EFESNA 5 - Boy Lonana

Poyogi hu kiɗikka

¹ Agi ni goryoŋ Lona suu nam minigina, soogi tagi ko nam lira na may.

² Poy magira mba tak ki u minda ko Kristu minigira na, ɦal iiri mamba ki kaya ko ɦala ɓivun ma fayatna ii Lona na.

³ Agi suu vi Lonana, njaf cora ko boy zoŋga, bay ɗegeera, ŋgiziɗ tlena vi saa, ni halaŋ mba li dukugiɗi.

⁴ Ka jivi kay agi a ɓak boy ma njenjenaɗi, boy ma giniŋŋa u ma ka u voɗombina lay agi ɓakambi. Cenegi Lona u gi deɓpa na ɗow.

⁵ Wagi ki kagi anaba sa li zoŋga u sa li dlara njenjera u sa hal tlena vi suuna, (kay hal tlena vi suuna ni ko sa goɓ fulina na) sa namma ka kal hu mulla vi Kristura ura vi Lonaraɗi.

⁶ Hin sa a ganagi yagi u boy ma ɦay ɦaynaɗi, yara vi Lonara hin mba kay suu ka hum umbina ni kay cora ko ndaɗta nara.

⁷ Taɓagi u suu asinaɗi.

⁸ Agi li ay jew ni hu ndufunda, cecemi hu taɓ magira u Bu Suunara agi mbuɗ ni hu kiɗikka, ni kay ndaɗta poyogi ko suu hu kiɗikkana na.

⁹ Kiɗikka vuɗ ni njaf jivira, zeɗ zeɗ halaŋ, u ɗegeera u gasira.

¹⁰ Soogi tagi kay a ɓorow duk ɦoŋ tlesuu jivi ii Bu Suunana.

¹¹ Taɓagi u suu li dlara dadamba vi ndufundaɗi, takasi dlaasira ndaɗta ki kiɗiki.

¹² (Suuna li zolona kay dlara vi suu asina laɗ ŋgayra).

¹³ Hu li ma sun masira ndaɗta tak ki kiɗik wa ni u dlaasira hin gi ki ni na ɗal ɗal gaw.

¹⁴ Ni va ma tak ki ɗal ɗalna hin mbuɗ ki kiɗiki kay ndaɗta boyna di anaba, «Dliɗ ki koloo aŋ sa ma buu senna, col ki kolo duk suu miɗina, Kristu hin ɓo lina ki kaŋ kiɗiki.»

¹⁵ Gol tagi jivi hu poyra agi poyra, poyogi ko suu laɓana naɗi, ko suu neeyna na.

¹⁶ Lagi jivira hu dlara agi ka laɗta halaŋ kay lima aygi ka hurum cecemi wanna ni coo.

¹⁷ Ni kay ndaɗta lagi tagi laɓaɗi, soogi tagi kay a hum va ma Bu Suuna min a agi lamma.

¹⁸ Guruɗugi tagi u summaɗi, kay dla ndaɗta ndak a tuɗugi hu poyra cora, hoɓogi ni u Musuk Lonara na ɗow.

¹⁹ Njunugi tagiya tagiya, u soolla, gi soolla geleɗta u soolla Musukka, gi soolla geleɗ Bu Suuna, geleɗem u hurugi halaŋ.

²⁰ Gagi deɓ Lona Buna hu lina halaŋ u sem Bu Suuna mayna Yesu Kristu.

Boyogina u njufina

²¹ Humugi u tagiya tagiya kay humba agi ka hum u Kristura.

²² Boyogina humugi u njufuyugiya, ko agi hum u Bu Suunara na.

²³ Sa njufna ni mul ma vi caambana, ko Kristu ni mulna vi suu vi Kristuna na may, Kristu kay tamba ni Sa Suɗta vi suu vi Kristuna, asi ni mbalatamu.

²⁴ Ni boyogina mba hum u njufuyusi ni hu tlena halaŋ ko suu vi Kristuna hum u Kristura na may.

²⁵ Agi njufina minigi boyogogiya ko Kristu min suu vinara na may, ɦal iiri mamba ki kasiya.

²⁶ Nam li na ni kay a mbuɗ suu vi Kristuna ki suu ndakina maŋ Lona, ni hu li ma nam ɦokosi ki u yona u boyna.

²⁷ Nam li na ni kay a col suu vi Kristuna ki fokom u jivi masira u tamba ki teteɗ, cora ka huɗi, zozot ka huɗi lay, turubut ka huɗi lay, va ma daŋ ma co ka huna ndeɗi lay.

²⁸ Njufina lay min boyogosi ko asi min tasira na, sa ma min caambana minni tamu.

²⁹ Sa ka li va ma co eg mbalatambi, ni na ɗow ana ɦal tina maŋ tamu, li u tam lay, gol tam ko Kristu li u suu vinara na may.

³⁰ Kay mege aygi ni mbalatara dewra.

³¹ Ko magaara di ana, «Ni kay ndaɗta sana hin bum u sum kiyo kak u caamba, asi jak mbuɗ ni mbalatara dewra.»

³² Ni gasi mayra ŋgolla tak ki ni hu boy namma, nam anaba boy namma tak ki ni kay Kristu u suu vina.

³³ Boy namma dini magi agi may, lini nanagelay sa njufna min caamba ko tamba na may, cara vi vun njufuɗ may.