DLAŊ LEVIRA 5 - Boy Lonana

Cora bulum ki u ɓivun namara

¹ «Gola dlara mbaa cora kay sana ni ko wanda na, lini aŋ wi sana li dla cora iriŋu, ɗowba hum boy ma cona, aŋ tuɗ di dla ndaɗta ka kiɗi ni, co ndaɗta tokŋi kaŋu.

² Ɗowba lini sana wi kaɗi, tin kom ay eg va ma njenje wa, eg ɦaa mbuu kala, eg ɦaa vabak kala, eg yoo ma miɗi kala, ɦaa tlesuu njenjena halaŋ, nam mbuɗ ki ni sa ma njenjena.

³ «Ɗowba nam wi kaɗi tin kom eg sa war ma ki mbuɗi njenjena, dlara njenje ta mbuɗ sana ki njenjera halaŋ, hu li ma nam wi u dla ndaɗta ki wa ni cora vam wa.

⁴ Ɗowba sana wi kaɗi, hin vunum paɗ suu suu mayra bay uɗta, dla ndaɗta li kom coo. Ni ana sa ma suu tam bay saara u kaboyna, sa namma cora vam wa.

⁵ «Hu li ma sana dlara li kom wa ko ndaɗta na ni, nam mba hom kay dlaam ndaɗta.

⁶ A nam hoŋ min duk ɦoŋom u Yawe kay cora nam laɗta ni, nam vi goo yoo ma tama ay dew, goo timii ɗowba goo ɦu wa. Kay a dan ɓivunna kay coombara. Mul ma li ɓivunna hin lam ɓivun ma bulumum coomba kina.»

Ɓivun ma vi sa ma hawra

⁷ «Lini sana hawi ka fi ɦu ma li ɓivunna kay coombanaɗi ni, nam yow guk gaɓina mba', ɗowba gugukka mba' a min duk ɦoŋom u Yawe kay coombara. Dew a li ɓivun ma bulum cora kina may, dew a li ɓivun ma ŋgalam kina may.

⁸ Nam mbaarasi ay eg mul ma li ɓivunna, ta nam takaɗ jewra ni ta li ɓivun ma bulum cora kina. Nam guluɗuɗ ay hu zagaɗaɗ na, may ka ndoɗoɗ yaɗ ki ndaŋ gawɗi.

⁹ Nam yam busuna kay givin ma togolla u busu ma soo daganna nam cuɗum u givin ma togolla. Ni ɓivun ma bulum cora kina.

¹⁰ Ta mbara ni ɓivun ma ŋgalam kina ko gaɗta dira na. Lini mul ma li ɓivunna lam ɓivunna kam wa ko gaɗta dira na ni, coom ndaɗta bulum ki wa.

¹¹ «Lini sana saɓakam ka a fi gugukka mbaraɗi lay ni, nam ndak ɦal fuɗta ay u tassa ma kelewna fiɗi, ni a ɓivun ma bulum cora kina. Nam ka vo mbul kay fuɗtaɗi, ka cuk mbitla his jivira dukgi lay, kay ni ɓivun ma bulum cora kina.

¹² Nam ɦal fuɗ ndaɗta ay maŋ mul ma li ɓivunna, mul ma li ɓivunna yow hu duk kom dew a li ɓivun ma gi humba maŋ Lona, ŋgal tle asina hu givin ma togolla maŋ Yawena, ni ɓivun ma bulum cora kina.

¹³ Lini mul ma li ɓivunna li ɓivunna wa kay cora ko ndaɗta nara ni, coom ndaɗta bulum ki wa. Mul ma li ɓivunna li ni ko ndal nam li u puura njaf wanara na may.»

Ɓivun ma min duk ɦoŋga

¹⁴ Yawe di Moiz ana,

¹⁵ «Hu li ma sana dla cora paɗ kom nam wi kaɗi, va ma Yawe joɓomma nam ɦam ka u voɗombi ni, nam ndak vi gamla timii ma bay ŋgulla egemma, ɦam maŋ Yawe, ni timii ma gus way ndena, gusum ko gursu mayra ŋgaay hu Zira Tokka na ɦam a li ɓivun ma min duk ɦoŋgana.

¹⁶ Nam warak bal va ma nam ɦam kaɗina kiyo, hin cuk keŋ ma vadlna kayam hu olo, ɦasi maŋ mul ma li ɓivunna. Mul ma li ɓivunna li ɓivunna ki kam u gamla timiina wa ko gaɗta dira na ni, coomba bulum ki wa.

¹⁷ «Lini sana ŋgel gaɗta vi Yawera li va ma nam doo ki ana lambina wa ni, co ndaɗta ka kam gak gak, lini nam li ni ii bay wira lay.

¹⁸ Lini nanagelay ni nam mba ɦal gamla timiina ay maŋ mul ma li ɓivunna, ni timii ma bay ŋgulla egemma. Ko gaɗta di kay ɓivun ma min duk ɦoŋgara na. Mul ma li ɓivunna li ɓivunna ki kam u gamla timiina wa ko gaɗta dira na ni, coomba bulum ki wa.

¹⁹ Ni ɓivun ma min duk ɦoŋga, kay sana li co ndaɗta ni eg Yawe u tamba.»

²⁰ Yawe di Moiz ana,

²¹ «Hu li ma sana li cora ŋgolla eg Yawe, ganyam wayamma kay va ma nam ŋgayamma vo varamma kala, ɗowba kay va ma nam cenem ay vi ndaram ma vok zina, ɗowba va ma nam vam ay ko sana u eŋga, ɗowba kulum ay kuliya,

²² ɗowba nam fam vaamma ki gaa ka min a gam um kiɗi, ɗowba nam suu tam suura dos kay va ma vi sanna.

²³ Sa namma li ni cora, ɓakŋa vam wa, lini nanagelay va ma nam tlam namma mba hoŋom ki maŋ wayam ma nam lam irim kam namma, ɗowba va ma nam fam ay ki gana, u ma sana ŋgayamma varamma halaŋ nam hoŋ va namma kiyo.

²⁴ Va ma nam suu tam suura kaboyna kamma lini megelay ni nam mba warakam kiyo, hin cuk keŋ ma vadlna kayam hu olo, hoŋ va namma kiyo, warak ay um hu olo, hoŋ tle asina ki maŋ malaŋ va namma ni hu buu ma um gi kina gaw.

²⁵ A min voɗ mamba fok Yawera ni nam mbaa gamla ma bay ŋgulla egemma ay maŋ mul ma li ɓivunna a li ɓivun ma taɓ duk ɦoŋom u Lona.

²⁶ Hu li ma mul ma li ɓivunna li poora ki kam wa fok Yawe, ko gaɗta dira na ni, nam li co megelay coom ndaɗta bulum ki wa.»