DLAŊ LEVIRA 20 - Boy Lonana

Tok mayra ki doorira

¹ Yawe di Moiz ana,

² «Aŋ di suu Israelna, Lini sa Israelna ɗowba ŋgay ma cuki dukusina lay, ma ɦal gorom a li ɓivunna maŋ lo ma yam ana Molekŋa tana, sa namma cam kiyo. Suuna tok kam gikim ki u gogoyra.

³ An may ni hin ɦal ŋgoron maŋ sa namma, paɗam ki duk suu mamsina, kay nam ɦal gorom ki maŋ Molek, mbuɗun Zira Tokka manda ki njenjee, ɓalakan sen ma teteɗna kiyo.

⁴ Lini suu hu mbas ndaɗtana dug irisi ki kay dla ndaɗta ka min a ci sa namma kiɗi ni

⁵ an u tanda hin mbay u tanda kam u suu hu njafamma halaŋ, an hin daɓasi ki duk suu Israelna. Sa namma u suu tuɗ ay um hu givin ma togolla maŋ Molekŋa halaŋ.

⁶ «Sa ma mbuɗ tam gawlaŋŋa li dlara joɓ fulina, ɗowba hal suu joɓpa, sa namma an pereɗ ŋgoron mamu, paɗam ki duk suu mamsina.

⁷ Ҥagi tagi ki maŋ Lona, a agi mbuɗ ki teteɗ kay anni Yawe, Loogina.»

Dlara zoŋga doo ki kaɗta

⁸ «Humugi u gaɗ manda, lagi uɗu. Anni Bu Suuna ma mbuɗugi ki teteɗna.

⁹ Kay ndaɗta lini sana ŋgul bum kala sum kala wa ni cam ki ciiya, kay nam ŋgul bum u summi busuɗum hoŋŋi kamu.

¹⁰ «Lini sana buu u caŋ ndarammara wa ni casi kiyo, sa ma li zoŋgana u cara li zoŋgara lay, casi ki jak.

¹¹ «Hu li ma sana buu u caŋ bumbana nam wi ki ni siilira vi bumba. Suu asina casi ki jak, busuɗusi hoŋŋi kasiya.

¹² «Lini sana buu u caŋ gorommara wa ni asi jakŋi casi kiyo, kay asi li ni yowna, busuɗusi hoŋŋi kasiya.

¹³ «Lini sana buu u ndaram sa njufna ko suuna buu u boyogina na ni, asi jakŋi casi kiyo kay dlara asi laɗta ni ka jiviɗi, yow cocoo, busuɗusi hoŋŋi kasiya.

¹⁴ «Lini sana ɗum cara u suɗ wa halaŋŋi dlara yowna, suu asina hindi halaŋ ŋgalasi kiyo, kay yow namma ka li dukugi oloɗi.

¹⁵ «Lini sana buu u yoona wa ni sa namma cam kiyo, ci yoo namma ki may.

¹⁶ «Lini cara buu u yoona wa ni ci ca ndaɗta kiyo, ci yoo namma ki may. Asi jakŋi casi kiyo, busuɗusi hoŋŋi kasiya.

¹⁷ «Lini sa vi wayamba um a cara, ni goŋ bumba ɗowba goŋ sumba, taɓ ki u ndaɗu, waɗ siili maɗta ki wa ni nam li ni yowna, kaam ɓak mamma ki ni kiɗik fok suuna halaŋ, kay nam wi siili wayamba kiyo, nam mba zii nek suluk mam namma.

¹⁸ «Lini sana buu u cara hu li ma ndaɗ u busuna egeɗu, waɗ siili maɗta ki wa, ndaɗ vi kaɗ wa a li nara may ni, asi jakŋi yowosi ki duk suu masisina.

¹⁹ «Ka sana buu u mbayam bumba ɗowba mbayam sumbaɗi kay ana asi ni suu vuɗumma. Lini sana li wa ko ndaɗta na ni suu asina jakŋi hin zii nek dla coosi ndaɗta ni asiya.

²⁰ «Lini sana buu u caŋ bumbanara wi ki ni siilira vi bumbana, asi jakŋi li ni cora, hin zii nek coosi ndaɗta, asi miɗ gaa ni ka fi gooɗi.

²¹ «Lini sana vi caŋ wayammara ki um wa ni nam li ni dlara njenjera, asi jakŋi ka fi gooɗi, kay ana sana ŋgo ki ni u wayamma.

²² «Vangi vun gaɗ manda jiviya, lagi ni dlara an miniɗta. Ni kay ana ndaŋgara an min tuɗugi hura ka noyogi kiɗi.

²³ Humugi u gaɗta vi njaf suu ɦawa suu an min dikisi ki fokogi wannaɗi. An dikisi ki ni kay asi li dlara co ndaɗtara.

²⁴ Ni ko an dagira na, Agi hin tlasi mbas masira ki ni agiya, an ɦagira ki ni an daŋ may. Ni mbas mayra mbiira u mbul yumma huruɗ cocora. «Ni an Yawe magina, mbuɗugi ki zeɗ duk njaf suu daŋŋa halaŋ.

²⁵ «Olo ni ɓorowogi ii yoori suu teteɗna ki u suu njenjena duk ɦoŋ layagi suu teteɗna u suu njenjena. Kay ana gaɗta vagi u tlesuu njenje asinaɗi, u tlesuu ɦaram kaŋgana halaŋ. Tlesuu an ɓorowogisina irisi ki ana asi ki ni njenjee na halaŋ.

²⁶ «Lagi tagi ki man teteɗ. Kay an tanda, Yawe, an ki ni teteɗ. An tinigi ndalagi ki duk suuna zeɗ kay ana agi li ki ni manu.

²⁷ «Lini sa njufna ɗowba cara ɗowba u fuli suu joɓpa kasiya ni, suu asina hin casi kiyo, gikisi ki u gogoyra, busuɗusi hin hoŋŋi kasiya.»