ESTER 3 - Boy Lonana

Honira duk ɦoŋ Haman u Mardosera

¹ Ŋgoo dagan dla ndaɗta mulna Zerses ɦal sunda ŋgolla maŋ Haman ma goŋ Hamedata ma Agagŋa. Nam tlam tinim a ŋgolla kay suu ŋgolo suu li sunda u namma halaŋ halaŋ.

² Suu li sunda vi mulna suu ka hu vun grekŋana halaŋ goɓ kaŋga u vok givisi fok Haman ko mulna ɓak ay kamba na. Na may ni Mardose goɓ ka kaŋga u vok givimbi.

³ Suu li sunda vi mulna vun grekŋana halaŋ di Mardose ana, «Aŋ calaɗ kay gaɗta vi mulnara ni kay mege?»

⁴ Asi ɓakam kay dla ndaɗta hu buuna tew tew, may nam ka humusiɗi. Na ɗaŋŋi asi hin jok boy namma ki maŋ Haman a wi ki ana na ni dlara Mardose laɗta hin tuɗ fok sura, gasi daŋ may ni nam ɓakasi ki ana nammi sa ma Juifna.

⁵ Haman wi ana Mardose ka goɓ kaŋga fokom u vok givimbi ni hurum mbuɗ yara cocoo.

⁶ Na may nam ka min a vi Mardose holɗi kay ana asi ɓakam ki kay suu mamsina lay. Haman hal a kiriɓ ki ni suu vi Mardosena, ni ana suu Juif suu ka hu mulla vi Zersesna halaŋ halaŋ.

⁷ Hu til ma jewna, ni ana til Nisan, hu basara doogo yam mbara vi Zerses ta mulla, asi li va ma gi u dlara kina, ni ana dewna fok Haman, jak buu ma wanna kiyo, hin jak hu ndaramma, jak til ma wanna kiyo hin jak hu ndaramma, tilna doogo yam mba' ni ana til Adar.

Haman min tam a kiriɓ suu Juifna kiyo

⁸ Na ɗaŋŋi Haman di mulna Zerses ana, «Suu ka ki kay tasi ɓorowiya, irisi ka ki kaay duk suu hu ɦoŋzi ma aŋ ti mulla kamma halaŋ halaŋ. Gaɗ masira ki zeɗ u ta vi suunara halaŋ halaŋ. Asi ka li u gaɗta vi mulnaraɗi. Mulna hin a hinisi kaki ɦawa na enɗi may.

⁹ Lini mulna hurum vi wa ni hin ɓii magaara kay a bulumusi kira. An hin ndum silira doonora na buɓ buɓ doogo ko suu ŋgolo suu sunda a asi tuɗum ha hu li ma golla.»

¹⁰ Na ɗaŋŋi mulna paɗ kaɗumba kay komba ɦaɗ ki maŋ Haman ma goŋ Hamedata ma Agagŋa, ma babali suu Juifna.

¹¹ Olo, mulna hin di Haman ana, «Gursuna ami noyoŋŋa ha wa, suuna lay a aŋ li dlara huruŋ minda egesiya.»

¹² Suu ɓii magaara vi mulnana halaŋ yasi ay hu til ma jewna hu buuna doogo yam hindi, asi hin ɓii ni ko gaɗta Haman daɗta na daŋ may, maŋ suu komanda suu vi mulnana, maŋ muli suu ŋgolo suu hu ɦoŋzi ma bagina dew dew lay, maŋ muli suu fok suunana dew dew, ki hu ɦoŋzina dew dew ko nam ɓiira na, gegelay ni u vun mamma. Asi ɓii ha ni u sem mulna Zerses, hin tin ha kaŋga hu ni kaɗumba vi mulnara may.

¹³ Olo, asi hin sun magaa ndaɗta ki hu ɦoŋzi ma bagina halaŋ halaŋ a kiriɓ suuna, ci suuna, bulum suu Juifna ki halaŋ halaŋga, zoŋŋina u suu maarina, kem gorira u boyogiina hu buu ma dewna, hu buuna doogo yam hindi hu til ma doogo yam mbana, ni ana hu til Adar til ma hindina a ɦurumusi tlegeyesi kira.

¹⁴ Magaa ndaɗta hin ɓak ki kaɗ hu ɦoŋzi ma bagina dew dew ko gaɗta na maŋ suuna a asi li kaki tok hu buu ma damma.

¹⁵ U gaɗta vi mulnara magaara sel ay ki ni na zak zak gaw, gaɗ ndaɗta hin ɓakaɗ ki hu Suz ɦoŋzi ma saɓakŋa. Haman u mulna kak kaŋga a cira, na may suu hu ɦoŋzinana saa cocoo.