EZAYI 10 - Boy Lonana

Yara kiɗisiyara eg suu ŋgolo suu Yudana

¹ Hahawra ka kay suu tin gaɗta bay uɗta. Hu li ma asi ka ɓii gaɗ ndaɗta, asi ɓii ni dla cora kasi na ɗow.

² Suu ɗegeena asi tuɗusi fun ɓakŋa. Suu man suu hawra asi lasasiya, boyogi suu donora asi lasasiya, suu kuyuna asi ɦurumusi tlegeyesi kiyo.

³ Hu buu ma kaɓakŋa agi hin li tagi ni nanage? Hu li ma bil mbona mba wa toko ni agi hin li ni nanage? Sa ma agi hin liŋ egem a njun kagina ni gege? Bege magira agi hin cukuɗ ni arage?

⁴ Sa ma suɗ ki dew kaɗi, agi hin li ni cuki duk suu hu daŋgaynana, ɗowba duk suu a casi kina. Na lay ni Bu Suuna hurum heɓ ka eg suu Israelna tuɗi. Kom ka ki maɗii a lasasira tuwa.

Hahawra kay suu Asirina

⁵ Hahawra kay suu Asirina, tokolo manda yara, tokolora koŋ ndaɗta ni hurum ma ɓeŋŋa.

⁶ An sunum eg njaf suu ka wi Lonaɗina, an dikisi usi zak zak eg suu ka ɓalakan hurunna, kay a ɦurum jona, dikisi ziisi kira. Kay a tayasi ki ga ko ndal luɓuna tay ki u semmara na.

⁷ Na may mul ma Asirina hum ka na ɗowɗi, hurum ka saa naɗi. Saa mamba ni ana daɓ suu warna kiyo, nam min a gi njaf suuna ki ni bolowo.

⁸ Nam ɓii tam ana, «Suu ŋgolo man suu duuna kay tasi ni a mulina layɗi su?

⁹ An ti zi ma Kalnona u zi ma Karkemikŋa, ɦoŋzi ma vi Hamat u Arpadna, an ti zi ma Samarina u Damasna lay.

¹⁰ Kon vi ɦoŋzi ma goɓ fulina wa, fuli masisina bolow su suu Yerusalemma u suu Samarina.

¹¹ An dik zi ma Samarina ki u fuli masisina halaŋ. An hin dik Yerusalem ki u fuli masisina ni na may.»

¹² Bu Suuna di ana, «Lini an daɓ sun manda ay kolo kay ɦinira Siyonda u Yerusalemba ki wa ni, an hin kaɓakŋa kay mul ma Asirina, kay ŋga taamba u tlira nam tli yam kolora.»

¹³ Kay nam ɓak tam ana, «An li dla ndaɗta ni u saɓakan daŋ may, ni u yal manna, kay anni sa ma mbeleŋ cocoo. An bulum ii hakara vi suunara ki wa, ɦurumusi tlegeyesi suu ŋgayna ki lay. Ko sa ma saɓakŋa na an cuk suu laki kolo kay dlamba mullana ki ga halaŋ.

¹⁴ Kon yow begera vi suunara ki ko suuna a yow se layagina hu ziisira ɦawa na. Ko suuna yow se ma tlekka noyom kina na, anu, an ti mbassa halaŋ, sa ma a ŋgen tam fokon kaɗi, sa ma mal vunum a dan kaɗi lay.»

¹⁵ Bu Suuna di ana, «Njetna ndak ŋga tam kay sa ma ka guuna u namma su? Siina ndak a ŋgaɗam kay sa ma ka wak guna u namma su? Ko ndal tokolora zuɗ sa ma ndaɗ ka wi komma ha a waɗta ni ndaɗ su? Njewɗekka ka zuɗ sa ma waɗ u ndaɗnaɗi lay.»

¹⁶ Kay ndaɗta Bu Suuna Yawe, ma Saɓakŋa Kom Belna, hin mba tla cora kay suu ɗoorina, asi hin iɗ kiyo, yamba hin vi kura kasi ko kura ŋgalla na.

