DLAŊ LEVIRA 23 - Boy Lonana

BUU MA VI LONNA U LUU MA VUN TILNA Til ma Luuna vi suu Israelna u buu ma vi Lonna

¹ Yawe di Moiz ana,

² «Aŋ di suu Israelna ana, tokka agi yi suuna a li luunara ni tokka teteɗta, ni tokka vi Yawera, gola cani tokka agi a ŋgaf u an hura.

Buu ma vi Lonna

³ «Hu buuna karkiya ni sana li sun mamba kay tamba. Na may buu ma kiɗisiyana ni buu ma vi Lonna, ni buu ma koɗ tara u tokka teteɗta. Buu namma ni buu ma agi ka li sun huɗina. Ni buu ma vi Yawena, li ni agi ha ki cuki ni aragelay.

⁴ «Gola ni buu ma luu ma vi Yawe ma daŋŋa, hu li ma agi ŋga buuna a ŋgaf tagi a li tokka teteɗtana.»

Luu ma Pakŋa u Fu ma bay kuffa dukumma

⁵ «Hu buuna doogo yam fiɗi hu til ma jewna, faɗta goona gege ni luu ma Pakŋa vi Yawena.

⁶ «Buu ma doogo yam vadlna hu til namma ni gijaŋ luu ma fu ma bay kuffa dukumma may, ni luu ma vi Yawena, luurum ta ta buuna kiɗisiya ni agi ti ni fu ma bay kuffa dukumma.

⁷ Hu buu ma jew namma ni agi ka li sunɗi, lagi ni tokka teteɗta, agi ka li sunda loɓ coco hu buu nammaɗi.

⁸ Hu buu ma kiɗisiya namma ni hu buuna dew dew halaŋŋi agi mbaaragi ɓivun ma ŋgalam ki ŋgalina fok Yawe tew tew. Hu buu ma kiɗisiyana ni agi li tokka teteɗta, agi ka li sunda loɓ coco hu buu nammaɗi.»

Luu ma ɦal yam wana maŋ Lonna

⁹ Yawe di Moiz ana,

¹⁰ «Aŋ tuɗ di suu Israelna ana, Hu li ma agi tew hu mbassa an min a ɦagirara wa ni, agi mbuɗ a feɗ wana vora wa ni, yam wa ma ne ki jewna agi ɦam ay ki maŋ mul ma li ɓivunna, yam waagina halaŋ.

¹¹ Mul ma li ɓivunna mba ɦal yam wa namma fok Yawe kay a agi li ii Yawe jiviya. Nam li ɓivun namma ni hu buu ma dagan buu ma vi Lonana.

¹² Hu buu ma agi a ɦal yam wana ni, agi li ɓivun ma ŋgalam ki ŋgalina maŋ Yawe u goo timii ma basaɗam dewna, ni timii ma bay ŋgulla egemma,

¹³ mbaa fuɗta yarasi u mbul ma his jivina a li ɓivunna u njaf wana ay hu ii kelew karkiya may. Ҥal sum veŋŋa ay hu litir dew u nus may. Ni an hin vagi ɓivun magina jiviya.

¹⁴ Bay agi mbaaran yam wana ay ki ba ni agi ka ti wa ma wilina tuɗi, waarambi lay, tam fuumbi lay. Agi saa kay gaɗ ndaɗta ni hu lina halaŋ, ha na gak gak hu li ma agi ka huna.»

Luu ma feɗ wana ay vona

¹⁵ «Ŋgoo buu ma agi ɦal yam wa ma ne ki jewna ni, agi ndum semenna dagan na kiɗisiya.

¹⁶ Ta ta tew hu buu ma ŋgoo buu ma vi Lonna hu semen ma kiɗisiyana, ni agi ndum buuna ni dok-vadl. Agi tuɗ ɓivunna vi wa ma feɗem wilina fok Yawe.

¹⁷ Aragelay li ma agi cuki huna ni agi mbaa funa ay mba', fu ma yam u fuɗta kelewna hindi, ni fu ma kuffa dukumma. Ni yam wa ma ne ki jewna maŋ Yawe.

¹⁸ Ŋgoo dagan funa ni agi yow timigii suu basaɗasi tew ki dew dewna ay kiɗisiya ni suu bay ŋgulla egesina, vi bolo mbutlna dew may, yow gamlagina mba' may, ŋgaɗasi a ɓivun ma ŋgalam ki ŋgalina maŋ Yawe, ɓivunna u njaf wa masina halaŋ, u sum veŋŋa ni ɓivun ma ŋgalam kina, his ma his jivina maŋ Yawe.

¹⁹ U ɦu ŋgekŋa ni agi li ɓivun ma bulum cora kina, u gor timigiina mba' suu basaɗasi dew dewna agi li ɓivun ma heɓpa.

²⁰ Mul ma li ɓivunna tuɗusi fok Yawe u geŋeɗta geŋeɗ tamba, gor timigii suu mbana u fu ma vun wa ma ne ki jewna halaŋ ko tasi dew. Ni tlesuu teteɗ suu maŋ Yawena hin hinisi ni maŋ mul ma li ɓivunna.

