ESTER 2 - Boy Lonana

Ester mbuɗ ki a ca mulla

¹ Ŋgoo dagan dlara li ndaɗta hu li ma yara vi mulna Zerses heɓ kina, humum gam kay Vasti kay dlara ndaɗ laɗta, kay dlara ɓakaɗ ki kaɗta.

² Suu li sunda hu taraŋ mambana di ɗaŋŋi ana, «Halaygi gorɓii suu bay buu u sa njuf tuna, suu iriŋ dlaɗ ki egesi ko jivna na dlaɗna maŋ mulna.

³ Ko mulna tin suu ŋgolo suu sunda ki hu ɦoŋzi ma ŋgoo bagina halaŋ halaŋ a yow gorɓii suu buu ka u sa njuf tuɗina ay halaŋ halaŋ. Suu iriŋ dlaɗ ki egesi ko jivna na dlaɗ na, ay hu Suz, ɦoŋzi ma saɓakŋa, hu zi ma gorɓiina u Hege, sa ŋgol ma vi mulna ma gol u gorɓiina. Asi hin ɓorowosi mbul ma his jivina.

⁴ Go tamara ndi ii mulna ndira hin ti a ca mulla balam Vasti.» Dla ndaɗta li ii mulna jiviya. Nam hin li ni ko ndaɗta na.

⁵ Sana dew ka hu Suz ɦoŋzi ma saɓakŋa yam ana Mardose hu njafna vi Yair, Simey, u Kis sa ma hu deera vi Benjaminda.

⁶ Nammi duk suu hu Yerusalem suu mul ma Babilonna, Nabukodonosor, yowosi ki mbaɓura ko tasi u Yoyakin, mul ma Yudanana.

⁷ Doli ɗini nammi malaŋ Mirtena, Ester ni wayamba, kay ana ndaɗ suɗ kaɗi lay, buɗ kaɗi lay. Go tama ndaɗta tliwiɗ tin jivi ɦay, iriŋ dlaɗ egeɗ ko jivna ni na dlaɗ. Hu li ma buɗ u suɗ miɗ kina Mardose wuluɗ varam ko goromba na.

⁸ Ŋgoo dagan ɓak ma mulna ɦal voɗta u gaɗta yow gorɓii suu jivi ɦayna ay hu ɦoŋzi ma Suzna u gaɗta vi Hegena, asi mba Ester ay hu taraŋga vi mulnara u gaɗta vi Hege sa ma gol u boyogiina.

⁹ Go tama ndaɗta ndi irimu hin fi jivira fokomu. Nam ɓaɗ tam tongo zak ɦaɗ mbul ma his jivina u tlesuu ndaɗ tasina, ɦaɗ gorɓii suu li sunda hu taraŋga vi mulnana kiɗisiya may. Nam hin jokoɗ uɗ u gorɓii maɗsina hu li ma jivina hu zi ma gorɓiina.

¹⁰ Ester ka ɓak dla suu maɗsinaɗi lay, dla somoyoɗɗi lay kay ana Mardose dooroɗ ki kay dla ndaɗta.

¹¹ Hu buuna tew tew ni Mardose ka poy fun li ma boyogiina kaki huna a Ester ka ni nanage, asi ka laɗ ni nanagera.

¹² Hu li ma go tama taa dew daɓ lira li u gaɗ ta tiniɗ kay boyogiina u eŋga ii tilna doogo yam mbara daɓmi ŋguyra mba ni kaɗ a ndaɗ tuɗ eg mulna Zersessa. Cokira lumuɗna li ni ko wanda na, li tilna karkiya u mbul ma his jivina olo tilna karkiya u mbul ma dirnikŋa may, mbul ma jivi ma vi boyogiinana may.

¹³ Gola wan ɗaŋŋi go tamara tuɗ eg mulna ni ko wanda na, asi ɦaɗ tlesuu ndaɗ joɓosi a yowosi koɗ hu li ma boyogiina ka hu taraŋga vi mulnara.

¹⁴ Fiɗigi ndaɗ tuɗa, maɗii ndaɗ hoŋ ay hu zi ma vi boyogiinana a mbara u Sasgaz sa ŋgol ma vi mulna ma gol u boyogiina. Ndaɗ hin ka tuɗ eg mulna oloɗi, lini mulna hurum miniɗ ka a yaɗ ay ki u seɗ yiiɗi.

¹⁵ Kay Ester may ni, goŋ Abihail ma ndusuŋ Mardose ma wuluɗna ta tamara, ŋguyra mbay kaɗ a tuɗ eg mulnara, ndaɗ joɓ va ma daŋ kaɗi ni tlesuu sa ŋgol ma vi mulna ma gol u boyogiina ɓakaɗ ha kasina doy hol. Ester suu waɗna halaŋ saarasi tin ki kaɗ halaŋ halaŋ.

¹⁶ Asi tuɗ Ester ha eg mulna Zerses hu taraŋ mamba mulla hu til ma doogona, ni ana hu til ma yam ana Tebetna, hu basa mulna ta kiɗisiya ta mulla.

¹⁷ Mulna hurum min Ester su boyogii suu daŋa halaŋ halaŋ, hurum tin ki kaɗ u jivi mamba su gorɓii suu daŋa halaŋ halaŋ. Nam hin tiniɗ jumba ca mulla kay yaɗ hin tiniɗ ki a ca mulla balam Vasti.

¹⁸ Olo kay suu mam suu ŋgolo suu sunda u suu mam suu sunda mulna tin luu ma ŋgolna, luu ma vi Esterna. Nam bulum taara ki kay ɦoŋzi ma bagina hin ɦal tlena ki ɦalla ɦawara kay mulla.

¹⁹ Hu li ma yow gorɓiina ay ki a mbarana Mardose kak ki fun ziŋ mulnana.

²⁰ Ester ɓak dla somoyoɗ kaɗi lay, dla suu maɗsina kaɗi lay ko Mardose daɗta na, Ester li u boy ma vi Mardosena ni ko ndal ndaɗ li ay u gaɗ mamba tura na.

Mardose fi u kaboyna kiyo

²¹ Hu coki ndaɗta na ɗaŋŋi Mardose kak ki fun grek ma vi mulnana u suu ŋgolo suu sun suu vi mulnana mba', Bigtan u Teres suu gol u vun grek ma gagayna, mbuɗ ki yara hal a vi mulna Zerses cam kiyo.

²² Na may dla ndaɗta Mardose humuɗ ki hin jokoɗ ki maŋ ca mulla, Ester, Ester hin di dla ndaɗta ki maŋ mulna u sem Mardose.

²³ Dla ndaɗta hin halaɗ uɗ ki hal ni hin fi malayaɗna. Suu ŋgolo suu sun suu mba' asina hin ɓalasi ki kolo fun guna. Boy namma hin ɓiirim ki kaŋga hu magaara ŋgolla dlara halaŋ huruɗta fok mulna.