EZAYI 3 - Boy Lonana

Ɓak ma vi Yawena kay zi ma Yuda u Yerusalemma

¹ Na daŋ may, Bu Suuna Yawe, ma Saɓakŋa Kom Belna, yow njun mamba njun u Yuda u Yerusalemba kiyo. Ni njunda zeɗ zeɗ halaŋ, funa u yona lay nam ka ɦasisina oloɗi.

² Suu saɓakŋa u suu duuna suu ka ii ɓakŋa u suu jok vun Lona, suu joɓpa u suu ŋgolona,

³ muli suu suuna usi dok-vadl dok-vadlna, suu gaɗ ndarayasina, suu wi yal kumuna cocona u suu wi dlara vi dawra cocona suu asina halaŋ, Lona hin bulumusi kiyo.

⁴ An hin tin kasi a mulna ni gogoona, kemba hin ti mulla kasi ni asiya.

⁵ Suuna halaŋ hin li dla cora eg tasiya, sana u ndaram ma vok zina. Gorzoŋina li tasi u suu maarina sa ma va ka kombina li tam u sa ma ɦizina.

⁶ Buu ma hin mbaa ni, suu hu taraŋga dewra sa vi wayamma kemmi dam ana aŋ u baraw jivina taŋ may ni kak kami a mulna duk dlara co wanda.

⁷ Hu li namma ma hiŋŋa hin sawalla ana, «Anni ka sa ma garaɗ suuna kinaɗi, ha vo hu ziinni fu kaɗi lay, baraw kaɗi lay, ni agi ka ndak a kakan a mulna fok suunaɗi.»

⁸ Na daŋ may Yerusalem daɓ sem wa, Yuda bow ki ga wa. Dlara asi daɗta u sunda asi laɗ fok bibiŋilla vi Yawe ni ciwayra.

⁹ Irisira golla ka takasi coosira kiyo, asi tak dla coosira ki ko suu Sodomma na, asi ka ŋgayaɗi. Hahawra kasiya, asi mba dla cora kasi ni kay tasiya.

¹⁰ Di ana, Sa ma ɗegeena kak u furira. Nam fi jivira kay dlara nam ka laɗ u bik komba.

¹¹ Sa ma cona kak u hahawra, hahawra ka kamu, kay ɓakŋa hin ka kammi ko dlara nam laɗta na may.

¹² Ҥii, suu mansina kemba ka gologi ni asiya, boyogina ti mulla kagi ni asiya. Agi suu mansina ŋgara agi ŋga tagira baagi ki wa. Ndaɗ ɓalakagi voɗta agi a tuɗ huruɗta ki wa.

Yawe kaɓakŋa kay suu mamsina

¹³ Yawe col kolo kay dlaamba wa. Nam col kolo a kaɓakŋa kay suuna.

¹⁴ Yawe kal hu ɓakŋa u suu maana u muli suu fok suu mamsinana. Agi ni suu ti sene gugutlura kina, tlesuu agi ɦurumusi ay ki ko suu hawrana ka vo varagi lay.

¹⁵ Agi ɓaɗagi tlena ki ko suu mansina, ɦurum suu hawra ki lay ni kay mege? Di na ni Bu Suuna Yawe, ma Saɓakŋa Kom Belna.

Ɓakŋa kay boyogi suu Yerusalemma

¹⁶ Yawe di ana, boyogi suu Yerusalemma ŋga tasi coco, asi tuɗ ni delesi ki tini kolo na ta, irisira golla mbaɗ suuna coco lay, asi tuɗ ni ɓalaŋga soo sesi na ɦur.

¹⁷ Kay ndaɗta Bu Suuna hin wel yam gorɓii suu Siyonna kiyo. Nam hin hinisi vogosi ki siiliya.

¹⁸ Buu maa hin mbaa ni Bu Suuna hin paɗasi walakka humusira kiyo, weɗesi ɓalaŋga sesira ki lay, fuli masisina faɗta ugi tilna,

¹⁹ walakka humba, penera del kona, u tlesuu tasi wili wilina,

²⁰ jumba kasira, galina, gandina, guri suu sel mbul ma hisna u ganda,

²¹ kaɗumba u walakka kal cinna,

²² baraw ma gus loɓma u baraw ma fiyekŋa u mbumbura kosira sakossa,

²³ kotoromma, baraw ma fetna, baraw ma boɗ kay yamba u tlesuu vi tlimiɗ yamba ki gana.

²⁴ Mbul ma hisna hin mbuɗ hisni tlesuu buuyna, gandina hin mbuɗ ni zewna. Yamba gira hin kaa ni godlokka. Hin baraw ma jivina ki tani hin cukŋi baraw bolna. Jivira hin ki tani asi mbuɗ ki coo.

Boyogi suu dono suu hu Yerusalemma

²⁵ Njufii suu Yerusalemma hin casi ki u ŋgewina, suu magi suu saɓakŋa hin puk ha ki ŋgoo fun duuna.

²⁶ Vun grek ma Siyonna hin hawaɗ kiyo, boyogi suu vo hu zinna hin lak ki ni duk ndaŋgara.