DLAŊ LEVIRA 26 - Boy Lonana

GA ƊTA KAY DLA PA ƊVUN MA VI LONNA Gi humba kay Galamba

¹ Yawe di ana, «Goɓogi loogi suu ɦawanaɗi, ceɗegi tlesuu agi a goɓ fokosi ko Lonana naɗi. Hu mbas magira ni ceɗegi ɦini mayra suuna a goɓ fokoɗta kalaɗ ay huɗi, goɓogi fokoɗɗi lay, kay anni Yawe, Loogina.

² Gologi buu ma vi Lonna jiviya, ŋgaagi Zira Tokka manda teteɗta jiviya, anni Yawe.

Paɗvunna

³ «Lini agi li u gaɗ manda, lini agi humun kaɓak manna jiviya,

⁴ an hin sagi mbo lona ga u voɗomu, tlena hin jivigi kay ndaŋgara cocoo, ŋgusugi magi suu hu senenana hin vuɗ jivi lay.

⁵ Wana hin lagi ŋgol cocoo, kogi daɓ ki eg lira lam vora may ni jok vunugi ni eg gugutlura gaw, kogi daɓ eg gugutlura mayna til ma zaa njafna gana ni mbaay gaw. Agi hin ti jiviya, hoɓogi lay, agi hin lakŋi u heɓpa hu mbas magira.

⁶ An ɦagi heɓpa hu mbas magira. Agi buu ni va ma mba ŋgenegi hu ziigi kaɗi, vabakgi suu cona an dikisi ki hu mbas magira, duu ka hin li hu mbas magira oloɗi.

⁷ Agi hin dik suu babali magisina, asi ka ndak a col ay fokogiɗi.

⁸ Suuna dukugi vadl ni dik suuna kis, suu kisna dik suuna bup bup doogo, suu babali magisina hin cuk kaŋga fok kawi magina.

⁹ An mbuɗ irinni egegiya, an hin zulugi cocoo, njafagi hin zula. An hin li galam manda u agira na gak gak.

¹⁰ Wa ma gasamma bay daɓ tira tu may ni agi gijaŋ feɗ ni ma cukunina gaw. Agi hin cuk ma basina ki ga a hal lina kay ma feɗem ay wilina.

¹¹ An hin kakŋi dukugiya, an ka hinigi ki kay tagiɗi.

¹² An hin tuɗ ni u agiya, anni a Loogina, agi ni a suu mansina may.

¹³ Anni Yawe, Loogina, ma suɗugi ay ki hu mbassa Egiptera kay a agi li a suu masi suu sunusina oloɗi. An kaagi jug ma kelegina ay ki ni anu, agi mbuɗ tuɗ yagi ki tlii kolo ni unu.»

Gi vunna

¹⁴ «Lini agi ka humun vununɗi, ka min a li u gaɗta an dagiraraɗi ni,

¹⁵ lini agi noyon gaɗ manda kiyo, lini agi ka min a li u kaɓak mannaɗi, lini agi hin dlara an miniɗta ki wa ni, kay ndaɗta agi bulum galam manda an vaɗ u agira ki wa.

¹⁶ «Gola ni dlara an hin lagira egegira. An hin gagi dlara ndaana kagiya, gagi tuguɗiira kagiya, tuguɗii mayra irigi ka wi oloɗira, ta cagi ki maɗnara lay. Agi zaa wana hu sene magina lay ni ka fambi, suu babali magisina hin feɗem ki ni asiya.

¹⁷ An hin pereɗ zagaɗan magiya, suu babali magisina hin cagiya, suu gonok magisina hin lak a mulina kagiya. Agi hin yow liŋŋa ni bay sa ma dikigi ugi lay.

¹⁸ «Lini agi ka humun vununɗi gak gakgi ni, an hin kaagi ɓak ma gaɗagina kagi sen kiɗisiya co su ma wanna.

¹⁹ A daɓagi ŋga taagira kira ni an mbuɗ huu Lona ki eŋga ko kawina na nam ka si mboom ay ga oloɗi. Ndaŋgara hin so ki eŋga ko kawi ma tlawna na.

²⁰ Agi hin loɓ tagi a li sunda ki ni ɦawaa, ndaŋgara ka jiv wana oloɗi, ŋgusugi suu hu mbas magirana ka vuɗ oloɗi lay.

²¹ «Lini agi ŋgela ka min a humun vununɗi ni, an hin kaagi ɓakŋa kagi kay coogira sen kiɗisiyara a sura jewra olo.

²² An hin sunugi vabakgi suu cona ay kagiya, asi hin cagi goryogi kiyo, cagi yoori magisina ki may, asi doorogi ki kay voɗta tuɗta, voɗ magira mbuɗ ki ni ko duk gura ɦawa na.

²³ «Dla ndaɗta ndakagi kaɗi, lini agi tuɗ fok u ŋgella ŋgelen vununda ni,

²⁴ an may ni hin ɓeŋ hurun egegiya, an hin kaagi ɓakŋa kagi sen kiɗisiya co su olo, kay dla coogira.

