DLAŊ LEVIRA 27 - Boy Lonana

Gaɗta kay ɦalla ɦal maŋ Yawera

¹ Yawe di Moiz ana,

² «Aŋ di suu Israelna ana, lini sana suu tam ki wa ana nam min a ɦal sa war ki maŋ Yawe ni, nam ndak warak suu mamba u gursura ii bege mayra gus sa warnara.

³ Ni ko ŋgaay wandara na, kay sa ma basaɗam 20-60 ni nam ɦal silira doonora dok-vadl u sili mayra hu Zira Tokka, ni kay sa njufna.

⁴ «Kay cara ni ɦal silira dok-hindi.

⁵ «Kay gogoo ma basaɗam 5 ta ta 20 ni, go njufna ni nam ɦal sili dok-mba', go tamara ni ɦal sili doogo may.

⁶ «Kay gogoo ma tilim ki 1 ta ta basara 5, go njufna ni nam ɦal sili vadl, go tamara ni sili hindi may.

⁷ «Kay sa ŋgol ma basaɗam ki su dok-karkiyana ni nam ɦal sili doogo yam vadl kay sa njufna, kay cara ni nam ɦal sili doogo may.

⁸ «Lini sana ki haw cocoo ka fi va ma warak ŋga ndaɗtaɗi ni, nam mbaa sa ma nam suu tam kamma ay fok mul ma li ɓivunna, mul ma li ɓivunna ndak yow ki u warak ma nam a ɦam ginna ta ta tew ki vok li ma nam ndakŋa.

⁹ «Lini sana suu tammi kay yoona ay duk suu lasi ɓivunna maŋ Yawena ni, yoo ma aŋ ɦam maŋ Yawe namma lini maanagelay ki mbuɗi ni teteɗ.

¹⁰ Sa ka ndak a mbuɗum ki u yoo ma daŋgi, lini nammi jivi lay, ka jivi cocoɗi lay, lini sana mbuɗum ki gin u ma daŋwa ni yow yoori asina ay ki ni jak.

¹¹ «Lini sana suu tammi u yoo ma njenje ma sa ka ndak a ɦam maŋ Yaweɗina ni tuɗ yoo namma ay fok mul ma li ɓivunna.

¹² Mul ma li ɓivunna hin di dlara kay yoo namma, lini nam jivi ɗowba coo ni nam hin di ni namu. Suuna hin li ni u diim ndaɗta may.

¹³ Lini malaŋ yoona min a mbuɗumu ni nam warak ŋga mayra mul ma li ɓivunna ŋgaaɗta, hin cuk keŋ ma vadlna ha kayam hu olo.

Gaɗta kay zinara

¹⁴ «Lini sana ɦal ziim ki maŋ Yawe wa a va ma teteɗna ni, mul ma li ɓivunna gol tlesuu jivi huna u suu cona halaŋ. Ŋgoo dagan nam hin ŋga gus zi namma. Asi hin li ni u diimba may.

¹⁵ Lini sa ma ɦal ziim kina min a gusummi namu ni nam ɦal gussa mul ma li ɓivunna ŋgaaɗta hin ɦal keŋ ma vadlna kayam hu olo.

Gaɗta kay senena

¹⁶ «Lini sana ɦal sene mamma, ma duk joomma, ki maŋ Yawe wa ni ŋga gus sene namma ni u wa ma zaaram ka hu sene nammana. Kelew wa ma yam ana orgena hindi ni ii sili dok-vadl.

¹⁷ Lini nam ɦal senena ni hu basara furira ni, gus sene namma hinni ko ndaɗta na.

¹⁸ Lini nam ɦal senena ki ni ŋgoo basara furi ndaɗta ni mul ma li ɓivunna ndum gursura ni hu basara basara halaŋ ta ta tuɗ tew basara furira ni nam hin yow ki u gursu ma ŋgaayna nde nde.

¹⁹ Lini sa ma ɦal sene mamma kina min a gusummi namu ni, nam ɦal gursu ma mul ŋgol ma li ɓivunna ŋgaamma, hin cuk keŋ ma vadlna kayam hu olo.

²⁰ Lini nam ka mbuɗum oloɗi, gusum ki ko sa ma daŋŋi ni sene namma hinni ka varam oloɗi.

²¹ Sene namma hu basara furira ni nam hin ki ni a sene ma teteɗna vi Yawe. Sene namma hin ki ni maŋ mul ma li ɓivunna a fafaɗta.

²² Lini ɦal ni sene ma nam gusumma, sene ma ka duk joommaɗina, ki maŋ Yawe wa,

²³ mul ma li ɓivunna ndum bege sene namma ta ta tew basara furira. Asi ɦal bege ndaɗta ni hu buu namma gaw, ni va ma ki teteɗ maŋ Yawena.

²⁴ Hu basara furira ni sene namma hin hoŋom maŋ malam ma gusum kina, kay sene namma ka duk joomma. Sa namma ni malam ma hin li sunda hurumma.

²⁵ «Gus tle asina li halaŋŋi u silira hu Zira Tokkara. Silira li sunda hura nekeɗ ii garamma doogo.

Ҥalla zeɗ zeɗta

²⁶ «Sana ka ndak a ɦal goo yoo mam ma vuɗ fok jewna maŋ Bu Suunaɗi. Kay tlesuu vuɗ fok jewna halaŋ ki ni vi Yawe da, ɦugunina, timigiina u mbutlina halaŋ ki ni vi Yawe.

²⁷ Lini yoo ma ki njenje ii Lonana ni, gorom ma vuɗ jewna, malamma ndak mbuɗum ko Lona. Nam ɦal keŋ ma vadlna u ŋgara mul ma li ɓivunna ŋgaaɗta.

²⁸ «Ni kay tlesuu sana a ɦasi maŋ Yawena halaŋ, sa warna, yoorina u sene ma duk joommana halaŋ, va ma vunuŋ di ki kam ana aŋ ɦam ki maŋ Yawena, aŋ ka ndak a gusum ki ɗowba jokom ki maŋ sa ma daŋgi. Va namma hinni maŋ Yawe a fafaɗta.

²⁹ Lini ɦal ki ni sa warna ni sa namma sa ka mbuɗum oloɗi, cam ki ni ciiya.

³⁰ «Keŋ ma doogona vi tlena halaŋ, wana, vuɗ ŋgusugina, halaŋŋi vi Yawe. Asina halaŋŋi tlesuu teteɗna maŋ Yawe.

³¹ Lini sana min a mbuɗ keŋ ma doogo namma ma nam ɦam maŋ Lonna ni nam cuk keŋ ma vadlna kayam huwa.

³² Kay yoorina, ɦugunina, timigiina u mbutlina tew wa doogo ni ma dewna ki ni teteɗ maŋ Yawe.

³³ Sana ka ɓorow ii yoorina ki ana ni ma jivina ni ma cona naɗi. Nam li wa na ni tle asina jak ki ni vi Yawe, nam ka ndak a mbuɗusi oloɗi lay.»

³⁴ Gola ca ni gaɗta Yawe ɦaɗ ay maŋ Moiz kolo kay yam ɦinira Sinayra.