na zeɗ zeɗ karkiya

⁸ Hahawra ka kay suu zul zina ha zuli na ɗow ɗow, ŋga senena ha fok na ɗow ɗow ta ta tli lina ki halaŋ halaŋ. Hin tasi a lak kay mbassa ni asi doy holna.

⁹ An hum Yawe, ma Saɓakŋa Kom Belna, suu tam ki ana «Zi ma min ŋgolo coco namma ma jivi ɦayna hin ɓeŋ kiyo, ni kay cora vi suu hurumma.

¹⁰ Sene gugutluna zewna doogo ni fi sum veŋŋa u guura ni dew daŋ. Ii wa ma zaaram ga u sawalna sopma hin feɗemmi fi kaalamba ni dew.»

¹¹ Hahawra ka kay suu maɗii day day ɗik faɗta u guruɗ summa u suu heɓ lina u ci summana may.

¹² Diŋŋa u dadarira, ŋguruɗ diffa u dlara luuna asi ba lina coco ni kasiya, ka wi sunda Yawe laɗtaɗi, ka min a saa kambi lay.

¹³ Kay ndaɗta suu mansina hin njay kiyo, ni kay asi ka wanɗira. Suu masi suu ŋgolona hin laɓ ki ko mayra, suu hu ziinna ŋgolo hin laɓ ki ko laara.

¹⁴ Kay ndaɗta lina vi suu miɗina hin ŋgo vunum kiyo. Suu ŋgolona u suu hu zinana hin cuk huwa, u furi masira asi li furira.

¹⁵ Suu warna halaŋ yasi hin hoŋ gaa, sana hin hoŋ ki dagani. Suu ŋga tasina hin cok yasi ki gaa.

¹⁶ Yawe, ma Saɓakŋa Kom Belna, hin fi ŋgara hu kaɓak ma nam kaamma. Lo ma teteɗna hin tak tam ki teteɗ u ɗegee mamba.

¹⁷ Hin taa timigiina kini hu ɦoŋzi ma ɓeŋ kina, suu koyogina hin ti tlesuu vi suu ɦizinana kiyo.

¹⁸ Hahawra ka kay suu taɗ coro usi ko suuna taɗ mbutli suu zumma nana. Asi taɗ ɓak ma kaay kasina usi ko ndal mbutlina taɗ pus pusna usira na.

¹⁹ Asi ɓak tasi ana, «Ko dlara Yawe min a laɗta li ki zak. Kay a ami wi ki ana li ma Teteɗ ma vi suu Israelna hin tok, a ami wam ki u irimi may.»

²⁰ Hahawra, asi yi jivira ki a cora, yi cora ki a jivira may. Asi mbuɗ ndufunda ki a kiɗikka, mbuɗ kiɗikka ki a ndufunda may. Asi mbuɗ va ma galaana ki a ma heɓma, mbuɗ ma heɓma ki a ma galaana may.

²¹ Hahawra, asi koɗ tasi ni ana asi ni suu neeyna. Asi wi tasi ni ana asi yal cocoo.

²² Hahawra kay suu may suu ŋga tasi u ci summa cocona, kay suu may suu li ergena cocona lay.

²³ Asi mbuɗ dla cora vi sana ki jivira u begera, mbuɗ dlara ɗegeera vi sa ma va ka kombina ki cora may.

²⁴ Ko ndal usuna kura ŋgalam kira na, ko ŋgay wana ŋgal ki duk kura na may, asi hin cim ki u sariyasi halaŋ, ɓoosi hin yak ki duk semeɗna, kay asi hin haɗta vi Yawe, ma Saɓakŋa Kom Belna, kiyo. Asi noy boy ma vi sa ma Teteɗ ma vi suu Israelna kiyo.

Yara vi Yawera

²⁵ Kay ndaɗta huu Yawe ɓeŋ eg suu mamsina. Nam maɗ kom kasi casiya. Ҥinira halaŋ geŋeɗa, maɗasi gol cukira ga ko tlesuu delbuɗnana na. Na lay ni hurum ma ɓeŋ kina heɓ ka tuɗi, kom ka ni hu li ma yara gak.

²⁶ Yawe yi suu ay ki dayna asi mbaya, nam yasi ay ni hu vun ndaŋgara dodora day. Asi ɓaɗ ay mba ni na zak gaw.

²⁷ Duk suu asina ni sa tam loɓ kaɗi. Sa ma gu ɗaɓam sem kaɗi lay. Suu asina sa ma irim lam sen kaɗi, ma buu sen kaɗi lay. Gandi masina njuni hurusi ni na njun. Zew tuɓuru masina ja ka na ndeɗi lay.

²⁸ Sii mbuuru masira guuri cocoo. Gu mbuuru masira tini fokosi bel bel. Sem kulumi masisina ki eŋga ko gogoyra na. Sem pus pus masisina tuɗ fetta ko mbirwinda na.

²⁹ Suu asgaarina bay ko ndal dlona hu li ma nam vi tlena na, nam ŋgoɓ a vi tlena, sa ma ndak a ɓaɗam va namma ki funum kaɗi.

³⁰ Hu buu namma ni asi hin yal suu Israelna cocoo. Vunna hin zam ko ndal mbo lum ma ŋgolna a zamba na. Asi hin gol ndaŋgara na ni ndufunda u yoora cocoo. Kiɗikka hin mbuɗ ki ndufunda u kuɗna cocoo.