EZAYI 1 - Boy Lonana

¹ Gola ni dlara Ezayi ma goŋ Amosna waɗ kay zi ma Yudana u ma Yerusalemma, ni hu li ma Oziyas, Yotam, Ahaz u Ezekiyas a mulina hu mbassa Yudarana.

Suu may suu ka hum vunɗina

² Huulona, humugi haa, ndaŋgara tin humuk ha huma, Yawe ka ɓaka. An ɦal tina maŋ kemba wulusiya. Na may asi mbuɗ usi a duu u anu.

³ Mbutlna wi malam ma gam vona, korra wi bulla ndaɗ ti haɗna vi malaɗna hura. Suu Israelna ka wi va dewɗi, suu mansina yal masina kaɗi.

Mbassa Yudara ɓeŋ kiyo

⁴ Hahawra ka kay njaf suu co asina, suu may suu dlara vasina. Njaf suu li dla cora, gor suu mbuɗ dlara jivira ki dla corana. Asi noy Yawe kiyo, asi noy ma Teteɗ ma vi suu Israelna kiyo, asi hoŋ ki dagani, mbuɗ ŋgorosi mamu.

⁵ Agi min a waɗagi ni ana me ologe, agi suu tuɗ fok u dla cora gak gakŋa? Yagi halaŋ mbuɗ ki ni tuguɗiyo. Hurugi mbuɗ maŋiya.

⁶ Col ha ga kay semma ta ta tuɗ kolo kay yamba ni va ma jivi kaɗi, dagka, mbilna, u mbilna cuɗ loora. Sa ka mbus mbil nammaɗi lay, ka njunumbi lay, ka a do mbul ii mbilna a ɗerɗem irimbi lay.

⁷ Mbas magira mbuɗ ki ni ko ŋgoo bagira na, ɦoŋziigina ŋgal ki wa, suu daŋŋa tlagi mbas magira kiyo, mbassa ɓeŋ ki ko suu duuna a tli mbassa na, agi ka golosi may.

⁸ Yerusalem hinni ko ndal gi ma pam duk sene gugutluna na. Ni ko mbutluɓma pii ŋgoo duk senena ma kuusira na. Ni ko ɦoŋzi ma hin duk suu duuna ŋguyum yam kina na.

⁹ Lini Yawe, ma Saɓakŋa Kom Belna, ŋgomoygi gin na ɦiwɗi ni, aygi mbuɗ gin ni ko ndal Sodom u Gomor na.

Yi suuna kay homba

¹⁰ Humugi boy ma vi Yawena haa, agi suu ŋgolo suu Sodomma. Tin humugi hum haɗta vi Lonara agi suu Gomorna.

¹¹ Yawe di ana, An a li me u ɓivun magi ma agi lam coco wanna ni ge? Ɓivun ma agi ŋgal gamlagina, ŋgal mbul gor mbutlina na ndakan wa. Busu mbutlina, timigiina u ŋgegina, an ka minisi oloɗi.

¹² Hu li ma agi mbay a goɓonna sa ma ɦagi voɗta a tin segi hu ziinnana ni gege?

¹³ Mbaaran ki ɓivun ma ɦawa namma ay oloɗi, ndoos ma agi ɗusumma an ka minimbi. Luu ma vun tilna, buu ma vi Lonna, tokka tok tagira, an ka ndak a siɓ tle asinaɗi, kay agi ɓalak dla ndaɗta ki u dla coogira wa.

¹⁴ Hurun ka min luu magi ma vun tilna u tok magiraɗi, asi mbuɗ kanni ko nekka na, an loɓ wa, ka ndak a ziirisi oloɗi.

¹⁵ Hu li ma agi yow kogi kolo a cenda ni an baa irin kiyo, agi zul cenda coco lay ni an ka humbi. Kogi oyra ni u busuna.

¹⁶ Mbusugi tagi kiyo, mbuɗugi tagi ki teteɗ, sun magira cora agi laɗta hiniɗ kiyo, lagi dla co oloɗi.

¹⁷ Haɗagi tagi a li jivira, halagi ni ɗegeera, njun u suu ka lasna. Li jivira maŋ suu kuyuna, njun kay boyogi suu donora.

¹⁸ Yawe di ana, Mbaagi ay ɓakaygi boyna. Lini co magira tlawra na keŋ keŋ lay ni, ndaɗ hin mbuɗuɗ ki haɓpa ko fuɗta na. Lini ndaɗ tlaw ko busuna na lay ni, ndaɗ hin mbuɗuɗ ki haɓpa ko baraw haɓma na.

¹⁹ Lini agi humunu ni agi hin ti tlesuu jivi suu hu mbas ndaɗtana ni agiya.

²⁰ Na may lini agi ŋgella, mbuɗ tagi a suu babalira ni, ŋgewna hin fagi may. Ni boy ma Yawe damma.

Ҥoŋzi ma Yerusalemma mbuɗ ki teteɗ

²¹ Ni ana mege? Ҥoŋzi ma ɗegeena mbuɗ ki gawlaŋŋa ni nanage? Nam ay ni ɦoŋzi ma ɗegeena, dlara ɗegeera ay ni huwa. Cemi mbuɗ hu ni suu ci maɗna.

²² Yerusalem bege maŋga ɓeleŋ ki wa, sum maŋ ma jivina tlum ki u yona wa.

²³ Muli maŋsina mbuɗ ni suu babalira, taɓ vunsi ni u suu kulna. Asi halaŋ minni tlesuu suuna ɦasisinana. Asi cuɗ ni sem li ma a fi warakŋa huna. Asi ka li kem suu kuyuna jiviɗi, ka hum tii ma vi boyogi suu dononaɗi lay.

²⁴ Kay ndaɗta Bu Suuna Yawe, ma Saɓakŋa Kom Belna, mul ma vi suu duuna, saɓakŋa vi suu Israelna di ana, Hahawra, an hin sa sukulna kay suu gonok mansina, sa sugulun u suu babali mansina.

²⁵ Aŋ Yerusalem an hin mbuɗ konni kaŋu. An min mbuɗuŋ ki teteɗ ko kawi ma gam ay ki duk kura na. An min mbusuŋ zozoɗ maŋga ki halaŋ.

²⁶ An hin tin suu kaɓakŋa ko fok jewra na, suu ɗoɓ ii dlara ko jewra na lay. Ni suuna mbuɗ yaŋ ana ɦoŋzi ma ɗegeena, zi ma bay cora.

²⁷ Zi ma Siyonna hin suɗ ki ni u ɗegeera, suu may suu homma hin suɗ ni u ɗegeera may.

²⁸ Suu babalira u suu li dla cora hin ba ki halaŋ. Suu noy Yawe kina halaŋ hin ba kiyo.

Suu goɓ fok guna

²⁹ Agi suu goɓ ga fok ɦoy ŋgolnana hin mbuɗ zolona. Agi halaŋ hin mbuɗ zolona kay agi tin hurugi ni kay zi fuli magisina.

³⁰ Agi hin mbuɗ ni ko ɦoyna humum yak kira na. Ni ko sene ma sa ka voom yo umbina na.

³¹ Ko ndal fuɗ barawra kura ŋgeneɗ wa nde ni ndaɗ ŋgal kira na, na may sa ma saɓak cocona hin ŋgal ki u sun mamba cora ni na may, sa ma hin a tewem kuum ki kaɗi.