¹⁷ Lo ma vi suu Israelna ni kura, Lona ni kiɗikka vi suu Israelna, nammi sin kura ŋgalla, ni Lo ma teteɗna. Nam hin ŋgal gu ma siina kiyo, u meera lay ŋgalasi ki ni hu buu ma dewna.

¹⁸ Nam hin ŋgalasi ful masira jivira ki halaŋ halaŋ, hin lini ko sa a tuguɗiira ndak a miɗnara na.

¹⁹ Guguni suu hin hu mbas ndaɗtana ka bolow oloɗi, gogoona lay ndak a ndumusiya.

U Suu Israel suu hinna

²⁰ Hu buu namma ni u suu Israel suu hin ndena ka tin hurusi kay suu ka lasasina oloɗi. U njaf suu vi Yakob suu hin ndena ka goɓ suu lasasina oloɗi. Asi tin saa masira gasi ni kay Yawe, ni kay ma Teteɗ ma vi suu Israelna.

²¹ U suu hin ndena hin hoŋ aya, ni suu hin nde suu njaf Yakobma, hoŋ ay eg Lona ma saɓakŋa.

²² Ҥii Israel, lini suu maŋsina zuli ko ndal ŋgetlna doŋ lumma na lay ni, usira hin ndera hin hoŋ ay ni asiya. Ɓalakka tin ki kasi wa da, ɓak ma vi Lona ma gasina ka wa.

²³ Na daŋ may Bu Suuna Yawe, ma Saɓakŋa Kom Belna, hin kaɓakŋa ki kay yam mbassa halaŋ ko nam dira na.

Bu Suuna kaɓakŋa kay suu Asirina olo

²⁴ Kay ndaɗta Bu Suuna Yawe, ma Saɓakŋa Kom Belna, di ana, «Agi suu mansina, suu cuki hu Siyonna, lagi ndaa ko suu Asirinaɗi, asi suu ka poŋogi u tokolora, yow tokolo masira kolo egegi ko ndal suu Egiptena lagira na.

²⁵ Kay kak na njok, juɓ na ewni hurun ma ɓeŋina hin heɓ egegiya, yaanda hin hoŋŋi kasi may.»

²⁶ An Yawe, ma saɓakŋa kon belna, an hin tli balaf manna kolo kay suu Asirina, ko ndal an li suu Madiyanna ay jew day kay ɦinira Orebba na. An tli tokolo manda ay kolo kay mbo lumma Efratana ko an li ay u suu Egiptenara na may.

²⁷ Hu buu namma ni nek masira hin tli ki kagiya, jug masina hin paɗ ki kelegi may. Jug masi ma kelegina hin kus kiyo.

Suu babalira tew ki tok eg Yerusalem

²⁸ Suu duuna tew ki hu Ayat, asi jak ha hu Migroŋ, asi tuɗ ŋgay kawi masi suu duuna ni hu zi ma Mikmasna.

²⁹ Asi jak ŋguyra, asi tuɗ buu hu Geba, suu hu Ramana mbuɗ dlak ndaana cocoo, suu Gibea hu zi ma vi Solna yow ŋgayra gaw.

³⁰ Agi suu Galimma tiirigiya, agi suu Laysana humugi haa.

³¹ Hahawra kay Anatot, suu Madmena yow liŋŋa. Suu hu zi ma Gebimma lay pii wa.

³² Hu buu namma gawni, asi tew ki hu Nob, asi ka yorok kosi kay ɦinira Siyonda, kay zi ma Yerusalemma may.

³³ Gola Bu Suuna Yawe, ma Saɓakŋa Kom Belna, kaasi ay ki ga ko gogor guna na. Suu may suu dlasi ŋgol cocona nam kaasi kiyo. Suu sesi tii cocona ka oloɗi, hoŋ ki ga wa.

³⁴ Nam kaasi ki ga u njetna ko suuna ka gura kira na, guguni suu jivi coco hu Libanna suuna kaasi ki wa.