DLAŊ LEVIRA 16 - Boy Lonana

BUU MA BULUM CORA KINA Buu ŋgol ma bulum cora kina

¹ Yawe ɓak Moiz dagan miɗ ma vi goryoŋ Aaron suu mba', suu kal kura daŋga ay kalafi hu givin ma togolla ma ɓivunnana.

² Yawe di Moiz ana, «Di wayaŋŋa, Aaron, nam kal kalafi hu Li ma Saɓaki Teteɗna, ii gojoli ma caki duk ɦoŋgana na dam dambi, nam kal hu li ma Zandukka Galamba u yam Zandukka ka huna hu buuna belɗi, li ka naɗi ni nam hin miɗ kiyo, hu li ma an a tak tan duk ɗugulla kay li ma teteɗna tew tewna.

³ «Gola ni yal ma Aaron a kal kalafi hu Zira Tokkana, nam vi bolo mbutl ma li ɓivun ma bulum cora kina, vi gamlana a li ɓivun ma ŋgalam ki ŋgalina may.

⁴ Nam cuk kalsoŋga umu, cuk baraw ma teteɗna, ni njun gandina, njun gadamulla lay, tle asina halaŋ cilini u baraw dlemba. Halaŋ ca ni barawi suu teteɗna. Nam a cukusi tamba ni mbus tam ay ki halaŋ tu wa.

⁵ Suu Israelna ɦal ŋgekgina maŋ Aaron mba' a li ɓivun ma bulum cora kina, ɦam gamlana dew a li ɓivun ma ŋgalam ki ŋgalina may.

⁶ «Aaron li ɓivunna u bolo mbutlna ni kay a bulum coom tambara kira, nam li ɓivun ma bulum cora kina kay tamba kay suu mamsina halaŋ may.

⁷ Nam yow ŋgekgi suu mbana mbaarasi fok Yawe fun Mbutluɓ ma Tokka.

⁸ Aaron paɗ dewna kay ɦuguni suu mba' asina, maa dew maŋ Yawe may, ma hiniŋŋa maŋ Azazel may.

⁹ Aaron mbaa ŋgek ma ŋgaɓpa ndi kam maŋ Yawena ay a li ɓivun ma bulum cora kina.

¹⁰ Na may ŋgek ma ŋgaɓpa ndi kam maŋ Azazelna mbaaram ay fok Yawe iiriya, kay a li ɓivun ma bulum cora kina kamu, hin sunum ha ki ŋgoo bagi maŋ Azazel.

Ɓivun ma buu ŋgol ma bulum cora kina

¹¹ «Aaron li ɓivunna u bolo mbutlna kay coomba, nam li ɓivun ma bulum cora kina kay tamba kay suu mamsina halaŋ may. Hu li ma nam ŋgaɗ mbutl namma wa a li ɓivunna kay coombara ni li ni na.

¹² Nam yow murus kura hu ganun mamma ni kura ay hu givin ma togollara, yow fuɗ mbitla his jivira duk kom mba' may, tuɗusi hu li ma ki saɓaki teteɗna ŋgoo gojoli ma caki ii linna fok Yawe.

¹³ Tew fok Yawe wa ni nam cuk mbitla his jivira kay kura, ndoos mbitla his jivira kuluɓ ki kay Zandukka Galamba u yam Zandukka halaŋŋi kay a ŋgayasi kiyo ka nam miɗɗi.

¹⁴ Nam vo busu mbutlna, nam yam busuna u kom keŋ Yam Zandukka u maɗiina na, hin yamam fok Yam Zandukka may. Nam yam busuna u cifiɗ kom sem kiɗisiya.

¹⁵ Ŋgoo danan nam ŋgaɗ ŋgek ma li ɓivun ma bulum cora vi suuna kina, tuɗ busuna ha ŋgoo gojolina hu li ma saɓaki teteɗna, nam li busu namma ni ko nam li u busu mbutlnara na olo, nam yam busuna kay Yam Zandukka may, fok Zandukka may.

¹⁶ Nam li ɓivun ma bulum cora kina hu Li ma ki Saɓaki Teteɗna may, kay a mbuɗum ki teteɗ ko cora vi suunara u ŋgel vun masina, nam li kay Mbutluɓ ma Tokka ni ko ndaɗta na lay. Kay nam ka coli ni dukusi duk njenje masira.

¹⁷ Hu li ma Aaron kal a li ɓivun ma bulum cora kina kay Mbutluɓ ma Tokka ni, sa hin huɗi, juɓ ta ta hu li ma nam kal ay kina, nam li ɓivun ma bulum cora kina jew ni kay coom tambara, hin li ma kay suu mamsinana, ŋgoo dagan li kay suu Israelna halaŋ.

