ESTER 9 - Boy Lonana

Suu Juifna sa sugulusiya

¹ Hu til ma doogo yam mba' ma yam ana Adarna, buuna doogo yam hindi ni hu li ma li u gaɗta vi mulnara, hu li ma suu babali suu vi suu Juifnana saa gin ana asi hin su kasiyana. Dlara iriɗ pereɗ ni na gaw. Suu Juifna mbuɗ kay suu li lasasina ni asiya.

² Suu Juifna tok tasi ki hu hoŋzina, ki hu ɦoŋzi ma bagi ma vi mulna Zersesna a yow suu hal gin a lasi dla cora egesina. Sa dew lay ni ka col fokosiɗi kay suuna halaŋ mbuɗ ki ndaana kosiya.

³ Suu ŋgolo suu sun suu hu ɦoŋzi ma bagina halaŋ, suu fok suu hu ɦoŋzi ma baginana, muli suu ŋgolona, suu ŋgolo suu sun suu vi mulnana njunni u suu Juifna kay ana asi mbuɗ ki ndaana ko Mardose.

⁴ Gasi daŋ may hu taraŋga vi mulna ni ŋgolo, sem tii ki hu ɦoŋzi ma bagina halaŋ halaŋ. Gasi daŋ may sa namma Mardose dlaamba tuɗ ni fok na ɗow ɗow.

⁵ Suu Juifna ci suu babali masisina ki u ŋgewna, casi kiyo, bulumusi kiyo. Asi li dlara eg suu ka minisiɗina ko hurusi minda na.

⁶ Hu Suz ɦoŋzi ma saɓakŋa suu Juifna ci suuna ki na kis kis vadl, bulumusi kiyo.

⁷ Parsandata, Dalfon u Aspata,

⁸ Porata, Adaliya u Aridata,

⁹ Parmasta, Arisay, Ariday u Vayzata,

¹⁰ Goryoŋ Haman suu doogona, goryoŋ Hamedata ma las suu Juifna asi casi kiyo. Na may asi hal ka a yow tlesuu hin ki hu jonanaɗi.

¹¹ Hu buu namma gaw ni ndum suu asi casi hu ɦoŋzi ma Suz ma saɓakŋa halaŋ tew ki eg mulna.

¹² Mulna di ca mulla, Ester, ana, «Suu Juifna ci suuna ki kis kis vadl hu Suz ɦoŋzi ma saɓakŋa u goryoŋ Haman suu doogona. Hu ɦoŋzi ma bagi ma vi mulna ma hinna asi hin li ni ana me ɗaŋge? Na may ni joɓ makka ni ana mege? Va ndak joɓ kamma hin ɦakŋa. Ndak tii takŋi kay me ologe? Dla ndaɗta hin li kiyo.»

¹³ Ester hoŋ dira ana, «Lini mulna hurum minna ni ko suu Juif suu hu Suzna fi voɗta a li dlara u gaɗta u saɓakŋa karami, ko ɓal goryoŋ Haman suu doogona ki kolo hu guna.»

¹⁴ Mulna di ana, «Dla ndaɗta hin liya.» Gaɗ ndaɗta asi hin ɓakaɗ ki hu Suz. Asi hin ɓal goryoŋ Hamanna ki koloo.

¹⁵ Suu Juif suu hu Suzna tok tasi ɗaŋŋi hu buuna doogo yam fiɗi hu til ma Adarna. Asi ci suuna hu Suz ni kis kis hindi. Na may asi hal ka a yow tlesuu hin ki hu jonanaɗi.

¹⁶ Suu Juif suu hu ɦoŋzi ma bagi ma vi mulnana tok tasi hin kakira jejegee, fi koɗ tara ko suu masi suu babalira ci suuna ki 75,000 duk suu ka minisi gin ɗina, na may asi hal ka a yow tlesuu hin ki hu jonanaɗi.

¹⁷ Ni hu buu ma doogo yam hindina hu til ma Adarna, hu buu ma doogo yam fiɗina asi koɗ tasi hin ti tina u furira.

