ESTER 7 - Boy Lonana

Hahawra u miɗ ma Haman miɗna

¹ Mulna u Haman mbay li luuna vi ca mulla, Ester.

² Hu buu ma mbana luuna daɓ ki daɓmi mulna hoŋ di Ester olo ana, «Ҥii, joɓ makka ni taarage, ca mulla, Ester? Va ma ndak joɓ kamma hin ɦakŋa. Ndak tii takŋi kay mege? Lini an ɦak nus li ma an ti mulla kamma wa ni daɓiɗi su?»

³ A hoŋ dira ni ca mulla, Ester, ɓak ana, «Ҥi, lini mulna wan hahawan wa, lini hurum minna ni hinin kak iiriya, joɓ manda ni na, ta vi suu mansinara ni na lay, tii ta manda ni na.

⁴ Gasi daŋ may ni ami ay ki ni gusiya, an u suu mansina. A kiriɓimi kira, a cami kira a bulumumi kira. Gasi daŋ may li ni ami ay ki ni gusi ko ndal mborɓogina na, ko suu li sunda maŋ suunana na ni, an hin seŋ tanu kay ana las ndaɗta ni asi ka ɓeŋ hu mulna kiɗi.»

⁵ Na ɗaŋŋi mulna ɓak ca mulla, Ester, daɗ ana, «Ni ge sa ma min tam a li dla ndaɗta nana ni arage?»

⁶ Ester hoŋ dira ana, «Sa lasanna u saan ma babalira ni Haman, sa ma dlam cona.» Na ɗaŋŋi Haman hurum ɓeŋ ki fok mulna u ca mulla.

⁷ Mulna u hurum ma cora col ki hin li ma luuna tuɗ ki u ŋgusugi suu hu taraŋgana. Haman hin kakira a joɓ ana hin ca mulla, Ester, iiriyara, kay nam wi ana dla cora a faɗta col ha ni ko mulna.

⁸ Hu li ma mulna hin u ŋgusugi suu hu taraŋgana ha ki hoŋ ay hu zira li luuna huruɗta ni, Haman ka ki buurira kay va ma kak ma fiyek ma vi Ester ma ndaɗ kak kamma. Mulna wam na gaw ni di ana, «Nam min a ɓeŋ ca mulla ki olo hu li ma ka hu zira tuna su?» Mulna mal vunum ɦal gaɗta ni na gaw, asi hin ɗag barawna ki kay ii Hamanni na.

⁹ Doli ɗini Harbona sa ma mulna tinim funum maa dew di fok mulna ana, «Gola gu ma Haman halam ay kay Mardose ma boy mamma jivi ii mulna cocona. Nam ka coli vo vi Haman u fiyekemba meter dok mba' yam vadlla.» Mulna di ana, «Ɓalam kolo hu gu namma.»

¹⁰ Asi hin ɓal Haman ki kolo hu gu ma nam halam ay kay Mardosena. Ni yara vi mulnara hin heɓ kiyo.