EZAYI 16 - Boy Lonana

Suu Moabma min ana Yerusalem njunusiya

¹ Ay hu ɦoŋzi ma Selana ŋgoo bagi hu fulla, suu Moabma sun goo timiina ay kay ɦinira Siyonda, ɦam ay ni maŋ mul ma Yudana.

² Vun voo ma Arnonna, suuna dik gorɓii suu Moabma ha ki ko gor layagina, suuna dikisi ki kay ziisira na.

³ Asi di suu Yudana ana, «Njunumiya, baa koŋ kami ko ŋgus ŋgolna li ŋgusum kay suuna hu li ma faɗta ka ti cocona na, njeŋge lay aŋ ŋgayamiya, ŋgay suu suuna dikisi ay kina, hinimi a asi famiɗi.

⁴ Ko ŋgayagi suu Moab ma lakŋi varaŋ tani. Aŋ li ni a sa ma njun kasi ko suu babali masisina, gak gak hu li ma ciwayra daɓ kira, hu li ma suu las suuna seŋ tasina, hu li ma lassa ka hu mbassa oloɗina.

⁵ Hu li ma mulla mbuɗ ti ni u minda, ni hu zi ma vi Davidna. Sa ma ɗegeena hin kak a kaɓakŋa nam hin ɓak suuna ni u ɗegeera tam fet kay a gi ii dlara.»

Yerusalem ka ndak a njun suu Moabnaɗi

⁶ Suu Yerusalemma di ana, Ami hum dla ŋga tara vi suu Moabma. Asi ni suu ŋga tasi cocona. Ami humusi dlaasira u ŋga taasira u gagaɗ masira lay, asi tli yam tasi kolo ni bay u boyna ɦawaa.

⁷ Cemini suu Moabma halaŋ ka yoo tasiya, asi yoo tasi ni halaŋ halaŋ. Asi tii tasi ni kay ti ma asi ka fam ay hu zi ma Kir Heres cocona.

⁸ Hay sene ma hu Hesebonna so ki wa u sene gugutlu ma Sibmana lay. Vuɗumba jivira guruɗ suu ŋgolo suu kay yam mbassana ki halaŋ halaŋ, fok jew ni kom la ha ki ta ta ŋgo mbo lum ma galakŋa, la ha ki ŋgoo bagi hu fulla Yazerra lay.

⁹ Cemini an tii ko tan u Yazer kay sene gugutlu ma Sibmana, an laɓagi ki u simiinu agi suu Hesebon u suu Elalena kay hu maɗak magina soolla furira ka oloɗi.

¹⁰ Furira u ayra viɗ ki hu li ma agi cuki hu wanna wa. Hu sene gugutluna ni sool kaɗi lay, furi ka oloɗi lay. Suu feɗ wana ka em sum veŋ hu zulla oloɗi. An doo soolla furira ki wa.

¹¹ Kay ndaɗta hurun yoo coco kay mbassa Moabba, hurun tan kay Kir Heres ɦay.

¹² Suu Moabma hin tuɗ kolo hu li ma teteɗna na zuk zuk, asi tuɗ cuk hu ziŋ Lonara a cenda, na lay ni ka fi hoŋ diɗi lay.

¹³ Ni boy ma Yawe dam ay ki kay suu Moabma day dayna.

¹⁴ Cemi ni Yawe di ana, «Hin fok basara na hindi ni, begera vi suu Moabma hin ba kiyo, suu zuli hu coco wanna hin njay ki lay.» Asi hinni na ew daŋ, sa ka ndumusi oloɗi.