ESTER 8 - Boy Lonana

¹ Buu namma gaw ni mulna Zerses ɦal tlesuu vi Haman ma las suu Juifna ki maŋ ca mulla, Ester, halaŋ halaŋ. Mardose hin mbay fok mulna olo kay ana Ester ɓak dlara dukusi u namba kiyo.

² Mulna paɗ kaɗumba nam tlaɗ ay ki ko Hamanda ɦaɗ ki maŋ Mardose. Ester hin Mardose ki kay tlesuu vi Hamanna halaŋ halaŋ.

Gaɗta vi mulna a li jivira eg suu Juifnara

³ Ester hin ɓak fok mulna daŋgadla. Ndaɗ gi taɗ kaŋga u gayamu. Ndaɗ tiira, tii taɗ egem ana nam ɦuɗ dla co mayra Haman ma Agagŋa min a laɗta ki u dlara nam taɓaɗ hurum a laɗ eg suu Juifnara.

⁴ Mulna maɗ tokolo mamba lorra ay kolo maŋ Ester. Na ɗaŋŋi Ester hin col ki kolo mba col ki fok mulna.

⁵ Ndaɗ di ana, «Lini mulna hurum viya, lini an fi jivira fokomu, lini dla ndaɗta ii mulna jiviya, lini an irim jiviya ni ko asi ɓii a hal u magaara dla cora Haman ma goŋ Hamedata ma Agagŋa ɓiiriɗ a bulum suu Juifna ki hu ɦoŋzi ma vi mulna ma bagina halaŋ halaŋga.

⁶ Na gasi daŋ may ni an hin li ni ana me a siɓ dla cora hin mbay kay suu mansinara nige? An hin li ni ana me a siɓ bulumba bulumun suu hu njafanna kira nige?»

⁷ Mulna Zerses hoŋ dira maŋ ca mulla, Ester, u Mardose ma Juifna, ana, «Gola an ɦal begera vi Hamanda ki maŋ Ester halaŋ halaŋ. Nam tamba asi ɓalam ki kolo hu guna ni kay ana nam las suu Juifna.

⁸ Agi tagira may ɗaŋŋi ɓiirigi maŋ suu Juifna u sem mulna ko hurugi minda na, hin tinigi kaɗumba vi mulnara ha kaŋga huwa. Kay ana dlara ɓiiriɗ u sem mulna tinim kaɗum mamba ki kaŋga hura sa ka mbuɗuɗ zeɗɗi.»

⁹ Suu vi mulna suu ɓii magaara yasi ay ni hu li namma gaw. Ni hu til ma hindi ma yam ana Siwanna, hu buuna dok mba' yam hindi ni asi ɓii magaara ko boy ma Mardose damma na maŋ suu Juifna, maŋ suu komondana, maŋ suu muli suu ŋgolona, maŋ suu ŋgolo suu sun suu ha ki hu ɦoŋzi ma baginana ki hu ɦoŋzina 127, col ha hu Ind day ta ta tew ki hu Etiyopi, maŋ mbassa taaragelay u ɓii mamba, maŋ suu taaragelay u vun masina, maŋ suu Juifna u vun masi ma asi ɓiirimma.

¹⁰ Asi ɓii magaara u sem mulna Zerses hin tin kaɗumba vi mulnara huwa, hin sun magaa ndaɗta ki ko suu gi ii dlara hu li ma sundana u kulumi suu dogoni kulumi suu hinisi ki a li njafna vuɗusina.

¹¹ Gola ni boy ma ɓiirim hu magaarana, «Mulna ɦal voɗta maŋ suu Juif suu ki hu ɦoŋzinana dew dew bel ana asi tok eg tasiya, li kaki jejege a kiriɓ suuna, ci suuna, bulum suu asgaa suu taaragelay suu col ay hu ɦoŋzi maanagelay a lasasina kem gorira, boyogiina, ɦurumusi bege masira ki halaŋ halaŋ.

¹² Boy namma hin li ni hu ɦoŋzi ma vi mulna Zersesna halaŋ halaŋ hu buu ma dewna hol, ni hu buu ma doogo yam hindina hu til ma doogo yam mbana ma yam ana Adarna.

¹³ Magaara ɓiiriɗ ndaɗta hin ɓak ki kaɗ ni ko ndal gaɗta na hu ɦoŋzi ma bagina halaŋ, jok boy namma ki maŋ suuna halaŋ a hu buu namma suu Juifna li kaki tok a sa sugulusi u suu babali masisina.»

¹⁴ U gaɗta vi mulnara, magaara ɓiiriɗ ndaɗta tew ki ko suu li sunda may ni asi tuɗ ki u ndaɗ ni na zak gaw. Gaɗ ndaɗta asi hin ɓakaɗ ki hu Suz ɦoŋzi ma saɓakŋa.

¹⁵ Mardose kal ay ki vo vi mulna u baraw ma mulla ma vunum ŋgaɗi tus tusna cuki egemu, jum lorra mulla ŋgolla tini kam may, koɓoɗ baraw ma feɗ ma tam wili wilina. Suu hu ɦoŋzi ma Suzna yi kolo u delesira eŋga li furira.

¹⁶ Kay suu Juifna ni kiɗikka u furira gi boboora u furira.

¹⁷ Hu ɦoŋzi ma bagi maanagelay hu ɦoŋzi maanagelay ma gaɗta vi mulnara tew ki huna suu Juifna gi boboora li furira, li luuna u furira. Suu hu mbassana bolow mbuɗ tasi ki suu Juifna kay ana asi mbuɗ ki ndaana ko suu Juifna.