DLAŊ LEVIRA 9 - Boy Lonana

Aaron gijaŋ sun mamba li ɓivunna

¹ Hu buu ma kalavandina ɗaŋŋi Moiz yi Aaron u goryomu, yi suu ŋgolo suu Israelna may.

² Nam di Aaron ana, «Ҥal goo mbutl ma njufna ay dew a li ɓivun ma bulum cora kina may, ɦal gamla timii ay dew a li ɓivun ma ŋgalam kina may. Asi jakŋi yoori suu bay ŋgulla egesina, mbaarasi ay fok Yawe tani.

³ Ŋgoo dagan aŋ hin di suu Israelna ana, Vagi ɦu ŋgekŋa a li ɓivun ma bulum cora kina, vi goo mbutl ma basaɗam dewna u goo timii ma basaɗam dewna may. Ni yoori suu bay ŋgulla egesina a li ɓivun ma ŋgalam ki ŋgalina.

⁴ Vi bolo mbutlna u gamla timiina a li ɓivun ma mbaa heɓpa fok Yawena u puura u njaf wa ma yarasi u mbulnana may, kay Yawe hin tak tam ki karam irigiya.»

⁵ Tlesuu Moiz joɓosina halaŋ asi mbaarasi ay ki fun Mbutliɓ ma tokka. Ŋgoo dagan suu tokina halaŋ ɦuɗ tasi aya, yow ki kolo u sesi halaŋ fok Yawe.

⁶ Moiz di ana, «Gola ni dlara Yawe min ana agi laɗta kay ana bibiŋilla vi Yawera tak taɗ ki irigiya.»

⁷ Ŋgoo dagan Moiz hin di Aaron ana, «Ҥuɗ taŋ ay eg givin ma togolla, li ɓivun maŋ ma bulum cora kina, ŋgal ɓivun maŋ ma ŋgalam kina kay taŋga u suu maŋsina halaŋ. Ŋgoo dagan li ɓivun ma bulum cora vi suu halaŋŋa kira may, ko ndal Yawe daŋga na.»

⁸ Aaron ɦuɗ tam eg givin ma togolla, ŋgaɗ goo mbutlna kay a li ɓivun ma bulum coom tambara kina.

⁹ Goryoŋ Aaronna ɦam busu mbutlna aya, nam kal gor gor kom duku, tin busuna eg mek ma ŋguy kay givin ma togolla, busu ma hinna nam voom u givin ma togolla.

¹⁰ Nam ŋgal mbulna, gilissa u duduk va ma ɓivunna hu givin ma togolla ko Yawe di Moizza na.

¹¹ Tliwna u bakŋa halaŋ nam ŋgalasi ha ki doŋ kaana.

¹² Aaron hin ŋgaɗ ɓivun ma ŋgalam ki ŋgalina, goryoŋ Aaronna ɦam busuna nam yamam ki kay givin ma togolla, ɓivunna ŋgufum ki na cutl.

¹³ Asi ɓorow ɓivun ma ŋgalam kina ii dokka ay ki na zeɗ zeɗ, u yamba lay, ɦasi maŋ Aaron, nam ŋgalasi kay givin ma togolla.

¹⁴ Nam mbus yorotna u kewetta ki halaŋ, ŋgalasi ki u suu hiŋŋa lay.

¹⁵ Ŋgoo dagan Aaron tuɗ ɓivun ma vi suu halaŋŋa fok Bu Suuna. Nam vi ɦu ŋgekŋa a li ɓivun ma bulum cora vi suuna kina. Nam ŋgaɗamu, ni a va ma ɓivun ma fok jewna.

¹⁶ Nam li ɓivun ma ŋgalam ki ŋgalina ko gaɗta dira na.

¹⁷ Nam li puura u njaf wanara, yow fuɗta duk kom na dew, ŋgalaɗ kay givin ma togolla, ni ɓivun ma ŋgalam kina, ko nam li puura maɗii tew tewra na.

¹⁸ Nam ŋgaɗ bolo mbutlna u gamla ma suuna ɦam ay a li ɓivun ma heɓpana. Goryoŋ Aaronna ɦam busuna, nam yamam ŋguyum ki kay givin ma togolla na cutl.

¹⁹ Tliw ma mbul ma ay huu mbutlna u timiinana halaŋ nam yowomu, ni njawra, mbul ma hurusina, gilissa u dudukka halaŋ.

²⁰ Asi yowosi u gudikisi halaŋ, tuɗ ŋgalasi hu givin ma togolla.

²¹ Aaron tak dikŋa u gay ma njufna u geŋeɗta geŋeɗ tam a li ɓivunna fok Yawera ko Moiz damba na.

²² Aaron daɓ ɓivun ma bulum cora kina, u ɓivun ma ŋgalam ki ŋgalina u ɓivun ma heɓpa daɓmi, ŋgoo dagan nam yow kom kolo kay suuna, paɗ vunum ki kasiya. Nam cuk ay ki gaa.

²³ Moiz u Aaron cuk hu Mbutluɓ ma Tokka, hin hoŋ ay ki bunsu a paɗ vunusi ki kay suunara. Hu li namma ni bibiŋil Yawera tak taɗ ki ii suuna halaŋ.

²⁴ Kura kal ay ki fok Yawe ŋgal ɓivun ma ŋgalam kina u mbul ma cuki hu givin ma togolla ki halaŋ. Suuna halaŋ wi dla ndaɗta ki u irisiya. Asi sawalla kolo u furira, goɓ ga a ŋga Lona u cenda may.