DLAŊ LEVIRA 25 - Boy Lonana

Basara kiɗisiyara

¹ Ay kolo kay ɦinira Sinayra Yawe di Moiz ana,

² «Aŋ tuɗ di suu Israelna ana, hu li ma agi tew hu mbassa an ɦagirara wa ni, ndaŋgara may ni hin fi koɗ tara kay buu ma vi Lonna may ni kay a ŋga Yawera.

³ Hu basara karkiya ni aŋ horok sene maŋŋa, li sun sene gugutlu maŋŋa lay, tam vuɗum lay.

⁴ Basara kiɗisiyara ni basara ndaŋgara koɗ taɗta ni basa ndaɗta ni a buu ma vi Lonna maŋ Yawe, aŋ ka zaa va hu sene maŋŋa hu basa ndaɗtaɗi, ka carak ko gu gugutlu maŋŋaɗi lay.

⁵ Aŋ ka feɗ tlesuu day kay tasi mogoona hu sene maŋŋanaɗi lay, ka duɗ vuɗ gugutlu maŋgaɗi lay. Basa ndaɗta ki ni a buu ma vi Lonna kay ndaŋgara.

⁶ Agi hin ti ni tlesuu day kolo mogoona hu basa ndaɗtana, aŋu, saaŋ ma sunuŋŋa, goora sunuŋga, warak ma vi sa ma buu varaŋŋa, tlesuu vo varaŋŋa halaŋ.

⁷ Lini kay yoori maŋsina u mburi suu ŋgoo bagina ni, asi hin ti ni tlesuu ndaŋgara dayasi ay kolona halaŋ.

Basara furira

⁸ «Aŋ ndum basara kiɗisiya kiɗisiyara seŋ kiɗisiya, ndi halaŋ basara dok-fiɗi yam dleeŋe.

⁹ Buu ma doogona hu til ma kiɗisiyana ni buu ma bulum cora kina, buu namma ni agi ɦal voɗta a bu tokolomma ki kay yam mbas magira na halaŋ halaŋ.

¹⁰ Basara dok-vadlla ni agi laɗ ki ni a basara furira, hu basa ndaɗta ni suuna halaŋ ki buɗiya, basa ndaɗta ni basara agi heɓ hurugi ki eg tagira. Gegelay ma gus vaamma ki jewna vi vaam namma ki hu buu namma. Sa ma ay ki gusi mbabuna ɗowba mbabura hoŋ ki vo hu li ma nam vuɗ huna duk somoyomu.

¹¹ Basara dok-vadl ndaɗta kagi ni a basara furira. Agi ka horok sene magina hu basa ndaɗtaɗi, agi ka feɗ mogoo wa ma day hu sene maginanaɗi lay, ka duɗ vuɗ gugutlu magiraɗi lay.

¹² Basa ndaɗta kagi ni a basara furira, basara teteɗta, agi ti ni tlesuu day ay hu senena kay tasina ɦawaa.

¹³ «Hu basara furi ndaɗta ni gegelay vi vaam ma sana tlamma ki ginna kiyo.

¹⁴ Kay ndaɗta lini aŋ gus sene maŋŋa ki ko wayaŋŋa ɗowba wayaŋŋa gusuŋ sene mamma ki koŋu, ni agi lagi tagi coɗi.

¹⁵ Ŋga gus senena ni hu basara mba tew hu basara furira na may. Saa ki jivi kay basara feɗ tlena ay vora may.

¹⁶ Lini basara zul bolowo ni, gus senena hin mbuɗ ŋgol may, lini basara yow ki wa ni gus senena hin hoŋ ki dagan may. Kay gus senena ŋga ni kay tlesuu feɗesi ay huna.

¹⁷ Ni ana dukugi ni sa li ii ndarambi, na may agi halaŋ lagi ndaa Lona. Anni Yawe, Loogina.

¹⁸ Lagi u gaɗ manda, golongi dlara an dagirara jiviya, lagi uɗu, ni agi hin kak heɓ hu mbas ndaɗta.

¹⁹ Ni mbas ndaɗta hin jivigi tlena cocoo, agi hin lak huruɗ ni ka a yoo tagiɗi.