²¹ Hu buu ma dew namma ni agi yi suuna ni halaŋ a li tokka teteɗta, agi ka li sunda loɓ coco hu buu nammaɗi. Gaɗ ndaɗta ni ka mbuɗɗi, ha kagi ni na gak gak basara u basara hu li ma agi cuki huna halaŋ.

²² «Hu li ma agi a feɗ wana hu sene magina ni, feɗem ha ki ta ta fun senena halaŋgi. Aŋ sana ka cil ɦele ma hu sene maŋŋana tokgi lay, aŋ hinim ha ki ni maŋ suu hahawra u suu poy kolona. Ni an Yawe, Loogina.»

Luu ŋgol ma vun basara

²³ Yawe di Moiz ana,

²⁴ «Di suu Israelna, hu buu ma jewna ni hu til ma kiɗisiyana ni buu ma agi koɗ tagi huna, ni buu ma gi humba, ni buu ma agi tok tagi a ŋga Yawena, ni tokka teteɗta.

²⁵ Agi ka li sunda loɓ coco hu buu nammaɗi, agi mbaa ɓivun ma ŋgalam kina maŋ Yawe.»

Buu ma bulum cora kina

²⁶ Yawe hin di Moiz olo ana,

²⁷ «Buu ma doogona hu til ma kiɗisyana ni buu ma bulum cora vi suuna kina. Agi lagi tokka teteɗta hu buu namma. Agi mbaa ɓivun ma ŋgalam kina maŋ Yawe. Li laara hu buu namma may.

²⁸ Buu namma ni agi ka li sunda loɓ coco huɗi, kay ni buu ŋgol ma bulum cora kina, agi li ɓivun ma bulum cora kina kagi hu buu namma fok Yawe, Loogina.

²⁹ Sa ma li laara ka hu buu nammaɗina, hin paɗam ki duk suu mamsina.

³⁰ Sa ma li sunda hu buu namma lina, an hin baam ki duk njaf suu mamsina.

³¹ Agi li sun hu buu nammaɗi, ni gaɗta ka mbuɗɗira, ha kagi ni basara u basara hu li ma agi cuki huna halaŋ.

³² Buu namma kagi ni a buu ma vi Lonna, ni buu ma koɗ tara hu li ma agi ka li laarana col ha fiɗigi hu buu ma dleeŋena ta ta fiɗigira buu ma doogona, agi lagi u buu ma vi Lona namma.»

Luu ma kay mbutluɓmana

³³ Yawe di Moiz ana,

³⁴ «Di suu Israelna ana hu buu ma doogo yam vadlna, hu til ma kiɗisiyana ni luu ma mbutluɓma, luu namma li buuna kiɗisiya a ŋga Yawera.

³⁵ Hu buu ma jewna ni agi li tokka teteɗta, agi ka li sunda loɓ coco hu buu nammaɗi.

³⁶ Buu ma kiɗisiya namma ni hu buuna dew dew halaŋŋi agi mbaa ɓivun ma ŋgalam ki ŋgalina maŋ Yawe. Ni hu buu ma kalavandina ni agi li tokka teteɗta maŋ Yawe. Ni luu ma daɓ daganna agi ka li sunda loɓ coco hu buu nammaɗi.

³⁷ «Gola ca ni luu ma vi Yawe ma dlam ŋgolo cocona. Luu namma halaŋŋi agi yi tokka teteɗta a li ɓivun ma ŋgalam ki ŋgalina fok Yawe, irim zeɗ zeɗ, ɓivun ma ŋgalam kina, ɗowba ɓivunna u njaf wana, ɓivun ma min dukka ɗowba sum veŋŋa, ɓivunna irim zeɗ zeɗ u buuna zeɗ zeɗ may.

³⁸ Hu olo ni buu ma vi Yawena, ɦalla zeɗ zeɗta u ɓivun ma sana lam maŋ Yawe u min mambana.

³⁹ «Hu buu ma doogo yam vadlna hu til ma kiɗisiyana hu li ma agi daɓ sun wana kina ni agi tin luuna ta ta buuna kiɗisiya. Buu ma jewna ni buu ma koɗ tara u buu ma kalavandina ni buu ma koɗ tara may.

⁴⁰ Buu ma jewna ni agi yow vuɗ tlesuu jivina kogiya, kaagi hum manawna kogiya kay a li furira fok Yawe Loogina.

⁴¹ Agi lagi buuna kiɗisiya u luu namma a geleɗ Yawe, buuna kiɗisiya hu basara halaŋ ki kagi ni a gaɗta ka bulum kiɗira, basara u basara. Hu til ma kiɗisiyana ni agi li luu namma tew tew.

⁴² Suu Israelna halaŋ buu hu mbutluɓma ta ta buuna kiɗisiya, suu ka njaf suu Israelnaɗina suu ka cuki dukusina halaŋ buu ni hu mbutluɓma lay.

⁴³ Kay ana basara u basara agi wi ki ana hu li ma an buɗ suu Israelna ay ki hu Egiptena ni an buurusi ni hu mbutluɓma. Ni an Yawe, Loogina.»

⁴⁴ Ko ndaɗta na Moiz di suu Israelna ki jivi kay luu ma asi lam a ŋgaf u Yawena.