²⁵ An hin munugi duuna kagiya, kay a gagi daŋgayna kay agi bus galamba vaɗ u anda kira, hu li ma agi tok tagi hu ɦoŋzi ma ŋgolna a ŋgayra ni an hin gagi tuguɗira cora ay kagiya, agi hin ki ni ko suu babali magisina.

²⁶ An hin kaɗakagi tina ki kagiya, boyogina doogo yi funa kay givin ma dewna, asi ɦagi fu ma ew namma, agi tammi, ka hoɓogiɗi lay.

²⁷ «Hu li namma lini agi humun vunun kaɗi, dukugi ki gonokka u an gaki ni,

²⁸ an hin mbuɗ hurun yara egegi may. An hin kaagi ɓakŋa kagi sen kiɗisiya co sura jewra olo, kay dla coogira.

²⁹ May ŋgolla hin ndi kagiya, agi hin kom tliw goryogiya.

³⁰ U hurun ma ɓeŋina an hin hawaɗagi liigi ma mbuy kolo ma teteɗna kiyo, an hin toogi givin ma togolla magi ki may, an hin cukugi maɗagi ha kolo kay sok tlegeyegi suu agi casi maŋ fulinana.

³¹ Ҥoŋzi magi ma ŋgolona an ɓalakam kiyo, an hin bowogi ziigira teteɗta ki gaa, an ka ɦisigi ɦis mbul magi ma ɦis jivi namma oloɗi.

³² An hin ɓalakagi mbas magira ki ni u tanda, suu babali magisina suu cuk ki huna hin mbuɗ ki ndaana cocoo.

³³ Agi tagira may ni an hin dikigi ki duk njaf suu daŋŋa, suuna hin mun duuna u agiya, ɦoŋzi magina hin mbuɗ ki ni bagira, zina halaŋ hin hawaɗ kiyo.

³⁴ Hu basara agi njay ki duk suu daŋŋara ni mbas magira hin koɗ taɗu, ni kay basara koɗ tara ta agi li ka uɗira may.

³⁵ Na daŋ may ndaŋgara ndak koɗ taɗu, kay hu li ma agi ay cuki kaɗna hiniɗ ka a koɗ taɗ hu basara koɗ taraɗi.

³⁶ «Ugira hin iirira suu asina an hin cukusi ndaana hurusiya, hum bubura yak kaŋgara hin mbaɗasi ni ndaɗ ɦawaa, asi hin yow liŋŋa ni ko ndal sa ka dikisi ay ŋgorosi dagan na, asi puk kay tasi ni sa ka usi a dikisiɗi lay.

³⁷ Asi puk ha kolo kay tasi na jom jom ko suu babali masisina ka dikisi usi ayra na, doli ni sa ay ka usiɗi lay, agi ka ndak a col kolo fok suu babali magisinaɗi.

³⁸ Agi hin ba ha ki ni duk njaf suu daŋŋa, mbassa vi suu babali magisinara hin tagi ni ndaɗu.

³⁹ Lini u suu ɦiw hin iiri hu mbassa vi suu babali masisina ni suu asina hin ba ki ni kay cora asi laɗta u cora vi somoyosira may.

Lona humum gam kay galam mamba

⁴⁰ «Na may suu hin iiri asina hom coosira u cora vi somoyosira, ana asi li cora ni egenu, asi li gonokka u anu.

⁴¹ An may ni mbuɗ hurun egesiya, tuɗusi ay ki hu mbassa vi suu babali masisina, kala buu maa dew ni hurusi ma sooy namma hin homa, gaɗ masira hin daɓ kiyo.

⁴² Humun hin gan kay Galamba an vaɗ u Yakobpa, humun hin gan kay galam manda u Isaakka lay, olo ni humun hin gan kay galam manda an vaɗ u Abrahamba may. Humun hin gan kay mbassa.

⁴³ Hu li ma suu Israelna njay kina ni ndaŋgara koɗ taɗ tu may, asi may ni fi ni warak ma kay dla coosirana may, kay asi hum ka u gaɗ mandaɗi, li ka u dlara an miniɗtaɗi may.

⁴⁴ Na may ni, lini asi ha ki hu mbassa vi suu ɦawana lay ni, an noyosi ka ki fafaɗɗi, tlasi ka gonokka a baasi ki bel bel gawɗi, ka a bulum galam manda u asira kiɗi, kay anni Yawe, Loosina.

⁴⁵ An humun hin gan kasiya, wasi hahawasiya, kay Galamba an vaɗ ay ki u somoyosira hu li ma an cukusi ay ki hu mbassa Egiptera ay ki ni ii njaf suu ɦawana halaŋ, kay ana an li ni a Loosina, ni an Yawe.»

⁴⁶ Gola ni gaɗta, yalna u haɗta Yawe haɗaɗ maŋ suu Israelna ɦaɗ ay fun Moiz kay ɦinira Sinayra.