Ti ma tam hu basara koɗ tara

²⁰ «Kala agi hin joɓ tagi ana, aygi hin ti ni mege, kay hu basa ndaɗta ni sa ka feɗ vaɗi lay, ka zaa va kaŋga hu basara kiɗisiya ndaɗtaɗi lay, ka feɗ mogoo tlesuu day hu sene mayginaɗi lay nige?

²¹ Ҥawaa, hu basara karkiyara ni an hin paɗ vunun ki, agi hin feɗ wana hu coki ndaɗta ni kay basara mba'.

²² Hu basara kalavandira ni agi hin zaa tlena hu sene magina, may agi ti hu basa ndaɗta ni wa ma basina tuwa, ta ta nam tewegi ki hu basara dleeŋera, ni agi hin gijaŋŋa a ti wa ma agi lam vona ni na tuwa.»

Gegelay lini vaam ma nam lamma

²³ «Ndaŋgara hu mbas magira ni agi ka gusuɗ ha ki a fafaɗta gawɗi, kay ndaŋgara ni varanu, agi lay ni varanu, u suu dukugi na lay ni varan bel bel.

²⁴ Kay ndaɗta agi tin gaɗ mayra mbuɗ ndaŋgara varagiya, sa ma deŋ sene mamma kina hin hoŋ mbuɗumu.

²⁵ Lini sa ma wayagi maa dew dlara ndi kam nam gus sene mamma ki wa ni, voɗta ka kay sa ma hu deeremma hin mbuɗ sene namma.

²⁶ Lini sa namma sa ma hu deerem ma mbuɗum sene mamma kaɗi ni, nam u yam tamba hal yal ma mbuɗ sene mammana.

²⁷ Nam ndum basara nam gus senena kira ta ta tew hu li ma basara koɗ tara ni nam ndum tlesuu nam lasi hu sene nammana ndum ndummi hoŋ tli sene mamma.

²⁸ Lini nam ka fi va ma hoŋ mbuɗ sene mammaɗi ni, senena hin ko sa ma gusumma gak gak tew hu basara furira ni nam hin hoŋ hu sene mamma tuwa. Hu li namma ni sa ma gus senena na ɦam ki maŋ malamma.

²⁹ «Lini sana gus ziim ma nam cuki huna kiyo, zi ma mini hu li ma jivi ma gulumunna gii kamma ni, voɗta a hoŋ mbuɗ ziimma kira ni basara dew daŋ ka jakgi, buu namma ŋgaay ni ew daŋ.

³⁰ Lini nam mbuɗ ziim ka ki hu basara dewraɗi ni, zi namma hin ki ni maŋ sa ma gusumma, nam ka hinim maŋ malamma oloɗi, maŋ suu hu njafamma oloɗi lay. Hu basara furira ni nam ka kal ki hu zi namma oloɗi.

³¹ Zi ma ha ki cuki ŋgoo bagi bay gulumunna kamma ni ko senena na may. Sana deŋem ki wa ni ndak mbuɗ vaamma, hu basara furira ni zi namma ndak hin ki buɗi maŋ malamma.

³² «Lini njaf suu vi Levina ni voɗta ka tew tew kay asi mbuɗ ziisi hu li ma ɦasinana gak gak.

³³ Lini sa ma hu njaf Levina gus ziim kiyo, nam ka fi va ma mbuɗumbi lay, na may hu basara furira ni nam ndak vi ziimma balamam olo, kay ana duk suu Israelna ni mbassa vi njaf suu vi Levina hin ki ni masi a fafaɗta.

³⁴ Na may sene ma ŋguy kay ɦoŋzi ma vi njaf suu vi Levina halaŋŋi ka gus kiɗi, li namma ni masi a fafaɗta.

Gaɗta kay tlesuu ndasi ki kay suunana

³⁵ «Lini wayaŋŋa balna ka kamu, nam mbuɗ ki iriŋ hahaw cocoo ni aŋ njun umu, lini nammi koy ɗowba ŋgay ma dukugi lay, kay a nam kak iiri egeŋ may.

