ESTER 5 - Boy Lonana

Yal ma Ester lam a tuɗ eg mulnana

¹ Gola ni dlara hin li buuna jak ki hindira. Ester cuk barawi maɗ suu ca mulla egeɗ ca ni hin col ki hu taraŋga vi mulna kurufu fun ziŋ mulnara. Mulna kaki kay dlam mamba mulla, fun ziim ma mulla, fun grek ma kal hurumma.

² Na ɗaŋŋi hu li ma mulna wi Ester, ca mulla, ki colira hu taraŋ mamba na ni nam waɗ hahawaɗu. Mulna maɗ kom u tokolo lor mamba komba maŋ Ester. Ester hin ɦuɗ taɗ ay hin kaw vun tokolora.

³ Na ɗaŋŋi mulna hin daɗ ana, «Ҥii, ca mulla, Ester, ni dla me fak ay ge? Ndak min joɓmi mege? Ta ta ɓorow nus li ma an ti mulla kamma ki lay ni an ɦakŋa ki maku.»

⁴ Na may Ester hoŋ dira ana, «Lini mulna hurum minna ni nam mbay ko tam u Haman hu luu ma an tinimma karam mamma.»

⁵ Na ɗaŋŋi mulna di ana, «Gagi hum Haman ay zak a nam tuɗ u yira Ester yi a li luunara.» Mulna mbay ko tam u Haman hu luu ma Ester tinimma.

⁶ Doli ɗini luuna daɓ ki may ni mulna joɓ Ester ana, «Va ma ndak joɓomma ni mege? Va namma an hin ɦakŋa. Va ma ndak joɓ kamma ni mege? An hin ɦak nus li ma an ti mulla kamma ni daɓiɗi su?»

⁷ Ester hoŋ dira ana, «Joɓ manda su? Va ma an joɓ kamma su?

⁸ Lini an fi jivira fok mulna, lini mulna hurum van joɓ manda, hoŋon dira kay joɓ manda ni nam mbay ko tam u Haman hu luu ma an hin tinim masina, an hin li vin u gaɗta vi mulnara may.»

Haman min guna ki kay Mardose

⁹ Haman kal ay ki hu buu namma ni u furira cocoo. Na may hu li ma Haman wi Mardose fun grekŋa vi mulna ka col ki koloɗi lay, ka li ndaana dlak fokombi lay, na ɗaŋŋi Haman hurum mbuɗ ki yara eg Mardose cocoo.

¹⁰ Hu li namma wanni Haman vi tam hin kal vo varamu. Nam hin sun hal banayamma ay u caamba, Zerses, olo.

¹¹ Haman hin ndumusi bege mamba ŋgolo ŋgolora kiyo, goryom suu bolowna ki may, dlara mulna laɗ kay jivi mamba hin mbuɗum ŋgolla kay suu mam suu sunda u suu li sunda vi mulnana.

¹² Haman hin ɓak ana, «Olo hu luu ma ndaɗ tinimma Ester yi ha ni mulna u an na hol. Vin olo, an hin tuɗ egeɗ u mulna ni anu.

¹³ Na may dla ndaɗta wanni sunuɗ ka irinda hu li ma an wi Mardose ma Juifna kakira fun grek mulnana.»

¹⁴ Na ɗaŋŋi Zerses, caamba, u banayamma halaŋ, dam ana, «Halaygi gu ma fiyekem metre dok mba' yam vadlna, vin maɗii wanni di mulna ana ɓalaygi Mardose ki hurumu, u furira ɗaŋŋi aŋ tuɗ ko taŋ u mulna hu li ma luuna olo.» Haman hurum vi boy namma hin hal guna.