EZAYI 41 - Boy Lonana

Lona njun u suu Israelna

¹ Agi suu hu daara, lakagi en humugi haa. Agi suu wanna soogi tagiya fagi saɓakŋa. Ŋgoo dagan agi hin di boyna. Na daŋ may ɦuɗugi tagi aya, agi lay an lay a gaygijaŋ dlara.

² Sa ma col ay u maɗiina su kay suunana. Ҥam saɓak namma ni ka anɗi su? Nam dik njaf suu daŋŋa ki halaŋ, tayasi muli masisina ki ga u semu, ŋgew mam ma duuna gulukusi ki ko gugum ndaŋgara na. Asi dol ki kolo u semeɗna ko usuna na.

³ Nam dikisiya, jak hu ziisi ni va ka lambi. Sa ka humum sem ma tin kaŋganaɗi lay.

⁴ Sa ma njun a li dla ndaɗta nana ni gege ni ka anɗi su? Sa ma yi njaf suuna ay ki zeɗ zeɗ hu ura tin ayra day. An tanda Yawe ni ma ay fok jew dayna, an hin a daɓ daganda dodora ni an lay.

⁵ Suuna hu daara wi dlara an laɗta na ni, li ndaa cocoo, suu ha hu keŋ ndaŋgara dodora halaŋ ka dlak ndaana kay dlara ka lira halaŋ asi ka waɗu.

⁶ Suuna halaŋ ka njun tasiya, gegelay di saam ma vok zina ana, «Kak jiviya.»

⁷ Sa ma ceɗ tlena so huu sa ma yoo kawina, sa ma ka ɓalaŋŋa di sa ma ka waɗ u caffa kay do caffana ana nam li jiviya. Sa ma ka yoo tlena nam dam ana jiviya. Asi ɓal loogi masisina kaŋga u pondina.

Lagi ndaa oloɗi

⁸ Na may aŋ Israel saan ma sunda, Yakob aŋŋi sa ma an manaŋŋa, njaf Abraham, bananna.

⁹ An vaŋ ay ki ni hu vun ndaŋgara daɓpa day. Ay hu ii haga ndaɗta day an yaŋu, aŋŋi sa ma an di kaŋ ana, «Aŋŋi saan ma sunda an manaŋŋi aŋu, hiniŋ ka kiɗi.»

¹⁰ Li ndaaɗi kay an ka u aŋu, gol golla ndaanaɗi, kay anni Looŋŋa. An mbuɗuŋ saɓaki na daŋ may an njunuŋu. An njunuŋ u bikin ma njufna ma ɗegeena.

¹¹ Gola suu halaŋŋa hin mbuɗ zolona, hin fi ŋgulla. Suu may suu ay tli kura egeŋŋa halaŋ, asi hin mbuɗ ni ko sa kaɗira na, hin ba kiyo, suu hal honira u aŋŋa halaŋ.

¹² Aŋ halasi lay ni hin ka fasiɗi. Suu njogoɗ u aŋŋa hin ki ni ko sa kaɗira ɦawa na. Suu duu u aŋŋa halaŋ.

¹³ Kay an Yawe ni Looŋŋa, ma vaŋ koŋ ma njufna kolona, ni ma daŋ ana, «Li ndaaɗi an ka njunuŋuna.»

¹⁴ Yawe di ana, li ndaaɗi njaf Yakob, agi suu suuna tayagi ki ga ko njufulna nana, an min njunugiya. Sa ma suɗugi ay kina ni ma Teteɗ ma vi suu Israelna.

¹⁵ An hiniŋŋi ko ɓalaŋ ma wili ma to wana na. Aŋ hin to ɦinira kiyo, gulukuɗ ki lay, li ma mbuy kolona aŋ ceɗem ki gulukum ki lay.

¹⁶ Aŋ siirisi ki ko suuna a sii wanara na, semeɗna njayasi kiyo. Aŋ may ni hin li furi mayra Yawe ɦaŋgara, ni kay ma teteɗ ma vi suu Israelna.

Li ma haw mbona hin mbuɗ ki li ma mbona huna

¹⁷ Suu wihawra u suu ka ndakiɗina hal yona ni ka fambi. Ҥorosi ki sooy ko laa mbora. An Yawe an hin humusi cen masira, an Lo ma vi suu Israelna an ka hinisi kiɗi.

¹⁸ An hin wak lumma ki hu li ma mbo ka huɗina, goloŋga hu li ma haw mbona. An mbuɗ li ma ŋgoo bagi hu fullana ki li ma mbona, li ma yol yolla ki goloŋga lawra.

¹⁹ Duk gura ŋgus ka huɗira an hin day gu akasiyana, gu ma his jivina, u conona ki huwa. An hin day ŋgusugi suu jivina ki hu li ma ŋgus ka huɗina, gi teppe, sipre, orme u buwisna, halaŋ ko tasi dew.

²⁰ Kay a suuna gola, wi ana asi ndak a li dlara ko tasi dew. A asi wi ki ana ko Yawe li tle asina ni namu. Ma Teteɗ ma vi suu Israelna lasi ni namu.

Yawe ci wayra ii loogi suu ɦawana

²¹ Yawe mul ma vi njaf suu vi Yakobma di ana, agi fuli suu vi njaf suu warnana halaŋ mbaagi aya, dagi ci way magira ay kiyo.

²² Mbagi ay dami dlara hin a mbay fokka kiyo. Dlaagira agi daɗ ay ki jewra ni ana mege? Cuɗumira ay ki olo, a ami lay hin gol tami jiviya. Ami hin wi ki ana dla ndaɗta li kiwara may. Ɗowba takami dlara hin a li ha fokka kiyo.

²³ Dami tlesuu li ha fokŋa kiyo, ami hin wi ki ana agi ni loogina gassi. Takami dlara hin mbara ni ta jivira ɗowba, ni ta cora su, ko taygi halaŋ aygi hin gol dla ndaɗta waɗ uɗ may.

²⁴ Gola agi ki ni ko va ma ɦawana na, sun magira ki ni ɦawa lay. Sa ma managi a loommana ŋgal tam ki ni ɦawaa.

²⁵ Sa maa ay ka mbayaw dew an manam kiyo, tin ay u maɗiina na nam ka yanni senu, nam tay mulina ki ga u sem ko suuna a hoɓ luɓuna na. Ko ndal sa ma min doyogina taɓak luɓu mamma ki u semba na.

²⁶ Sa ma dukugi ma dam boy namma ay ki fok jewna ni gege? Tak tam ki ami wam gege. Sa ma di boy namma ay ki fok jew a ami di kam ana nam di ni gasira ni gege? Sa ma dam ki kaɗi, ma wam kaɗi lay, sa ma hum boy namma kaɗi lay.

²⁷ Anni sa ma di boy namma ay ki jew hu Siyonna, An sun sa ma di Boy ma Ayra ha hu Yerusalem.

²⁸ An gol suu goɓ loogi asina ni sa dew lay kaɗi, sa ma ɦal gaɗ maa ka dukusi dewɗi lay, an joɓmi sa ma ndak a hoŋ di kaɗi lay.

²⁹ Gola asi halaŋ ki ni ɦawaa, sun masira ki ni ɦawa lay. Tlegeyesi suu asi goɓosina ki ni semeɗna ɦawaa.