EZAYI 2 - Boy Lonana

Mulla vi Yawera kay duliyara halaŋ

¹ Gola ni dlara Ezayi ma goŋ Amosna waɗ kay zi ma Yuda u Yerusalemma.

² Buu maa hin mbaa ni ɦinira hu ziŋ Yawera hin mbuɗ fiyek a su ɦinira daŋga halaŋ, ndaɗ hin kak a ŋgolla kay ɦinira daŋga bel bel. Njaf suu daŋŋa halaŋ hin taɓ ay ki uɗu.

³ Suuna bolowo hin yow kolo di ana, «Mbaygi aya ɗiŋiygi kolo kay ɦinira vi Yawera, hu zi ma vi Lo ma vi Yakobma. Nam hin takaygi voɗ mamba, aygi hin tuɗ hu voɗ ndaɗta.» Na daŋ may gaɗ ndaɗta col ay ni hu Siyon, boy ma vi Yawena col ay ni hu Yerusalem.

⁴ Nam hin li ni a sa ma ka ii ɓakŋa duk njaf suunana. Nam hin gi ii dlara duk njaf suuna bolowo. Ŋgewegi masi suu duuna asi hin dlasi ki kawira. Saɓii masisina asi hin dlasi ki maragamba. Suuna hinni ka li dlara duu duk tasi oloɗi. Sa ka haɗ yal ma duu oloɗi lay.

⁵ Agi njaf suu vi Yakobma mbaagi aya, tuɗuygi hu kiɗikka vi Yawera.

Buu ma vi Yawe ma kaɓakŋa

⁶ Bu Suuna, aŋ hin suu maŋsina ki wa, goryoŋ Yakobma, kay asi yow dlara vi suu u maɗiinara ay kasiya. Asi li kumuna ko suu Filistinna na. Ni kay taɓ u gor suu daŋŋara.

⁷ Mbas masira ki oy ugi gursuna u lorra, ii bege masira ka ŋgaay oloɗi lay. Mbas masira ki oy u kulumina, ii pupus masi ma kulumina ka ŋgaayɗi lay.

⁸ Mbas masira oy ki u dlara fulina. Asi goɓ ga fok tlesuu asi minisi u kosina, goɓmi fok tlesuu kosi minisina.

⁹ Sa warna yam hom kaŋga wa. Sana ki ni hoŋi dagani aŋ bulumusi coosira ki oloɗi.

¹⁰ Tuɗ ŋgay taŋ u ɦinira, ŋgay taŋ ga duk ndaŋgara kay ndaa Yawe u kiɗikka vi bibiŋil mamba.

¹¹ Hu buu namma ni suu ŋga tasina yasi hoŋ gaa, suu tli yasi kolona halaŋ hin hoŋ ki dagani. Hu buu namma geleɗta hinni maŋ Yawe dew.

¹² Kay ana buu ma vi Yawe, ma Saɓakŋa Kom Belna, hin mbaa, ni kay suu ka furiya, ŋga tasina u suu tli yasi kolona, suu asina halaŋ hin hoŋ ki dagani.

¹³ Nam hin ka gu ma yam ana sedre ma hu Libanna ma wul fiyeki cocona kiyo, u ɦoy ma hu mbassa Basanda lay,

¹⁴ kay ɦini mayra kolo dayra u li ma mbuy kolona halaŋ,

¹⁵ kay zigini suu mini kolo day dayna, kay gulumun ma mini ka sa kalɗina,

¹⁶ kay lum kawi ma ŋgolo ma hu Tarsis ma jivi cocona kiyo.

¹⁷ Ŋga tara vi suu warna hin daɓ kiyo, suu ŋga tasina halaŋ hin hoŋ ki dagani. Hu buu namma geleɗta hinni maŋ Yawe doy hol.

¹⁸ Fuli suu cona halaŋ hin daɓ kiyo.

¹⁹ Cukugi hu zul ɦinira, cukugi ga hu zul ndaŋgara ko ndaa Yawe u kiɗikka vi bibiŋil mamba. Hu li ma nam col kolona hin mbuɗ ndaŋgara ki ndaana.

²⁰ Hu buu namma suuna hin cuk fuli masi suu asi yoorosi a goɓosina ki fok gi kolomba u jujugumma.

²¹ Asi hin tuɗ ŋgay tasi ki hu zul ɦinira, ko ndaa Yawe u kiɗikka vi bibiŋil mamba. Hu li ma nam col kolo hin mbuɗ ndaŋgara ki ndaana.

²² Tin saa maŋga kay sanaɗi, musukka ni hu cinim tani ɦawaa, sana ni mege?