DLAŊ LEVIRA 18 - Boy Lonana

Gaɗta kay taɓpa vi sa njufna u cara

¹ Yawe di Moiz ana,

² «Tuɗ di suu Israelna, aŋ dasi ana, Ni an, Yawe, Loogina.

³ Lagi dlara agi laɗ ay hu mbassa Egiptera oloɗi. Lagi dlara li hu mbassa Kanaandaɗi lay. Mbassa an min a cukugi hura, lagi u gaɗ masiraɗi.

⁴ Lagi ni dlara an laɗta, humugi u gaɗ manda. Anni Bu Suuna, Loogina.

⁵ «Golongi ni gaɗ manda u dlara an miniɗta. Sana kak iiri ni u lira nam li u gaɗtara, ni an, Yawe.

⁶ «Sa ma Israel ma buu u cara vi dee mambaraɗi. Ni an, Yawe.

⁷ «Ka sana wi siilira vi buŋga kiɗi, ka wi siilira vi suŋgaɗi lay, kay ana ndaɗ ni suŋu, sa ka ndak buu u suŋgi.

⁸ «Aŋ buu u caŋ buŋgaɗi, kay aŋ wi ki ni siilira vi buŋga.

⁹ «Aŋ ka buu u wayaŋgaɗi, lini ndaɗ ni wayaŋ buŋga lay, wayaŋ suŋga lay, lini ndaɗ wul vo vi buŋŋi wuli ɦawa lay, wul ay ki ni keŋ lay.

¹⁰ «Aŋ ka buu u goŋ goroŋŋaraɗi u goŋ gooŋgaraɗi lay, ni aŋ wi ni siili maŋ taŋgara tok.

¹¹ «Aŋ ka buu u goŋ caŋ buŋgaraɗi, kay ndaɗ ni wayaŋga ni goŋ buŋga lay.

¹² «Aŋ ka buu u wayaŋ buŋgaɗi, kay tliwiɗ ni dew u ma vi buŋŋa.

¹³ «Aŋ ka buu u wayaŋ suŋgaɗi, kay tliwiɗ ni dew u ma vi suŋŋa.

¹⁴ «Aŋ ka buu u caŋ buŋ mbanaraɗi, kay ndaɗ ni suŋu.

¹⁵ «Aŋ ka buu u caŋ goroŋŋaraɗi, kay ndaɗ ni caŋ goroŋŋara, aŋ ka waɗ siili maɗtaɗi.

¹⁶ «Aŋ ka buu u caŋ wayaŋŋaraɗi, kay aŋ wi ki ni siilira vi wayaŋŋara.

¹⁷ «Aŋ ka buu u cara aŋ buu ki u goroɗtaraɗi, aŋ ka buu u caŋ goroɗ ma njufnaraɗi lay, u goŋ goroɗta tamaraɗi lay, kay asi halaŋŋi tliwiɗu, aŋ li wa u asi na ni coo.

¹⁸ «Aŋ ka ɗum wayaŋ caaŋgara hu li ma ndaɗ ka iiri tu maynaɗi, dla ndaɗta mbaa honira duk cara u wayaɗta, hu li ma aŋ ka waɗ siilira vi wayaɗta egeɗna.

¹⁹ «Aŋ ka buu u cara hu li ma busuna egeɗnaɗi, kay ndaɗ ki ni njenjee.

²⁰ «Aŋ ka buu u cara vi ndaraŋŋaɗi, dla ndaɗta mbuɗuŋ ki njenjee.

²¹ «Aŋ ka ɦal goryoŋ a ŋgalasi ki maŋ ful ma yam ana Molekŋaɗi, aŋ ka ɓalak sem Looŋŋa kiɗi. Ni an, Yawe.

²² «Aŋ ka buu u ndaraŋ sa njufna ko buu u boyoginara naɗi, dla ndaɗta ki yow coco ii Lona.

²³ «Aŋ ka buu u yoorinaɗi, dla ndaɗta mbuɗuŋ ki njenjee, cara ka hin taɗ a yoo maa buu u ndaɗɗi may, dla ndaɗta ni zoloo.

²⁴ «Agi may ni mbuɗugi tagi ki njenje u dlara ca ndaɗtaɗi, kay ndaɗta an dik suu ɦawana ki fokogi halaŋŋi kay dlara asi laɗ co ndaɗta.

²⁵ Mbassa halaŋ mbuɗ ki njenjera, an gaɗasi ni kay dla ndaɗta asi laɗ cora. Mbassa noy suu cuki huruɗna ki wa.

²⁶ «Agi may ni lagi u gaɗ manda, u dlara an miniɗta, lagi dla cora asi laɗ wandaɗi, lini agi suu Israelna lay, lini ŋgayagi suu cuki dukugina lay, lagi naɗi.

²⁷ Dlara co ndaɗta halaŋ suu may suu li cuki fokogi hu mbas ndaɗtana laɗu, mbas ndaɗta halaŋ mbuɗ ki njenjera.

²⁸ Na ni mbas ndaɗta ka noyogi ki oloɗi, kay ana agi mbuɗuɗ ki njenjeraɗi, ko ndaɗ noy suu ki fokogi jewna kira naɗi.

²⁹ Na may gegelay ma li dlara co ndaɗta dukugi dewna hin paɗam ki duk suu mamsina.

³⁰ «Lagi u gaɗ manda, ka lagi u dla cora suuna laɗ ka ki fokogi jewraɗi, mbuɗugi tagi ki njenje u dlara co ndaɗtaɗi. Ni an, Yawe, Loogina.»