DLAŊ LEVIRA 19 - Boy Lonana

Gaɗta kay teteɗta u ɗegeera

¹ Yawe ɓak Moiz ana,

² «Di suu toki suu Israelna halaŋ, aŋ dasi ana, Lagi tagi ki teteɗ, kay an ki ni teteɗ may. Ni an Yawe, Loogina.

³ «Gegelay dukugi ni li ndaa gi bum u sumu, li u buu ma vi Lonna may. Ni an, Yawe, Loogina.

⁴ «Hoŋogi irigi u loogi suu ɦawanaɗi, ka agi ceɗegi tlesuu gol ko ndal Lona nanaɗi lay. Ni an, Yawe, Loogina.

⁵ «Hu li ma agi ŋgaɗ yoona a lan ɓivun ma heɓpa ni, langina ko gaɗta dira na. Ni an, Yawe, hin vagi ɓivun magi namma jivi may.

⁶ Kom tliw namma ki ni hu buu ma ŋgaɗam huna gaw, ɗowba vin maɗiiya. Na may u ma hin hu buu ma hindina ŋgalam ki ŋgaliya.

⁷ Lini agi kom tliw namma wa hu buu ma hindina olo ni an ka vagi ɓivun magi namma oloɗi kay tliwna mbuɗ ki ni njenjee.

⁸ Suu kom tliw nammana gegelay hin zii coom ndaɗta ni u tamba, kay nam mbuɗ va ma ɦam maŋ Yawena ki njenjee. Sa namma hin paɗam ki duk gorsemma.

⁹ «Hu li ma aŋ a feɗ wana hu sene maŋŋa ni feɗem ki bel belɗi, aŋ ka hoŋ a cil ɦelena hu sene maŋŋa tokgi lay.

¹⁰ Lini aŋ ka em gugutlu maŋga ni, hoŋ a cil ɦele ma maa ha ki uŋŋaɗi, aŋ ka vaa vuɗ gugutlu ma yak ki koŋ kaŋganaɗi lay, hinim ha ki maŋ suu hahawra u koyogi suu tuɗ kolo voɗna. Ni an, Yawe, Loogina.

¹¹ «Aŋ kulɗi, aŋ kaboyɗi, lagi ii tagi a tli vaŋ ndaraŋŋana ki u ganyambaɗi.

¹² Aŋ suu taŋ kay dossa u senɗi, ni aŋ ɓalak ki ni sem Looŋŋa. Ni an, Yawe.

¹³ «Aŋ las ndaraŋ ma vok zina a yowom tlegeyem kiɗi. Buu sa ma laŋ sundana ndak wa ni aŋ warakam ki ni hu buu namma gaw buurumma ki koŋgi.

¹⁴ Aŋ ŋgul sa ma humum ŋgelinaɗi, gi va ki hu voɗta fok sa ma irim duginaɗi, ko ndaɗta na ni aŋ li ni ndaa Looŋŋa. Ni an, Yawe.

¹⁵ «Kaagi ɓakŋa ni u ɗegeera, njun u sa ma maŋinaɗi, aŋ ka njun u sa ŋgolna ana nam ŋgoloraɗi lay, kaasi ɓakŋa ni u voɗom a asi ni gorseŋŋara halaŋ.

¹⁶ Aŋ ka di ŋgeŋ kay wayaŋgi, di dlara co kay saaŋ ma vok zina a voom busuɗum kiɗi. Ni an, Yawe.

¹⁷ «Ŋgay honira huruŋ eg wayaŋaɗi, na may li ndaa kay gaɗta aŋ a gaɗ wayaŋŋaraɗi kay ana ka agi taɓagi ki hu dla cora nam laɗta jakgi.

¹⁸ Hal dlara sa sukuluŋgaɗi, aŋ ka ɗok yara huruŋ eg wayaŋŋa na gak gakgi, gegelay dukugi ni mba min ndaramma ko nam min tamba na. Ni an, Yawe.

¹⁹ «Lagi u gaɗta wandara may ni gaɗ manda. Aŋ ka hin yoo ɦura taɓ u timiiraɗi. Zaa njaf tlena hu sene ma dewna mbaɗi, aŋ cuk baraw ma cili u barawra zeɗ zeɗnaɗi.

²⁰ «Lini sana buu u goo mbaɓu vi sa daŋŋa wa, ndaɗ gin vo ni ki ŋgaɓi ko sa daŋŋa ni ɓakŋa vam wa. Ni ka ɓak ma cam ki ciina gawɗi, kay ndaɗ ni goo mbaɓura tuwa.

²¹ Sa namma mbaa gamlana ay fun Mbutluɓ ma Tokka a li ɓivun ma min duk ɦoŋga maŋ Yawe.

²² Hu li ma ŋgaɗ timiina wa ni mul ma li ɓivunna lam ɓivun ma bulum cora kina kam fok Yawe ni coom ndaɗta bulum ki wa.

²³ «Hu li ma agi tew ki hu mbas magira wa, lini sana pi ŋgus ma tira wa ni nam gijaŋ vuɗta wa ni agi tam vuɗum tuɗi, hinim ta ta basara hindi.

²⁴ Hu basara fiɗira ni duɗum vuɗum halaŋ tuɗum ha fok Bu Suuna hu buu ma luu ma gi deɓpa.

²⁵ Hu basara vadla ni agi tam vuɗum tuɗaŋ ŋgus magi namma hin vuɗ fok cocoo. Ni an, Yawe, Loogina.

²⁶ «Komogi tliwna hu li ma agi ŋgaɗ busuna hunaɗi. Lagi dlara kumunaɗi, cenegi suu miɗinaɗi lay.

²⁷ Agi ka haa u yagiɗi ka wel njeɓeregi ki hu li ma agi a tii maɗnaɗi lay.

²⁸ Ka agi jii hurugi kay maɗɗi, njun dooɗi lay. Ni an, Yawe.

²⁹ «Ɓalak goroŋga kiɗi, ɦaɗ hu li ma fulina a mbuɗuɗ ki gawlaŋgaɗi, li wa na ni mbas magira halaŋ hin mbuɗ ki njenjera u dla ndaɗta.

³⁰ Agi lagi u buu ma vi Lonna jiviya, ŋgaagi Zira Tokka teteɗta, Ni an, Yawe.

³¹ «Tuɗugi fun suu joɓpaɗi, saa kay dlara asi laɗtaɗi, dla ndaɗta mbuɗugi ki njenjee. Ni an, Yawe, Loogina.

³² «Col ki kolo fok suu yasi haɓma, hum u suu maarina, ni aŋ hin li ndaa Looŋŋa ni na may. Ni an, Yawe.

³³ «Lini sana mba ki dukugi ŋgayra hu mbas magira wa, ni agi lasambi.

³⁴ Ŋgay ma ki kaki dukugi namma agi golommi ko wayagina na, agi minim ko agi min tagira na may, kay agi lay ni li ay ki ni ŋgayra hu mbassa Egiptera may. Ni an, Yawe, Loogina.

³⁵ «Kaagi ɓak ma cona kay tlenaɗi, ko meterra ŋga fiyek tlena u ŋga nek tlena u suu ŋga tlesuu yoyona lasi jiviya.

³⁶ Ŋgaagi kelew tlena ni u voɗosi ɗegee, ŋga nekka ɗegee, ŋga fiyek tlena ɗegee may. Ni an, Yawe, Loogina, ma buɗugi ay ki hu mbassa Egiptera na.

³⁷ «Golon ki gaɗ manda halaŋ jiviya, lagi u dlara an miniɗta tew tew. Ni an, Yawe.»