³⁶ Ni aŋ ka joɓ mbo vaaŋ namma kombi, hal a mbuɗ taŋ bege u nambi. Ko ndaɗta na ni, aŋ li ni ndaa Looŋŋa. Ni wayaŋŋa hin kak iiri egeŋ may.

³⁷ Aŋ ka kaam gursuna kam a fi mbooŋ uraɗi, ka ɦam wana kam a hin fi mbonaraɗi lay.

³⁸ Anni Yawe, Loogina, anni sa ma cukugi ay ki hu mbassa Egiptera a ɦagi mbassa Kanaanda ki magina, kay a an li irigi ni a Lona may.

Gaɗta kay buɗta buɗ suu warna kira

³⁹ «Lini wayaŋ ma Israelna bal maŋŋa kamu, nam gus tam ki koŋ wa ni aŋ lam ko ndal mbabuna naɗi.

⁴⁰ Aŋ vam varaŋŋi ko ndal sa ma li sunda kay warakŋana na, ɗowba ko koyna na ta ta tew hu basara furira.

⁴¹ Hu basa ndaɗta ni nam kal ki u goryom halaŋ tuɗ eg suu hu dee mambana. Nam hoŋ kakŋi kay tlesuu vi bumma.

⁴² Kay suu an suɗusi ay ki hu mbassa Egiptera halaŋŋi suu sun mansina, sa ka ndak a gususi ki ko suuna gus mborɓiina naɗi.

⁴³ Aŋ ka lam ko ndal mbabuna naɗi, li ndaa Lona.

⁴⁴ «Lini aŋ min suu sunda mborɓiina njufiina u boyogina ni aŋ gus ay ni hu njaf suu ɦawana.

⁴⁵ Agi ndak a gus goryoŋ ŋgayagi suu ka cuki dukugina lay, suu may suu vuɗ hu mbas magirana agi ndak gususiya.

⁴⁶ Agi hinisi ka ni a jona maŋ goryogiya kay ana ŋgorogi dagan asi hin sunusi ka may, na may njaf suu Israelna ni lasi naɗi kama. Dukugi halaŋŋi sa kak kay wayam ma Israelna ko ndaɗta naɗi.

⁴⁷ «Lini ŋgay ma cuki dukugina u begera komu, saaŋ ma vok zina ma Israelna gus tam ki kom wa ɗowba ko sa ma hu njaf ma vi ŋgay nammana ni,

⁴⁸ Voɗta ka kay wayaŋ ma gus tam kina ŋgoo gus ndaɗta ni aŋ ndak mbuɗumu, sa maa duk gorsemma ndak a mbuɗumu.

⁴⁹ Bum mbana ɗowba goŋ bum mbanana ɗowba sa ma hu njaf masina ndak a mbuɗumu, ɗowba lini nam tamba yal mamma kaa ni nam ndak a mbuɗ tam ki lay.

⁵⁰ Ni nam ndak njaɗ ko tam u sa ma gusumma, ndum basa mayra nam gus tam ki huruɗta u basara furira, kay ana warakŋa mba ndi ko sunda sana laɗ hu buuna tew tewra na ta ta a hoŋ va ma nam gus tam ki u namma kiyo.

⁵¹ Lini basara bulum cora kira hin fok bolow tuwa ni, nam warak gursura sana ɦamba kam a gusumba kiyo.

⁵² Lini a tew basara furira hin ka bolowɗi ni, nam ndum basa ndaɗta warak ii warak ma a buɗ sana kina kay basa ndaɗta may.

⁵³ Basara u basara sana hin fok saam ma gusumma ni ko sa ma li sunda kay warakŋana na. Nam ka ɦeɓem u saɓakŋa ko ndal mbabuna naɗi.

⁵⁴ Lini nam buɗ tam ka ki ko ndaɗta naɗi ni hu basara furira ni, nam hin kal ki buɗiya.

⁵⁵ Kay suu Israelna ni suu man suu sunda, asi ni suu sun man suu an cukusi ay ki hu mbassa Egipterana. Anni Yawe, Loogina.»