DLAŊ LEVIRA 6 - Boy Lonana

Gaɗta maŋ muli suu li ɓivunna kay ɓivun ma asi lamma

¹ Yawe di Moiz ana,

² «Di gaɗta an daŋga wanda maŋ gi Aaron u goryomu. Gola ɓivun ma ŋgalam kina asi lammi ko wanda na. Va ma ŋgalam ki namma hinim kay li ma ŋgal ɓivunna njeŋge gak gak fo maɗiira, kura hu li ŋgal ɓivunna vi gak gak may.

³ Mul ma li ɓivunna cuk kalasoŋga umu, cuk baraw ma cili u baraw dlemba ŋgolna egem may, nam tok but ma ka hu givin ma togolla ɓali ga u mbulnana kiyo, cukum ki keŋ givin ma togolla.

⁴ Ŋgoo dagan nam fok baraw namma ki cuk ma daŋŋa egemu, yow but ma u mbulna namma cukum ha ki doŋ kaana hu li ma teteɗna.

⁵ Kura hu givin ma togolla ka teweɗ kiɗi, ŋgal ha ni na gak gak, maɗiira tew tew ni mul ma li ɓivunna min vun kura koloo, koloo. Gi ɓivun ma ŋgalam ki ŋgalina kay kura. Ŋgal tliw ma mbulna kay kura ni ɓivun ma heɓpa.

⁶ Ku mayra ŋgal ha na gak gak ka tewɗira ka ŋgal hu givin ma togolla tew tew.»

Puura laɗ u njaf wana

⁷ «Gola ni yal ma li ɓivun ma njaf wana, goryoŋ Aaronna tak ɓivun ma namma fok Yawe, hu givin ma togolla.

⁸ Nam yow u fuɗ wa ma ɦam ay a li ɓivun ma njaf wana hu duk kona dew. Li fuɗ ndaɗta u mbulna may, u mbitla his jivira may, ŋgalasi hu givin ma togolla, ni his ma jivi ma gi humba lam maŋ Yawena.

⁹ U tlesuu hinna Aaron u goryom tasiya, tasi ni bay cuk kuffa dukusiya, tasi ni hu li ma teteɗna. Asi tasi ni kurufu hu kaa ma gii kay Mbutluɓ ma Tokkana.

¹⁰ Asi ka zal fuɗ ndaɗta u kuffaɗi, kay ni ɓorow masi ma an ɦasina duk tlesuu teteɗ suu asi mbaarasi a lan ɓivunnana, asi ki teteɗ ko tlesuu ay a li ɓivun ma bulum cora u taɓ duk ɦoŋgana na lay.

¹¹ Suu njufii suu hu njaf Aaronna halaŋ ndak ti u tle asina. Ɓorow namma hin ki ni magi a fafaɗta ha ni hu basara u basara, duk tlesuu ŋgalasi ki a li ɓivunna maŋ Yawena. Suu daŋŋa suu ŋgen tle asinana halaŋ hin fi cora kay teteɗ mamba.»

¹² Yawe di Moiz ana,

¹³ «Hu li ma sa ma hu njaf Aaronna min a kal hu sunda li ɓivunna ni, hu buu ma fuurumma ni nam yow fuɗta fok Yawe kelewna hindi ni puura u njaf wanara, ɓorowoɗ iriɗ duk gaya gaya, maɗii may, fiɗigi may.

¹⁴ Fuɗ ndaɗta yarasaɗ iriɗ ki u mbulna kay gu ma beɗina, tuɗuɗ ha ni iriɗ ki tlumi jiviya, li puura u njaf wanara yarasi ndaɗta ni ɓivun ma his jivina maŋ Yawe.

¹⁵ Gegelay ma hu njaf Aaron ma hin a mbuɗ mul ma li ɓivunna li ni ko ndaɗta na lay. Gaɗ ndaɗta hin ha ni a fafaɗta, ŋgalaɗ ki ni ŋgali hu givin ma togolla maŋ Yawe.

¹⁶ Ɓivun ma vi muli suu li ɓivunna ŋgalam ki halaŋ maŋ Lona, sa ka tambi.»

Ɓivun ma fi vaɗ huuna ko Lonna

¹⁷ Yawe di Moiz ana,

¹⁸ «Aŋ di gi Aaron u goryom ana, Gola ɓivun ma agi lam a bulum cora kina lini ko wanda na. Va ma ŋgaɗam a li ɓivun ma bulum cora kina, ŋgaɗammi hu li ma ŋgaɗ ɓivun ma ŋgalam ki ŋgalina huna, ni fok Yawe, kay ana ni va ma teteɗna.

¹⁹ Mul ma li ɓivunna gijaŋ ɓivun namma jew ni namu. Nam ndak kom tliw namma ni nam lay. Tliw namma komom ha ni hu li ma teteɗna. Ni kurufu hu kaa ma gii kay Mbutluɓ ma Tokkana.

²⁰ Suu ŋgen kosi eg tliw nammana halaŋ ki mbuɗi teteɗ, lini busuna tol eg baraw maŋŋa wa ni mbus busu namma ha ki ni hu li ma teteɗna may.

²¹ Doy ma zal tliw ma ɓivunna huna toom kiyo. Lini zalammi hu doy kawina ni mbus doy namma ki jiviya, ɦokom ki jivi u yona.

²² Tliw namma muli suu li ɓivunna halaŋ ndak komomu kay nammi va ma ki mbuɗi teteɗna.

²³ Na may va ma ŋgaɗam a li ɓivun ma bulum cora kina, ma tuɗum busuɗum ha kalafi hu Mbutluɓ ma Tokkana sa ka komombi, ŋgalam ki ni ŋgaliya.»