DLAŊ LEVIRA 21 - Boy Lonana

Gaɗta kay iirira vi muli suu li ɓivunna

¹ Yawe di Moiz ana, «Di muli suu li ɓivunna, goryoŋ Aaronna, mul ma li ɓivunna ka mbuɗ tam njenje a kal kay maɗnaɗi.

² Maɗ ma nam kal kamma, ni ma egem tokŋa, sumu, bumu, goromma, goromba u wayamma.

³ Kay wayamba tamara, (lini ndaɗ vo bay ŋgaf u sa njuf tuwa, kay ana ndaɗ ka ki ni vi sa ma daŋ tuɗi, ndaɗ ni vo vi somoyom suu mbeena tuwa), nam kal wa ni mbuɗ tam ki ni njenjee.

⁴ Nammi a ŋgolla duk somoyomu lini caŋ wayam maa miɗ wa ni nam kal kay maɗna a mbuɗ tam ki njenjeɗi.

⁵ «Muli suu li ɓivunna ka kaa yasi ki a li hahaw maɗɗi, ka wel njeɓeresi kiɗi lay, ka jii hurusi kay maɗɗi lay.

⁶ Asi ɦal tasi ni maŋ Loosina, asi ka pan sem Loosinaɗi. Kay asi ni suu tak tina fok Yawena ti ma vi Loosinana, asi hin laki tew tew ni teteɗ.

⁷ Asi ka ɗum gora co uɗ ay ki voraɗi, ka ɗum gawlaŋgi lay, ka ɗum cara njufuɗ jogoɗ ay kiraɗi lay, kay mul ma li ɓivunna ɦal tammi maŋ Loomma.

⁸ Suu Israelna gegelay ni mba hum u teteɗta vi muli suu li ɓivunna, kay asi ni suu tuɗun fu ma agi ɦannana ha hu Li ma teteɗna man an, Looginana. A asi li ki ni teteɗ, kay an tanda ki ni teteɗ may. An, Yawe, ni sa ma mbuɗugi ki teteɗna.

⁹ «Lini goŋ mul ma li ɓivunnara ɓalak taɗ ki vo wa, mbuɗ taɗ ki gawlaŋga ni, ndaɗ ɓalak ki ni buɗu, ŋgalaɗ ki u kura ŋgaliya.

¹⁰ «Mul ŋgol ma li ɓivunna ni sa ma fok gorsemmana, nammi sa ma asi fuurum ki u mbulnana, kay ndaɗta nam ka kaa yam ki kay maɗɗi, ka haa baraw mam ki a tii maɗɗi lay, nammi sa ma ka cuk baraw ma teteɗna tamma.

¹¹ Nam ka kal kay maɗ a mbuɗ tam ki njenjeɗi, lini maɗ bum lay, maɗ sum lay, nam ka kalɗi.

¹² Nam ka kal ay ki hu Zira Tokka a tuɗ hu li tii maɗnaɗi a mbuɗ Zira Tokka ta vi Loommana ki njenjeɗi, kay nammi sa ma fuurum ki u mbulna vi Loommana. Ni an Yawe.

¹³ Nam ɗum a cara ni go tamara bay buu u sa njuf tura.

¹⁴ Nam ka ɗum cara njufuɗ miɗ kiraɗi, ka ɗum cara jok ay ki jokiraɗi, ka ɗum cara ɓalak taɗ ay ki vo mbuɗ taɗ ki gawlaŋgaraɗi lay, ni na ɗow nam ɗummi go tamara bay buu u sa tura, ni ta hu njafamba may.

¹⁵ Kay ana nam ka vuɗ njaf ma daŋŋa vo varam a mbuɗ njafam ki njenjeɗi kay mbuɗum ki teteɗ ni an, Yawe.»

Dla mayra dooroŋ kay sunda li ɓivunnara

¹⁶ Yawe di Moiz ana,

¹⁷ «Aŋ di Aaron ana, Basara u basara ni lini sa ma hu njafaŋ ki dakiya ni, nam ka tuɗ ha tok a ɦal tina maŋ Loommaɗi.

¹⁸ Sa ma ka u dakka egemma ka ɦuɗ tam ayɗi, lini sa ma dugi ɗowba sa ma daliya, sa ma vunum hawiya, ɗowba mbalatam taa tin coo,

¹⁹ sa ma gayam kus ki ɗowba kom kus kiyo,

²⁰ sa ma ŋgorom ki coŋina ɗowba sa ma ki iɗi cocona, sa ma irim ki tini tewra sa ma tam u cukka, ɗowba biiriwna, sa ma huɗum ki paɗina.

²¹ Gegelay ma hu njaf Aaron ma dak ndaɗta egemma ka kal a li ɓivun ma ɦal tina maŋ Yaweɗi, kay ana nam ki ni dakiya. Nam ka ndak a tuɗ ɦal tina maŋ Loommaɗi.

²² May nam ndak a ti ti ma vi Loomma ma ki saɓaki teteɗna, u ma teteɗna.

²³ Na may nam ka tuɗ ha ta ta hu li ma gojolina ha caki hunaɗi, ka tuɗ hu givin ma togollaɗi lay, kay ana nam ki ni dakiya, ka a nam mbuɗun Zira Tokka manda ki njenjeɗi, mbuɗ tlesuu hurumma ki njenjeɗi lay. Kay mbuɗ li namma ki teteɗ ni an, Yawe.»

²⁴ Boy namma Moiz dam ki maŋ Aaron, maŋ goryomu, maŋ suu Israelna halaŋ lay.