ESTER 4 - Boy Lonana

Mardose yi Ester ay ana ndaɗ njun kamu

¹ Mardose hum dlara li ayra na halaŋ hummi, haa barawi mamsina kiyo. Nam cuk baraw bolla egemu, hin cuk buɗna kam may. Nam col ki hu ɦoŋzina dukka gayra ci luluura kolo u delemba ŋgolla.

² Olo, nam hin tuɗ ha ki ta ta vun grek ma vi mulnana kay ana sa ma u baraw bolla egemma ka ndak a kal hu vun grek mulnaɗi.

³ Doli ɗini ha ki hu ɦoŋzi ma bagina dew dew hu li ma gaɗta vi mulna tew ha ki huna ni suu Juifna mbuɗ ki hahawra ŋgolla, li laara lay, tii u simina lay, yoo tasi lay, suuna bolow coco cuk egesi ni baraw bolla may, buu ki ni kaŋga duk buɗna may.

⁴ Goryoŋ Ester suu gorɓiina u suu li sunda varaɗna mbay ɓakaɗ boy namma. Ca mulla saaraɗ jak ki na fak gaw. Ndaɗ hin sun barawna ha olo ana Mardose cukum egem fok baraw bol ma egemma kiyo. Na may nam min kaɗi.

⁵ Na ɗaŋŋi Ester yi Hatak, goo ma li sunda vi mulna maa dew ma nam tinim fokoɗna, sunum eg Mardose a wi dlara lira na ni kay mege?

⁶ Hatak kal ki a tuɗ ŋgaf Mardose hu li ma hu ɦoŋzina fun grekŋa vi mulnana.

⁷ Na ɗaŋŋi Mardose ɓakam dlara li egemba ki halaŋ u gursu ma Haman ŋgaam ki gin ana a ɦam maŋ sa golla vi mulnana ga a mbuɗ yam suu Juif suu a bulumusi ki ginna kirana lay.

⁸ Nam hin ɦam magaara gaɗta ɓakaɗ ay hu Suz kay a kiriɓisi kira a nam ɦaɗ maŋ Ester neeɗ yaɗ ki kay boy namma may daɗ ndaɗ tuɗ eg mulna a hal heɓpa hin tii taɗ fokom kay suu maɗsina.

⁹ Hatak mbay ɓak ki maŋ Ester kay boy ma vi Mardosena.

¹⁰ Na ɗaŋŋi Ester hin vun sunda ko Hatak eg Mardose dam ana,

¹¹ «Suu sunda vi mulna halaŋ u suu hu ɦoŋzi ma bagina vi mulna wi ana gasi lini gegelay sa njufu, caa ma tuɗ eg mulna hu taraŋga bay yam haa ni gaɗta kam dewra ni cira cam kira, hol li ni mulna takam tokolo mamba lorra wa ni nam hin kak iiriya. Kan anni buuna jak ki dok hindi bay sa yan a tuɗ hu taraŋga vi mulna.»

¹² Asi ɓak boy ma vi Esterna ki maŋ Mardose.

¹³ Na ɗaŋŋi a hoŋ dira maŋ Ester ni Mardose di ana, «Saa kak ana ndak ki hu taraŋga vi mulna wanni ki ni zeɗ u suu Juif suu hiŋŋa halaŋ ndak hin suɗ kiyo naɗi.

¹⁴ Lini ko ndaɗta na ndak ka seŋ vunuk ki ni njunda u buɗta hin buɗ suu Juifna kira hin col ay hu li ma daŋŋa, ndak u suu maksina hin kiriɓigi kiyo. Doli ɗini sa wina ni gege? Dla ndaɗta li hin ka li ni hu li ma ndak ka hu ca mullaɗina kalage?»

¹⁵ A hoŋ dira maŋ Mardose ni Ester di ana,

¹⁶ «Tuɗ tok suu Juif suu ka hu Suzna halaŋ, lagi laara kanu, tagi vaɗi lay, cagi vaɗi lay buuna hindi, faaliɗi lay, njeŋgeɗi lay. An tanda u goryon suu gorɓiina, an hin li laara ni na lay. Kay ndaɗta ko gaɗta dira na ni an hin tuɗ eg mulna li ni an a miɗ ki lay ni an hin miɗa.»

¹⁷ Mardose hin ɦuɗ tam ki hin li dlara Ester dambara halaŋ.