EZAYI 11 - Boy Lonana

Sa ma hu njaf Davidna

¹ Na may ko sari gu ma ay gana na, mul ma daŋŋa col ay hu njaf Jese.

² Mul namma Musukka vi Yawera ka kamu, ni ŋgussa yalna, ta gi ii dlara kira, ŋgussa ɗilira, u saɓakŋa, ta wi dlara, ta li ndaa Yawera.

³ Nam oyra ni u ndaa ma lam u Yawena, Nam ka kaɓakŋa ni u dlara waɗ u irimba ɦawaɗi, nam ka kaɓakŋa kay njaɗta suuna njaɗaɗta ɦawaɗi.

⁴ Nam kaɓakŋa vi suu maŋina ni u ɗegee masira. Suu haw suu hu mbas mambana nam kaasi ɓak masina ni u minda. Sa ma las suuna nam kaam ɓak mamma ni u boy mamma tok. Nam ci suu cona ki ni u semeɗ ma kal ay ki funumma.

⁵ Ɗegeera ni a gandi ma njuni hurumma, gasira ni tlagara njuni hurumba may.

Bosogona hin buu ko tam u goo timiina

⁶ Bosogona hin buu ko tam u goo timiina, ndafurukka hin buu ko taɗ u ɦugunina. Dlona u gor mbutlina hin ti haɗna ko tasi dew. Gogoo ma goona hin taarasi ni namu.

⁷ Do mbutla u ŋguuna hin ti ni ko tasi dew, goryosi buu ni ko tasi dew lay. Dlona ko mbutlina na lay tini ti ma dewna.

⁸ Gogoo ma vuɗ wilina luu hu li ma ɦeenekŋa buu huna, gogoona ndak a kal kom hu zul magira lay.

⁹ Va ma co ka li kay ɦini manda teteɗtaɗi, ɓalakka kaɗi, kay yam mbassa halaŋ hin oy ki u wira vi Yawe, ko ndal mbona oy ki hu lummara na.

Buu ma suu Israelna hoŋ ay vona

¹⁰ Hu buu namma ni mul ma wilina col ay hu njaf David ma goŋ Jesena hin col ki fok suuna a va ma suuna wam halaŋŋa. Njaf suuna halaŋ hin halamu, daŋ may mamba hin lini bibiŋilla.

¹¹ Hu buu namma ni Bu Suuna hin maɗ kom njun kay suu mamsina a yamba mbara, kay a buɗ u suu mam suu hin ay ko suu Asirina u suu Egiptena ndena kira, suu ay hu Patros, Kus, Elam, Sinear u Hamatna u suu ay kay daara duk lum ŋgolnana may.

¹² Nam hin tak dla mayra ana nam hin tok yam suu mamsinara kiyo. Nam hin tok yam suu Yuda suu njay kina kiyo, suu ay ki keŋ ndaŋgara fiɗira halaŋ.

¹³ Honira vi suu Efrayimma ka oloɗi. Suu babali suu vi Yudana hin daɓ kiyo. Efrayim ka li honi duk tasi u Yuda oloɗi, Yuda ka li honi u Efrayim oloɗi may.

¹⁴ Njaf suu mba' asina taɓ tasi ni kay cee suu Filistinna suu u fiɗiginana dew. Asi taɓ dew tuɗ ɦurum suu u maɗiinana. Asi hin duu suu Edomma u suu Moabma goryoŋ Amonna hin li ki ni usi gaa.

¹⁵ Yawe hin so mbo lum ma Egiptena kiyo, nam hin maɗ kom kay mbo lum ma Eufratna, ni u semeɗ ma cuk ay ki funumma. Nam hin ɓorowosina irim ki zeɗ zeɗ kiɗisiya. Suuna hin tuɗ hu lumma ni u sesi ɦawaa.

¹⁶ Voɗta hin li hu maŋ suu mamsina maŋ u suu mam suu hin ay hu Asiri ndena. Ko ndal voɗta hin ay ki maŋ suu Israelna hu li ma asi sel ay ki hu Egiptera na may.