¹⁸ Hu li ma suu Juif suu hu Suzna tok tasi hu buu ma doogo yam hindina u ma doogo yam fiɗina, hin koɗ tasi hu buu ma doogo yam vadl ma asi ti tina u furirana.

¹⁹ Ni kay ndaɗta suu Juif suu cuki hu ɦoŋzinana u suu cuki hu zigini suu hu ɦoŋzinana mbuɗ buu ma doogo yam fiɗi ma hu til ma Adarna ki a buu ma furira, ma ti ti ma luuna, sunum ki fun tasi na nde ndena.

Luu ma tinim a fafaɗtana

²⁰ Mardose ɓii dla ndaɗta ki kaŋga halaŋ ɓii ni hin sun magaara ki hu ɦoŋzi ma bagi ma vi mulna Zerses ma ha ki day dayna u ma tok tokŋa lay halaŋ.

²¹ A tin luu ma vun basara hu buu ma doogo yam fiɗina hu til ma Adarna, hu buu ma doogo yam vadlna may,

²² ko ndal buu ma suu Juifna fi koɗ tara ko suu masi suu babalira, til ma dlaasira iriɗ pereɗ ki asi ɗiŋ lum ma ɓaɗ ɦayna ki u furira, yoo tara mbuɗ ki furira may. Asi tin buu ma luuna u furira, sun nus tlena duk tasi lay, ɦal tlena ki ɦawa maŋ suu hawra lay.

²³ Suu Juifna vi dlara basira asi li laɗta u dlara Mardose ɓiirisira ayra.

²⁴ Haman, ma goŋ Hamedata ma Agag, ma las suu Juifna vi vunum ki kay suu Juifna a bulumusi kina, nam tuɗ gol tam aya, ni ana nam tuɗ tin garira ay a mba dla cora ay hin a bulumusi kira.

²⁵ May hu li ma dla ndaɗta mbay ki fok mulnana nam ɓak dla ndaɗta ki hin ɓii dla cora Haman laɗ vi vunum kay suu Juifnara ki ana dla ndaɗta hin ndi ni kay yamu, asi hin ɓalam ki kolo eg guna, nam u goryomu.

²⁶ Ni kay ndaɗta asi yi buu namma ana ni buu ma ki «ŋgaɓina» col ay u sem ŋgaɓpa. Ni kay ndaɗta dlara lasasi u ndaɗta halaŋ ta asi waɗ u irisira u dlara li egesira halaŋ.

²⁷ Suu Juifna tin gaɗta kaɗ hin vaɗ ki kasiya, kay njafasi lay kay suu taɓ u asina lay, asi ka hin bay li u buu ma mba' namma hu basara tew tew ko asi tin gaɗta ki kamba na hu buu ma ŋgaamma.

²⁸ Hu buu namma ni asi li um lay, li luuna lay, hu njafasi tew tew hu taraŋ gegelay hu ɦoŋzi ma bagi maanagelay, hu ɦoŋzi maanagelay. Buu ma ŋgaɓam ki namma hin ka bulum ki duk suu Juifnaɗi, luu ma hin lamma ka daɓ ki duk dee suu Juifnaɗi.

²⁹ Ca mulla, Ester, ta goŋ Abihailla u Mardose ma Juifna ɓii magaara toŋgo na zak a hoŋ dira kay buu ma ŋgaɓam kina.

³⁰ Asi hin sun magaara ki maŋ suu Juifna halaŋ halaŋ ki maŋ mbassa bagi ta 127 vi mulna Zersesna. Asi ɓakasi u heɓpa u ɗegeera.

³¹ Man buu ma ŋgaɓam kina ko Mardose ŋgaɓam ki kay suu Juifna u ca mulla Esterra na. Asi ŋgaɓ buu namma ki ni maŋ tasira lay, maŋ suu hu njafasina lay, ɦal voɗta maŋ suuna a li laara u tii tara.

³² Boy ma vi Esterna tin gaɗta kay buu ma ŋgaɓam kina. Dla ndaɗta hin ɓiiriɗ ki kaŋga hu magaara ŋgolla.