¹⁸ Nam kal ay ki eg givin ma togolla fok Yawena, li ɓivun ma bulum cora kina kay li namma may, nam vo busu mbutlna u busu ŋgekŋa tinim eg mek ma ŋguy kay givin ma togollana.

¹⁹ Nam yam busuna kay givin ma togolla sem kiɗisiya u komu. Nam mbuɗum ki teteɗ ko njenjera vi suu Israelnara. Nam mbuɗum ki ni teteɗ.

Ŋgek ma gam ha ki ŋgoona

²⁰ «Hu li ma nam daɓ ɓivun ma bulum cora kina ki kay Mbutluɓ ma Tokka wa, u givin ma togolla ma teteɗna ni givin ma togolla halaŋŋi, nam vi ŋgek ma hin iirina ma ŋgaɓi maŋ Azazelna aya.

²¹ Aaron baa kom kay yam ŋgek ma iirina u dlam jak, nam hom cora vi suu Israelna ki kam halaŋ, u dlara asi daɗ cora halaŋ, ni ana suluk masi ma asi lamma halaŋ halaŋ nam tinim ha ki kay ŋgekŋa. Ŋgoo dagan nam yi sana dew tuɗ gi ŋgek namma ha ki ŋgoo bagi hu fulla.

²² Ŋgekŋa yow cora vi suu Israelna ha ki kam halaŋ tuɗuɗ ki hu mbassa sa ka huɗira. «Ni hu li ma asi gi ŋgek namma ha ki bagina gaw,

²³ Aaron kal kalafi hu Mbutluɓ ma Tokka. Barawi suu nam cukusi tam a tuɗ hu Li ma ki Saɓaki Teteɗna, nam fokosi kiyo, hinisi hu Mbutluɓ ma Tokka tu wa.

²⁴ Nam mbus tam ki u yona hu li ma teteɗna, hin cuk barawi mamsina tamu, nam kal ay ki hin mba li ɓivun ma ŋgalam kina kay tamba u suuna halaŋ, nam li ɓivun ma bulum cora kina kay tamba, kay suuna may.

²⁵ Nam ŋgal mbul ɦu ma ŋgaɗam a li ɓivun ma bulum cora kina kay givin ma togolla.

²⁶ «Sa ma gi ŋgekŋa ha ki ŋgoo bagi maŋ Azazelna mbus barawi mamsina kiyo, mbus tam ki may, ŋgoo dagan nam ndak kal ay vo ni na tu wa.

²⁷ Mbutl ma ŋgaɗam a bulum cora kina u ŋgek ma ŋgaɗam a bulum cora kina, suu Aaronna tuɗusi busuɗusi ha hu Li ma ki Saɓaki Teteɗna, yowosi ha ki doŋ kaana ŋgalasi kiyo, bakka, tliwna u soɗosi halaŋ ŋgalasi ha ki doŋ kaana.

²⁸ Sa ma ŋgal mbutlna u ŋgekŋa ha ki ŋgoo doŋ kaanana mbus barawi mamsina kiyo, mbus tam ki may, hin kal ay vo ni na tu wa.

Gaɗta kay buu ma bulum cora kina

²⁹ «Gola ni gaɗta hin ha dukugi na dindinda, hu buu ma doogona hu til ma kiɗisiyana, ni sa ti vaɗi, li sunɗi lay, lini agi suu vona ɗowba ŋgay ma cuki dukugina lay.

³⁰ Kay buu namma ni buu ma lagi ɓivunna kagi a bulumugi coogira kina, a mbuɗugi ki teteɗna. Fok Yawe ni agi hin mbuɗ ki teteɗ ko dla coogira halaŋ.

³¹ Buu namma kagi ni buu ma vi Lonna, ni buu ma koɗ tara, ni buu ma agi li laara huna, gaɗ ndaɗta ni gaɗta ka hin kiɗira.

³² «Mul ŋgol ma li ɓivunna sa asi fuurum u mbulna a varak balam bumma hin cuk baraw dlemba teteɗna tamu. Nam hin li ɓivun ma bulum cora kina.

³³ Nam li ɓivun ma bulum cora kina kay Li ma ki Saɓaki Teteɗna, li ɓivunna kay Mbutluɓ ma Tokka, li ɓivunna kay givin ma togolla, li ɓivunna kay muli suu li ɓivunna halaŋ, li ɓivunna kay suu toki halaŋŋa may.

³⁴ «Gaɗ ndaɗta hin ha dukugi ni na dindin a agi li ɓivun ma bulum cora kina hu basara tew tew kay cora vi suu Israelna.» Asi li ko Yawe di ka maŋ Moizza na may.